ଆଜି ୭୭ତମ ସାଧାରଣତନ୍ତ୍ର ଦିବସ,ରାଜଧାନୀରେ ଅଭିବାଦନ ଗ୍ରହଣ କଲେ ରାଜ୍ୟପାଳ

ଭୁବନେଶ୍ୱର : ଆଜି ସାରା ଦେଶ ପାଳୁଛି ୭୭ତମ ସାଧାରଣତନ୍ତ୍ର ଦିବସ । ଭୁବନେଶ୍ୱରର ଗାନ୍ଧୀ ମାର୍ଗରେ ରାଜ୍ୟସ୍ତରୀୟ ଗଣତନ୍ତ୍ର ଦିବସ ପାଳନ ହୋଇଛି । ମୁଖ୍ୟ ଅତିଥି ଭାବେ ଯୋଗ ଦେଇ ଗାନ୍ଧିମାର୍ଗରେ ଜାତୀୟ ପତାକା ଉତ୍ତୋଳନ କରିଛନ୍ତି ରାଜ୍ୟପାଳ ହରିବାବୁ କମ୍ଭମପତି । ଭବ୍ୟ ପରେଡ ଅଭିବାଦନ ଗ୍ରହଣ କରିଛନ୍ତି ରାଜ୍ୟପାଳ । ତାଙ୍କ ସହିତ ମୁଖ୍ୟ ଶାସନ ସଚିବ ଅନୁ ଗର୍ଗ ମଧ୍ୟ ଉପସ୍ଥିତ ହୋଇଛନ୍ତି । ପରେଡରେ ୫୪ଟି କଣ୍ଟିଜେଣ୍ଟ ଅଂଶଗ୍ରହଣ କରିଛନ୍ତି । ଯେଉଁଥିରେ ବିଭିନ୍ନ ୟନିଫର୍ମ ଟ୍ରୁପ, ସିଆରପିଏଫ୍‌, ଓଆଇଏସଏଫ୍‌ ଏବଂ ହୋମଗାର୍ଡ ସିଭିଲ ଡିଫେନ୍ସ ଭଳି କଣ୍ଟିନଜେଣ୍ଟ  ସହ ୪୫ ବାଳକ, ୩୫ ବାଳିକା ୭ଟି ବୁଲେଟରେ ଶ୍ରୀଶକ୍ତିରୁ 'ଅପରେସନ୍ ସିନ୍ଦୂର' ବାର୍ତ୍ତା ଦେଇଛନ୍ତି ।  

ଏଥର ରାଜ୍ୟସ୍ତରୀୟ ସାଧାରଣତନ୍ତ୍ର ଦିବସରେ ଦେଖିବାକୁ ମିଳିଛି ୧୨ଟି ବିଭାଗର ପ୍ରଜ୍ଞାପନ ମେଢ । ବିଭିନ୍ନ ଜିଲାର ୫ଟି ଲୋକନୃତ୍ୟ ଓ ଲୋକକଳା ଗ୍ରୁପ୍‌ ବି ଅଂଶ ଗ୍ରହଣ କରିଛନ୍ତି । କୌଶଳ ପ୍ରଦର୍ଶନ କରିଛନ୍ତି ଡେୟାର ଡେଭିଲ୍‌ ସହ ସ୍କେଟିଂ ଗ୍ରୁପ୍‌ । ପରେଡ୍ କମାଣ୍ଡର ଆଇପିଏଲ ରାକେଶ କୁମାର ସାହୁ ମୁଖ୍ୟ ଅତିଥିଙ୍କଠାରୁ ଅନୁମତି ଗ୍ରହଣ କରିବା ପରେ ଗାନ୍ଧୀ ମାର୍ଗରେ ୭୭ତମ ରାଜ୍ୟସ୍ତରୀୟ ଗଣତନ୍ତ୍ର ଦିବସର ଭବ୍ୟ ପରେଡ୍ ଆରମ୍ଭ ହୋଇଥିଲା । ପ୍ରଥମେ ୧୨୦ ଆର୍ମି ବାଟାଲିୟନ ପରେଡ୍ କରିଥିଲେ । ଏହାପରେ ବର୍ଡର ସିକ୍ୟୁରିଟି ଫୋର୍ସ ପ୍ଲାଟୁନ, ସେଣ୍ଟ୍ରାଲ ରିଜର୍ଭ ପୁଲିସ୍ ଫୋର୍ସ, ସିଆରପିଏଫ ବ୍ୟାଣ୍ଡ, ସ୍ଟେଟ୍ ଆର୍ମ ଫୋର୍ସ କଣ୍ଟିଜେଣ୍ଟ ପରେଡ୍ ପରିବେଶଷ କରିଥିଲେ । 
​​​​​​​
୭୭ତମ ସାଧାରଣତନ୍ତ୍ର ଦିବସ ପାଇଁ ନବବଧୂ ପରି ସଜେଇ ହୋଇଛି ରାଜଧାନୀ ଭୁବନେଶ୍ୱର । ଲୋକସେବା ଭବନ, ବିଧାନସଭା, କମିଶନରେଟ ପୁଲିସ୍  କାର୍ଯ୍ୟାଳୟ ଏବଂ ରେଳ ସଦନ ଭଳି ପ୍ରମୁଖ ସରକାରୀ କୋଠାଗୁଡ଼ିକ ରଙ୍ଗୀନ ଆଲୋକମାଳାରେ ଝଲସୁଛି । ସହରର ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକ ତ୍ରିରଙ୍ଗାର ତିନି ରଙ୍ଗରେ ସୁସଜ୍ଜିତ କରାଯାଇଛି । 

ସାଧାରଣତନ୍ତ୍ର ଦିବସ ଅବସରରେ ୪୨ ଜଣଙ୍କୁ ରାଜ୍ୟସ୍ତରୀୟ ପୋଲିସ ମେଡାଲ୍ ପ୍ରଦାନ କରାଯାଇଛି । ଉଲ୍ଲେଖନୀୟ ସେବା ପାଇଁ ୨୦ ଜଣଙ୍କୁ ପ୍ରଦାନ କରାଯାଇଛି ରାଜ୍ୟପାଳ ପଦକ। ଏମାନଙ୍କ ଭିତରେ ଦକ୍ଷିଣାଞ୍ଚଳ ରେଞ୍ଜ ଆଇଜି ନୀତି ଶେଖର, କେନ୍ଦ୍ରାଞ୍ଚଳ ଆଇଜି ସତ୍ୟଜିତ ନାଏକ ଓ ପୁରୀ ଏସପି ପ୍ରତୀକ ସିଂ। 

ସେହିପରି ସାହସିକତା ପାଇଁ ୯ ଜଣଙ୍କୁ ରାଷ୍ଟ୍ରପତି ପଦକ ପ୍ରଦାନ କରାଯାଇଥିବା ବେଳେ ବିଶିଷ୍ଟ ସେବା ପାଇଁ ୨ ଜଣଙ୍କୁ ଦିଆଯାଇଛି ପୋଲିସ ମେଡାଲ୍। ପ୍ରଶଂସନୀୟ ସେବା ପାଇଁ ୧୧ ଜଣଙ୍କୁ ପଦକ ପ୍ରଦାନ କରାଯାଇଛି।