ନ୍ୟୁଜିଲାଣ୍ଡ ବିପକ୍ଷ ସିରିଜ୍ ବିଜୟର ଅସଲି ହିରୋ କିଏ?

ନ୍ୟୁଜିଲାଣ୍ଡ ବିପକ୍ଷ ସିରିଜ୍ ବିଜୟର ଅସଲି ହିରୋ କିଏ?
Samaya Live News Picture
Published On

ଭାରତର ବଡ଼ ବଡ଼ ଷ୍ଟାର୍ ବ୍ୟାଟର ଦଳରେ ନଥିଲେ। ନା ଥିଲା ରନ୍ର ବର୍ଷା, ନା ବ୍ୟାଟ୍ରୁ ଦେଖିବାକୁ ମିଳିଥିଲା କୌଣସି ବଡ଼ ଚମତ୍କାର! ତଥାପି ନ୍ୟୁଜିଲ୍ୟାଣ୍ଡ ଭଳି ଶକ୍ତିଶାଳୀ ଦଳକୁ ମାତ୍ ଦେଇ ସିରିଜ୍ ଜିତିନେଲା ଟିମ୍ ଇଣ୍ଡିଆ। କିନ୍ତୁ ଏହି ବିଜୟ ପଛରେ ରହିଛି ଦୁଇ ଜଣ ଏମିତି ଖେଳାଳିଙ୍କ କାହାଣୀ, ଯେଉଁମାନେ ନିଜ ପ୍ରଦର୍ଶନରେ ସମସ୍ତଙ୍କୁ ଚକିତ କରିଦେଲେ। ଜଣେ ଶେଷ ମ୍ୟାଚ୍ରେ ନିଜର ଦମ୍ ଦେଖାଇ ପୁରସ୍କାର ହାତେଇଲେ, ଆଉ ଜଣେ ମାତ୍ର ଦୁଇଟି ମ୍ୟାଚ୍ ଖେଳି ସାଜିଗଲେ ସିରିଜ୍ର ସବୁଠାରୁ ବଡ଼ ହିରୋ। କିଏ ସେହି ଦୁଇ ଖେଳାଳି? କାହାକୁ ମିଳିଲା ମ୍ୟାନ୍ ଅଫ୍ ଦି ମ୍ୟାଚ୍ ଏବଂ କିଏ ଜିତିଲେ ପ୍ଲେୟାର ଅଫ୍ ଦି ସିରିଜ୍ ଟ୍ରଫି? ଆସନ୍ତୁ  ଜାଣିବା ଏହି ରିପୋର୍ଟରେ। 
ନ୍ୟୁଜିଲ୍ୟାଣ୍ଡ ବିପକ୍ଷ ଏକଦିବସୀୟ ସିରିଜ୍ରେ କିଏ ହେଲେ ମ୍ୟାନ୍ ଅଫ୍ ଦି ମ୍ୟାଚ୍? କିଏ ଜିତିଲେ ପ୍ଲେୟାର ଅଫ୍ ଦି ସିରିଜ୍ ପୁରସ୍କାର? ଆଉ କିଏ ସେହି ଦୁଇ ଖେଳାଳି, ଯାହାଙ୍କ ଦମଦାର ପ୍ରଦର୍ଶନ ଭାରତକୁ ସିରିଜ୍ ବିଜୟୀ କରାଇଲା? ଭାରତ ଏହି ତିନି ମ୍ୟାଚ୍ ବିଶିଷ୍ଟ ସିରିଜ୍କୁ ନିଜ ନାମରେ କରିବା ପଛରେ ରହିଛି ଦୁଇ ଖେଳାଳିଙ୍କ ବଡ଼ ଅବଦାନ। କହିବାକୁ ଗଲେ, ଏହି ଦୁଇ ଖେଳାଳି ନଥିଲେ ହୁଏତ ସିରିଜ୍ର ଫଳାଫଳ ଭାରତ ସପକ୍ଷରେ ଯାଇନଥାନ୍ତା। ଏହି ସିରିଜ୍ରେ ଭାରତୀୟ ବ୍ୟାଟରଙ୍କ ପ୍ରଦର୍ଶନ ଅପେକ୍ଷା ବୋଲରଙ୍କ ଦବଦବା ଅଧିକ ଦେଖିବାକୁ ମିଳିଥିଲା। ବିଶେଷକରି ବୋଲରମାନେ ନିଜର ଚମତ୍କାର ପ୍ରଦର୍ଶନ ବଳରେ ଭାରତକୁ ବିଜୟର ସ୍ୱାଦ ଚଖାଇଥିଲେ। ଅଲରାଉଣ୍ଡର ଅକ୍ଷର ପଟେଲ ମଧ୍ୟ ନିଜର ଯୋଗଦାନ ଦେଇଥିଲେ। ପ୍ରଥମେ ଆସିବା ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାରକୁ। ଶେଷ ମ୍ୟାଚ୍ରେ ଏହି ପୁରସ୍କାର ହାତେଇଥିଲେ ଅର୍ଶଦୀପ ସିଂହ। ମ୍ୟାଚ୍ର ଗୁରୁତ୍ୱପୂର୍ଣ୍ଣ ସମୟରେ ସେ କେବଳ ବୋଲିଂରେ ନୁହେଁ, ବ୍ୟାଟିଂରେ ମଧ୍ୟ ନିଜର ଦକ୍ଷତା ଦେଖାଇଥିଲେ। ଶେଷ ଭାଗରେ ବ୍ୟାଟିଂ କରି ସେ ୧୪ ରନ୍ ସଂଗ୍ରହ କରିଥିଲେ। ମହମ୍ମଦ ସିରାଜଙ୍କ ସହ ମିଶି ଦଳର ସ୍କୋରକୁ ୧୬୦ ରନ୍ରେ ପହଞ୍ଚାଇବାରେ ସହାୟକ ହୋଇଥିଲେ। ତାଙ୍କର ଏହି ଛୋଟ ଇନିଂସ ମ୍ୟାଚ୍ ଦୃଷ୍ଟିରୁ ବେଶ୍ ମୂଲ୍ୟବାନ ଥିଲା। ଏହା ସହିତ ବୋଲିଂରେ ମଧ୍ୟ ଅର୍ଶଦୀପ ନିଜର ଜଲୱା ଦେଖାଇଥିଲେ। ୧୦ ଓଭରର ଶୃଙ୍ଖଳିତ ସ୍ପେଲ୍ରେ ତିନୋଟି ୱିକେଟ୍ ନେଇ ସେ ନ୍ୟୁଜିଲ୍ୟାଣ୍ଡ ବ୍ୟାଟରଙ୍କୁ ଅସୁବିଧାରେ ପକାଇଥିଲେ। ତେଣୁ ତାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ମିଳିଥିଲା। ଏବେ ଆସିବା ସିରିଜ୍ର ସବୁଠାରୁ ବଡ଼ ପୁରସ୍କାର ଅର୍ଥାତ୍ ପ୍ଲେୟାର ଅଫ୍ ଦି ସିରିଜ୍କୁ। ଏହି ପୁରସ୍କାର ପାଇଁ ଅନେକ ଖେଳାଳି ଦାବିଦାର ଥିଲେ। କିନ୍ତୁ ଶେଷରେ ବାଜି ମାରିଥିଲେ ଗୁରନୂର ବ୍ରାର। ସବୁଠାରୁ ରୋଚକ କଥା ହେଉଛି, ସେ ସିରିଜ୍ର ଶେଷ ମ୍ୟାଚ୍ ଖେଳିନଥିଲେ। ମାତ୍ର ପ୍ରଥମ ଦୁଇଟି ମ୍ୟାଚ୍ରେ ତାଙ୍କର ପ୍ରଦର୍ଶନ ଏତେ ପ୍ରଭାବଶାଳୀ ଥିଲା ଯେ ସେ ସିରିଜ୍ର ଶ୍ରେଷ୍ଠ ଖେଳାଳି ହେବାକୁ ଯୋଗ୍ୟ ବିବେଚିତ ହୋଇଥିଲେ। ଗୁରନୂର ବ୍ରାର ପ୍ରଥମ ଦୁଇଟି ମ୍ୟାଚ୍ରେ ମୋଟ ୯ଟି ୱିକେଟ୍ ନେଇ ନ୍ୟୁଜିଲ୍ୟାଣ୍ଡ ବ୍ୟାଟିଂ ଲାଇନ୍ଅପ୍କୁ ଦୋହଲାଇ ଦେଇଥିଲେ। ପ୍ରଥମ ମ୍ୟାଚ୍ରେ ଚାରିଟି ୱିକେଟ୍ ନେବା ସହ ଦ୍ୱିତୀୟ ମ୍ୟାଚ୍ରେ ମଧ୍ୟ ତିନି ୱିକେଟ୍ର ଦମଦାର ସ୍ପେଲ୍ ଦେଖାଇଥିଲେ। ତାଙ୍କର ଏହି ପ୍ରଦର୍ଶନ ଭାରତକୁ ପ୍ରାରମ୍ଭିକ ଦୁଇଟି ମ୍ୟାଚ୍ରେ ବିଜୟୀ କରାଇବାରେ ବଡ଼ ଭୂମିକା ନେଇଥିଲା। ସିରିଜ୍ରେ ସର୍ବାଧିକ ୱିକେଟ୍ ନେଇଥିବାରୁ ଗୁରନୂର ବ୍ରାରଙ୍କୁ ପ୍ଲେୟାର ଅଫ୍ ଦି ସିରିଜ୍ ପୁରସ୍କାର ମିଳିଥିଲା। ଏଠାରେ ଆଉ ଏକ କଥା ଉଲ୍ଲେଖ କରିବା ଜରୁରୀ। ଏହି ସିରିଜ୍ରେ ବିରାଟ କୋହଲି, ରୋହିତ ଶର୍ମା, ଶୁଭମନ ଗିଲ୍, ଶ୍ରେୟସ ଆୟର ଏବଂ କେଏଲ୍ ରାହୁଲଙ୍କ ଭଳି ଅନେକ ଅଭିଜ୍ଞ ବ୍ୟାଟର ଉପଲବ୍ଧ ନଥିଲେ। ତଥାପି ଭାରତୀୟ ବୋଲରମାନେ ନିଜର ଦମ୍ରେ ଦଳକୁ ସିରିଜ୍ ବିଜୟୀ କରାଇଥିଲେ। ତେଣୁ ଏହି ସିରିଜ୍ ବିଜୟର ଶ୍ରେୟ ନିଶ୍ଚିତ ଭାବେ ଭାରତୀୟ ବୋଲରଙ୍କୁ ଯିବ। ବିଶେଷକରି ଅର୍ଶଦୀପ ସିଂହ ଏବଂ ଗୁରନୂର ବ୍ରାରଙ୍କ ପ୍ରଦର୍ଶନ ଦୀର୍ଘଦିନ ଧରି ମନେ ରହିବ। ଏହି ଦୁଇ ଖେଳାଳି ହିଁ ଭାରତର ସିରିଜ୍ ବିଜୟର ଅସଲି ହିରୋ।

Tags: