ଗୃହରେ ଉଠିଲା ଧାନ କିଣା ପ୍ରସଙ୍ଗ

ଭୁବନେଶ୍ବର : ଆଜି ବିଧାନସଭା ୨ୟ ଦିନରେ ଗୃହରେ ଉଠିଲା ଧାନ କିଣା ପ୍ରସଙ୍ଗ I ଶୂନ୍ୟ କାଳରେ ଧାନ କିଣା ପ୍ରସଙ୍ଗ ଉଠାଇ ସରକାରଙ୍କୁ ଟାର୍ଗେଟ କରିଛନ୍ତି ବିରୋଧୀ ଦଳ ନେତା ପ୍ରସନ୍ନ ଆଚାର୍ଯ୍ୟ । ସେ କହିଛନ୍ତି ୨୫ ତାରିଖରୁ ଧାନ କିଣା ଆରମ୍ଭ ହୋଇଥିବା କଥା ସରକାର କହୁଥିଲେ ବି ଏଯାଏଁ ଗୋଟେ ବସ୍ତା ଧାନ ବି ଉଠି ପାରିନି । ମିଲରଙ୍କୁ ମାର୍କେଟ ୟାଡ ଆଲର୍ଟ ହୋଇନି । ଷ୍ଟୋରେଜ ପାଇଁ ଜାଗା ନାହିଁ, ଚାଷୀ ପଞ୍ଜିକରଣ କରି ପାରୁନାହାନ୍ତି ।  ତୁରନ୍ତ ଯୋଗାଣ ମନ୍ତ୍ରୀ ଓ ସମବାୟ ମନ୍ତ୍ରୀ ସ୍ଥିତି ଯାଞ୍ଚ କରନ୍ତୁ ।

୨୮ ତାରିଖ ହେଲାଣି କିନ୍ତୁ ଧାନ କିଣା ପ୍ରକ୍ରିୟା ଆରମ୍ଭ ହୋଇନାହିଁ । ଗୋଟେ ବସ୍ତା ଧାନ ସଂଗ୍ରହ ହୋଇଛି ତେବେ ମୋତେ ଯାହା ଦଣ୍ଡ ଦେବେ ମୁଁ ପ୍ରସ୍ତୁତ । କେବଳ ବରଗଡ଼ ଜିଲ୍ଲାରେ ୫ ହଜାର ଚାଷୀଙ୍କ ପଞ୍ଜିକରଣ ହୋଇନାହିଁ । ସରକାର କହୁଛନ୍ତି ଷ୍ଟୋରେଜ ନାହିଁ, ଚାଷୀଙ୍କ ପାଖେ ଷ୍ଟୋରେଜ ନାହିଁ, ଏପଟେ ମିଲରମାନେ କହୁଛନ୍ତି ଷ୍ଟୋରେଜ ନାହିଁ । ଚାଷୀଙ୍କ ଭାଗ୍ୟ ଭବିଷ୍ୟତ ସହିତ ଖେଳନ୍ତୁ ନାହିଁ, ନଚେତ ନିଆଁ ଲାଗିଯିବ । ବିପଦ ଜନକ ନିଆଁ ସହିତ ଖେଳୁଛନ୍ତି ସରକାର । ସେ ନିଆଁ ସହିତ ଖେଳନ୍ତୁ ନାହିଁ ନଚେତ ସାରା ରାଜ୍ୟରେ ନିଆଁ ଲାଗିଯିବ ।

ସେପଟେ,ଆଜି ସମ୍ବଲପୁର ବରେଇପାଲି ଧାନ ମଣ୍ଡିରେ ଉତ୍ତେଜନା ପ୍ରକାଶ ପାଇଛି । ମଣ୍ଡି ଖୋଲିଲେ ମଧ୍ୟ ଧାନ କିଣା ହୋଇପାରୁ ନଥିବାରୁ ଚାଷୀ-ପ୍ରଶାସନ ମୁହାଁମୁହିଁ ହୋଇଛନ୍ତି । ମଣ୍ଡିରେ ପ୍ରବଳ ପାଟିତୁଣ୍ଡ, ଯୁକ୍ତିତର୍କ ହୋଇଛି । ସମବାୟ ଓ ଯୋଗାଣ ବିଭାଗ ଅଧିକାରୀଙ୍କୁ ଦାୟୀ କରି ବର୍ଷିଲେ ଚାଷୀ । ପୂର୍ବରୁ ବୈଠକ ଅଧାରୁ ମିଲର୍ସମାନେ ଉଠି ପଳାଇଥିଲେ । ୩ଦଫା ଦାବି ପୂରଣ ନହେବା ପର୍ଯ୍ୟନ୍ତ ବିରୋଧ ଜାରି ରହିବ ବୋଲି କହିଥିଲେ ।