ତେଲ ଯିବା ରାସ୍ତାରେ ମୃତ୍ୟୁ ଜାଲ !

ଆଜି ମିଡିଲ ଇଷ୍ଟରେ ଏମିତି ଗୋଟିଏ ଖେଳ ଆରମ୍ଭ ହୋଇଛି ଯାହା ସାରା ବିଶ୍ୱକୁ ହଲାଇପାରେ। ସମୁଦ୍ର ତଳେ ବିଛାଯାଇଛି ମୃତ୍ୟୁର ଜାଲ ଏବଂ ଲକ୍ଷ୍ୟ ହେଉଛି ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ତେଲ ମାର୍ଗ ହର୍ମୁଜ ପ୍ରଣାଳୀ  (STRAIT OF HORMUZ)। ଖବର ଆସୁଛି ଯେ ଇରାନର ଶକ୍ତିଶାଳୀ ଇସ୍ଲାମିକ ବିପ୍ଳବୀ ଗାର୍ଡ ବାହିନୀ ଏହି ସମୁଦ୍ର ପଥକୁ ଘେରାବନ୍ଦୀ କରିଦେଇଛି। ଯଦି ଏହି ରାସ୍ତା ବନ୍ଦ ହୋଇଯାଏ, ସାରା ଦୁନିଆରେ ତୈଳ ସଙ୍କଟ ଓ ଆର୍ଥିକ ଅସ୍ଥିରତା ଦେଖାଦେଇପାରେ। ତେବେ ପ୍ରଶ୍ନ ହେଉଛି କଣ ମିଡିଲ ଇଷ୍ଟର ଏହି ଉତ୍ତେଜନା ଏବେ ବଡ଼ ବିଶ୍ୱ ଯୁଦ୍ଧର ଆକାର ନେବ?

ମିଡିଲ ଇଷ୍ଟରେ ଯୁଦ୍ଧର ନୂଆ ମୋର୍ଚ୍ଚା ଖୋଲିଗଲା। ଇରାନ ସମଗ୍ର STRAIT OF HORMUZ କୁ ଘେରାବନ୍ଦୀ କରିଦେଇଛି। ସମୁଦ୍ର ତଳେ ବିଛାଯାଇଛି ଘାତକ ନୌସେନା ମାଇନ୍। ଏହି ମାଇନ୍ଗୁଡ଼ିକ ସମୁଦ୍ର ତଳେ ଲୁଚି ରହେ ଏବଂ ଯେତେବେଳେ କୌଣସି ଜାହାଜ ତାହାର ନିକଟକୁ ଯାଏ, ସେତେବେଳେ ଭୟଙ୍କର ବିସ୍ଫୋରଣ ଘଟେ। ଯେପରି ସ୍ଥଳଭାଗରେ ଲ୍ୟାଣ୍ଡମାଇନ୍ ବିଛାଯାଏ, ସେହିପରି ସମୁଦ୍ର ତଳେ ମଧ୍ୟ ବାରୁଦ ଭରା ଛୋଟ ବୋମାର ଏକ ବିଶାଳ ନେଟୱାର୍କ ବିଛାଯାଏ। ଯଦି କୌଣସି ତେଲ ଟ୍ୟାଙ୍କର କିମ୍ବା ଯୁଦ୍ଧଜାହାଜ ସେଠାରେ ପହଞ୍ଚେ, ତାହା ମୁହୂର୍ତ୍ତରେ ଧ୍ୱଂସ ହୋଇପାରେ। ରିପୋର୍ଟ ଅନୁସାରେ, ଇରାନ ହର୍ମୋସ ପ୍ରଣାଳୀକୁ ଏକ “ମୃତ୍ୟୁ ଫାଶ” ରେ ପରିଣତ କରିଦେଇଛି। ଏହି ଅଞ୍ଚଳକୁ ଇରାନର ଇସ୍ଲାମିକ ବିପ୍ଳବୀ ଗାର୍ଡ ବାହିନୀ ନିୟନ୍ତ୍ରଣ କରୁଛି। ଇରାନ ସ୍ପଷ୍ଟ ଚେତାବନୀ ଦେଇଛି ଯେ ଯେକୌଣସି ଦେଶ ଯଦି ଇରାନ ବିରୋଧରେ ଆକ୍ରମଣକାରୀଙ୍କ ସହଯୋଗ କରିବ, ସେମାନଙ୍କ ଜାହାଜକୁ ହର୍ମୋସ ପ୍ରଣାଳୀ ଦେଇ ଯିବାକୁ ଦିଆଯିବ ନାହିଁ। ଏହି ମଧ୍ୟରେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ ଆମେରିକୀୟ ନୌସେନା ହର୍ମୋସରେ ମାଇନ୍ ବିଛାଉଥିବା ୧୦ଟି ଇରାନୀ ଜାହାଜକୁ ଧ୍ୱଂସ କରିଦେଇଛି। ହର୍ମୋସ ପ୍ରଣାଳୀ ବହୁତ ସଂକୀର୍ଣ୍ଣ ଅଞ୍ଚଳ।

ଏଠାରେ ଜାହାଜଗୁଡ଼ିକ କେବଳ କିଛି କିଲୋମିଟର ଚଉଡ଼ ରାସ୍ତାରେ ଯାତାୟାତ କରନ୍ତି। ଏହି କାରଣରୁ ଯଦି ଏଠାରେ ମାଇନ୍ ବିଛାଯାଏ, ସମଗ୍ର ତେଲ ପରିବହନ ବନ୍ଦ ହୋଇପାରେ। ସୂଚନା ଅନୁସାରେ, ଇରାନ ଏଠାରେ ପ୍ରାୟ ୫୦୦ଟି ସ୍ପିଡବୋଟ୍, କ୍ରୁଜ୍ ମିସାଇଲ୍ ଏବଂ ଭାରୀ ତୋପାଗାର ମୁତୟନ କରିଛି। ସମୁଦ୍ର ତଳେ ବିଛାଯାଇଥିବା ଏହି ନୌସେନା ମାଇନ୍ଗୁଡ଼ିକୁ ଚିହ୍ନଟ କରିବା ମଧ୍ୟ ବହୁତ କଷ୍ଟକର, କାରଣ ଏଗୁଡ଼ିକ ବହୁତ ସମୟରେ ଧ୍ୱନି ତରଙ୍ଗ ବ୍ୟବହାର କରି ସମୁଦ୍ର ତଳର ବସ୍ତୁ କିମ୍ବା ଜାହାଜକୁ ଚିହ୍ନଟ କରିବା ପ୍ରଣାଳୀ ବା ସୋନାର୍ରେ ମଧ୍ୟ ଧରା ପଡ଼େ ନାହିଁ। ନୌସେନା ମାଇନ୍ ଅନେକ ପ୍ରକାରର ଥାଏ କିଛି ସମୁଦ୍ର ତଳେ ସ୍ଥିର ରହେ, ଯେତେବେଳେ କିଛି ଭାସମାନ ମାଇନ୍ ସମୁଦ୍ରରେ ଭାସି ରହିଥାଏ। ଯେତେବେଳେ କୌଣସି ଜାହାଜ ସେମାନଙ୍କ ସହିତ ଧକ୍କା ହୁଏ, ସେତେବେଳେ ସେମାନେ ବିସ୍ଫୋରଣ କରନ୍ତି। ହର୍ମୋସ ପ୍ରଣାଳୀ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ର ପଥ ମଧ୍ୟରୁ ଗୋଟିଏ। ପ୍ରତିଦିନ ବିଶ୍ୱର ପ୍ରାୟ ୨୦% ଅଶୋଧିତ ତେଲ ଏହି ରାସ୍ତା ଦେଇ ଯାଏ। ଯଦି ଏହି ପଥ ବନ୍ଦ ହୋଇଯାଏ, ସାରା ବିଶ୍ୱରେ ତୈଳ ସଙ୍କଟ ଏବଂ ଆର୍ଥିକ ଅସ୍ଥିରତା ସୃଷ୍ଟି ହୋଇପାରେ। ଏବେ ପ୍ରଶ୍ନ ହେଉଛି  ଆମେରିକା ଏହି ଅବରୋଧକୁ ଭାଙ୍ଗିପାରିବ କି? ନା ହର୍ମୋସ ପ୍ରଣାଳୀ ନେଇ ଏହି ଉତ୍ତେଜନା ମିଡିଲ ଇଷ୍ଟର ଯୁଦ୍ଧକୁ ଏକ ବଡ଼ ବିଶ୍ୱ ସଙ୍କଟରେ ପରିଣତ କରିଦେବ?