ବଳେନ୍ଦ୍ର ଶାହ ନେପାଳର ପରବର୍ତ୍ତୀ ପ୍ରଧାନ ମନ୍ତ୍ରୀ

ନୂଆଦିଲ୍ଲୀ : ସରିଛି ନେପାଳର ସାଧାରଣ ନିର୍ବାଚନ । ଶୁକ୍ରବାର ଏହାର ଫଳାଫଳ ପ୍ରକାଶ ପାଇଛି  । ଜେନ୍‌ ଜେଡ୍‌ ବିକ୍ଷୋଭ ପରେ ନେପାଳର ପ୍ରଥମ ସାଧାରଣ ନିର୍ବାଚନ ଅନୁଷ୍ଠିତ ହୋଇ ଯାଇଛି । ପ୍ରକାଶିତ ଫଳ ଅନୁଯାୟୀ ବଳେନ୍ଦ୍ର ଶାହଙ୍କ ନେତୃତ୍ବାଧୀନ ରାଷ୍ଟ୍ରୀୟ ସ୍ବତନ୍ତ୍ର ପାର୍ଟି (ଆରଏସ୍‌ପି) ସଂଖ୍ୟାଗରିଷ୍ଠତା ଦଳ ଭାବେ ଉଭା ହୋଇଛି । 

ପାର୍ଲାମେଣ୍ଟର ୧୬୫ଟି ଆସନ ପାଇଁ ଭୋଟ ଗ୍ରହଣ ହୋଇଥିବାବେଳେ ଆରଏସ୍‌ପି ୧୧୪ଟି ଆସନରେ ବିଜୟୀ ଓ ଆଗୁଆ ରହିଛି । ନେପାଳ ନିର୍ବାଚନ କମିଶନଙ୍କ ଅନୁଯାୟୀ, ଆରଏସପି କାଠମାଣ୍ଡୁ ଜିଲ୍ଲାର ସମସ୍ତ ୧୦ଟି ନିର୍ବାଚନମଣ୍ଡଳୀରେ କ୍ଲିନ୍ ସୁଇପ୍ ସହିତ ୩୪ଟି ଆସନ ଜିତିଛି ଏବଂ ​​ଆଉ ୮୬ଟି ଆସନରେ ଆଗୁଆ ଅଛି । ଏହି ନିର୍ବାଚନରେ ବଳେନ୍ଦ୍ର ଶାହଙ୍କୁ ଆରଏସ୍‌ପି ପକ୍ଷରୁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ଉପସ୍ଥାପନ କରାଯାଇଥିଲା। ବଳେନ୍ଦ୍ର ଝାପା-୫ ଆସନରେ ପ୍ରତିଦ୍ବନ୍ଦ୍ବିତା କରିଥିଲେ । ଭୋଟ ଗଣତି ପ୍ରକ୍ରିୟା ଜାରି ରହିଥିବାବେଳେ ବଳେନ୍ଦ୍ର ଏହି ଆସନରେ ୪୨ ହଜାର ୫୪୩ ଭୋଟ ସହିତ ଚାରି ଥର ପ୍ରଧାନମନ୍ତ୍ରୀ କେ ପି ଶର୍ମା ଓଲିଙ୍କ ବିପକ୍ଷରେ ଜିତିଛନ୍ତି, ଯେତେବେଳେ କି ଶର୍ମା କେବଳ ୧୧  ହଜାର ୪୨୭ ଭୋଟ ପାଇଥିଲେ ।

୩୫ବର୍ଷୀୟ ବଳେନ୍ଦ୍ର ହେଉଛନ୍ତି କାଠମାଣ୍ଡୁର ପୂର୍ବତନ ମେୟର । ସେ ପେସାରେ ଜଣେ ଇଂଜିନିୟର ଏବଂ ଵାଲେନ ନାମରେ ପ୍ରସିଦ୍ଧ I ବଳେନ୍ଦ୍ରଙ୍କ ବିରୋଧରେ କେପି ଶର୍ମା ଓଲି ପ୍ରାର୍ଥୀ ହୋଇଥିଲେ। ନେପାଳ ପାର୍ଲାମେଣ୍ଟର ମୋଟ ୨୭୫ ଆସନ ମଧ୍ୟରୁ ୧୬୫ଟି ପାଇଁ ଭୋଟଗ୍ରହଣ ହୋଇଛି । ଅବଶିଷ୍ଟ ୧୧୦ ଆସନ ପାଇଁ ପ୍ରୋପର୍ସନାଲ ରିପ୍ରେଜେଣ୍ଟେସନ ପଦ୍ଧତି ଗ୍ରହଣ କରାଯାଉଥିବାବେଳେ ଏଥିରେ ୩୧୩୫ ପ୍ରାର୍ଥୀ ଅବତୀର୍ଣ୍ଣ ହୋଇଥିବା ଜଣାପଡିଛି। 

ସେହିପରି ନେପାଳୀ କଂଗ୍ରେସ ଛଅଟି ଆସନରେ ବିଜୟ ହାସଲ କରିଛି ଏବଂ ଅନ୍ୟ ୧୦ଟି ଆସନରେ ଆଗୁଆ ଅଛି। ନେପାଳୀ କମ୍ୟୁନିଷ୍ଟ ପାର୍ଟି ଦୁଇଟି ଆସନରେ ବିଜୟୀ ହୋଇଛି ଏବଂ ଅନ୍ୟ ଆଠଟିରେ ଆଗୁଆ ଅଛି । ବହିଷ୍କୃତ ପ୍ରଧାନମନ୍ତ୍ରୀ କେ ପି ଶର୍ମା ଓଲିଙ୍କ କମ୍ୟୁନିଷ୍ଟ ପାର୍ଟି ଅଫ୍ ନେପାଳ (ଏକୀକରଣ ମାର୍କ୍ସବାଦୀ-ଲେନିନିଷ୍ଟ) ଗୋଟିଏ ଆସନରେ ବିଜୟୀ ହୋଇଛି ଏବଂ ଆଠଟିରେ ଆଗୁଆ ଅଛି।

ଗତବର୍ଷ ନେପାଳରେ ଜେନ୍‌ ଜେଡ୍‌ ବିକ୍ଷୋଭ ପ୍ରଦର୍ଶିତ ହୋଇଥିବାବେଳେ କେପି ଶର୍ମା ଓଲିଙ୍କ ସରକାରର ପତନ ଘଟିଥିଲା। ନେପାଳ ସୁପ୍ରିମକୋର୍ଟର ଅବସରପ୍ରାପ୍ତ ପ୍ରଧାନ ବିଚାରପତି ସୁଶୀଳା କାର୍କିଙ୍କୁ କାମଚଳା ପ୍ରଧାନମନ୍ତ୍ରୀ ନିଯୁକ୍ତ କରାଯାଇଥିଲା।