ଭୁବନେଶ୍ୱର: ଗତକାଲି ସାମନ୍ତ ବିହାରଠାରେ ଓଡ଼ିଶା ଆଦର୍ଶ ବିଦ୍ୟାଳୟ(ଓଏଭି) ସଂଗଠନର ପ୍ରତିଷ୍ଠା ଦିବସ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏହି ଅବସରରେ ରାଜ୍ୟର ଶିକ୍ଷକଙ୍କୁ ଆହୁରି ଦକ୍ଷ କରିବାକୁ ଏକ ଶିକ୍ଷକ ପ୍ରଶିକ୍ଷଣ କେନ୍ଦ୍ର ପ୍ରତିଷ୍ଠା ହେବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ଏହି ପ୍ରଶିକ୍ଷଣ କେନ୍ଦ୍ର ପାଇଁ ୨୫ କୋଟି ଟଙ୍କା ବିନିଯୋଗ ହେବ । ଏଥିରେ ୩୦୦ ଶିକ୍ଷକଙ୍କ ଟ୍ରେନିଂ ପାଇଁ ଅଡିଟୋରିୟମ୍, ୧୦୦ ଜଣ ଶିକ୍ଷକ ରହିବାକୁ ବ୍ୟବସ୍ଥା ସହିତ ୧୦ଟି କର୍ମଶାଳା କେନ୍ଦ୍ର ନିର୍ମାଣ କରାଯିବ ।
ଅନ୍ୟପକ୍ଷରେ, ରାଜ୍ୟର ଶିକ୍ଷକଙ୍କ କଲ୍ୟାଣ ପାଇଁ ମୁଖ୍ୟମନ୍ତ୍ରୀ ‘ବଜ୍ର ଯୋଜନାଦର ଶୁଭାରମ୍ଭ ମଧ୍ୟ କରିଛନ୍ତି । ଏହି ଯୋଜନାରେ ଶିକ୍ଷକମାନେ ସେମାନଙ୍କର ଦିନକର ଦରମା ଏହି କଲ୍ୟାଣ ପାଣ୍ଠିକୁ ଦାନ କରିପାରିବେ । ଏହି ପାଣ୍ଠିରୁ ସେମାନଙ୍କ ବିଭିନ୍ନ ଆର୍ଥିକ ସମସ୍ୟା ସମୟରେ ସହାୟତା ଯୋଗାଇ ଦିଆଯିବ । ଏହି ଅବସରରେ ୫ଟି ଶ୍ରେଷ୍ଠ ଆଦର୍ଶ ବିଦ୍ୟାଳୟ ବଲାଙ୍ଗୀର ପଥରଚେପା ଓଏଭି, କେନ୍ଦୁଝର ଆନନ୍ଦପୁର ଶାଳପଡ଼ା ଓଏଭି, ନୟାଗଡ଼ ନୋଟାର ଓଏଭି, କେନ୍ଦୁଝର ଆନନ୍ଦପୁରଶାଳପଡ଼ା ଓଏଭି ଓ ଅନୁଗୁଳ କିଶୋରନଗର ସ୍ଥିତ ରାଣିଆକଟା ଓଏଭିକୁ ପୁରସ୍କୃତ କରାଯାଇଛି ।
ସେହିପରି ବିଭିନ୍ନ ପ୍ରତିଯୋଗିତାରେ ଶ୍ରେଷ୍ଠ ୫ଜଣ ଛାତ୍ରଛାତ୍ରୀ ଖୋର୍ଦ୍ଧା ଷ„ପୁର ଓଏଭିର ପ୍ରଜକ୍ତା ପ୍ରିୟଦର୍ଶିନୀ ମହାପାତ୍ର, ଖୋର୍ଦ୍ଧା ସିଆଳି ଓଏଭିର ପାରମିତା ମାଝି, ଗଞ୍ଜାମ ନିମିନା ଓଏଭିର ବିନାୟକ ପାତ୍ର, ନୟାଗଡ଼ ଦଶପଲ୍ଲା ଓଏଭିର ଶ୍ରୁତି ସୁଲଗ୍ନା ଓ ପୁରୀ ସତ୍ୟବାଦୀ ଓଏଭିର ସାଇ ସମରପିତା ପ୍ରଧାନଙ୍କୁ ପୁରସ୍କୃତ କରାଯାଇଛି ।
କାର୍ଯ୍ୟକ୍ରମରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ, ମୁଖ୍ୟମନ୍ତ୍ରୀଙ୍କ ଉପଦେଷ୍ଟା (ଶିକ୍ଷା) ଉପେନ୍ଦ୍ର ତ୍ରିପାଠୀ, ମୁଖ୍ୟମନ୍ତ୍ରୀଙ୍କ ସଚିବ ଭି. କେ ପାଣ୍ଡିଆନ, ବିଭାଗୀୟ ସଚିବ ଅଶ୍ୱଥୀ ଏସ୍, ଓଏଭି ପ୍ରକଳ୍ପ ନିର୍ଦ୍ଦେଶକ ସଂଗ୍ରାମ ମହାପାତ୍ର ପ୍ରମୁଖ ଯୋଗ ଦେଇଥିଲେ ।
