ଆଜି ମହାଳୟା ଅମାବାସ୍ୟା ,ପିତୃ ପୁରୁଷଙ୍କୁ ପିଣ୍ଡ ଦାନ ଉଦ୍ଦ୍ୟେଶରେ ବିଭିନ୍ନ ପୁଷ୍କରିଣୀରେ ଶ୍ରଦ୍ଧାଳୁଙ୍କ ଭିଡ଼

ଭୁବନେଶ୍ୱର : ଆଜି ପବିତ୍ର ମହାଳୟା ଅମାବାସ୍ୟା । ୧୫ ଦିନ ଧରି ଚାଲିଥିବା ପିତୃପକ୍ଷର ଆଜି ଶେଷ ଦିନରେ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ ଓ ତର୍ପଣ କରୁଛନ୍ତି ଶ୍ରଦ୍ଧାଳୁ । ଭାଦ୍ରବ କୃଷ୍ଣ ପ୍ରତିପଦା ଠାରୁ ଆରମ୍ଭ ହୋଇଥିବା ଏହି ପିତୃପକ୍ଷରେ ପିତୃ ପୁରଷମାନେ ମର୍ତ୍ତମଣ୍ତଳକୁ ଆସିଥାନ୍ତି ବୋଲି ବିଶ୍ୱାସ ରହିଛି । ପିତୃପକ୍ଷର ଏହି ଶେଷ ଦିନରେ ପିତୃ ପୁରୁଷଙ୍କ ଅମର ଆତ୍ମାର ସଦଗତି କାମନା କରି ବିଭିନ୍ନ ତୀର୍ଥ ପୁଷ୍କରିଣୀ, ନଦୀକୂଳ ତଥା ମହୋଦଧିରେ ଶ୍ରାଦ୍ଧ ଓ ତର୍ପଣ ଦେବାର ସ୍ୱତନ୍ତ୍ର ପରମ୍ପରା ରହିଛି ।

ପିତୃପକ୍ଷର ପ୍ରତ୍ୟେକ ତିଥିରେ ଶ୍ରାଦ୍ଧ ଦିଆଯାଉଥିଲେ ମଧ୍ୟ ମହାଳୟାରେ ଶ୍ରାଦ୍ଧ ଓ ପିଣ୍ତଦାନ କରିବାର ବିଶେଷ ମହତ୍ତ୍ୱ ରହିଛି । ବିଶେଷ କରି ତୀର୍ଥକ୍ଷେତ୍ର ଓ ତୀର୍ଥ ପୁଷ୍କରିଣୀରେ ପିଣ୍ତଦାନ ସହ ତର୍ପଣ କରାଯାଉଥିବାରୁ ପୁରୀ,ଭୁବନେଶ୍ୱରର, ବିନ୍ଦୁସାଗର ଏବଂ ଯାଜପୁର ବିରଜାଦେବୀଙ୍କ ପୀଠ ନାଭିଗୟା ଠାରେ ଭକ୍ତ ଆସି ପିଣ୍ତଦାନ କରିଛନ୍ତି । ବିଶ୍ୱାସ ରହିଛି ଯେ, ଆଶ୍ୱିନ ମାସ କୃଷ୍ଣପକ୍ଷ ପ୍ରତିପଦା ତିଥିଠାରୁ ଅମାବାସ୍ୟା ପର୍ଯ୍ୟନ୍ତ ଏହି ପନ୍ଦର ଦିନକୁ ପିତୃପକ୍ଷ ଭାବେ ପାଳନ କରାଯାଇଥାଏ। ଯେଉଁ ବ୍ୟକ୍ତିମାନେ ନିଜର ପିତା କିମ୍ବା ପୂର୍ବପୁରୁଷଙ୍କ ମୃତ୍ୟୁତିଥି ସଠିକ୍ ଭାବେ ମନେ ରଖି ନ ଥାନ୍ତି କିମ୍ବା ଏହି ପନ୍ଦର ଦିନ ମଧ୍ୟରେ ନିୟମିତ ଶ୍ରାଦ୍ଧ ଦେଇ ପାରି ନ ଥାନ୍ତି, ସେମାନେ ମହାଳୟା ଅମାବାସ୍ୟା ଦିନ ଏକାଠି ତିଳତର୍ପଣ ଓ ପିଣ୍ଡଦାନ କରିଥାନ୍ତି ।