ଦୁଇ ଦିନିଆ ଓଡ଼ିଶା ଗସ୍ତ ସାରି ଦିଲ୍ଲୀ ଫେରିଗଲେ ରାଷ୍ଟ୍ରପତି

ଭୁବନେଶ୍ୱର: ଦିଲ୍ଲୀ ଫେରିଗଲେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ I ଦୁଇ ଦିନିଆ ଓଡ଼ିଶା ଗସ୍ତ ସାରି ଆଜି ସକାଳୁ ଦିଲ୍ଳୀ ଫେରିଯାଇଛନ୍ତି । ଭୁବନେଶ୍ବର କମିଶେନରରେଟ୍‌ ପୁଲିସ ପକ୍ଷରୁ କଡା ସୁରକ୍ଷାରେ ରାଜଭବନରୁ ବାହାରିଥିଲେ ରାଷ୍ଟ୍ରପତି । ଏୟାରପୋର୍ଟରେ ରାଷ୍ଟ୍ରପତିଙ୍କୁ ବିଦାୟ ସମ୍ବର୍ଦ୍ଧନା ଦେଇଥିଲେ ରାଜ୍ୟପାଳ ହରିବାବୁ କମ୍ବମ୍‌ପତି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଦୁଇ ଉପମୁଖ୍ୟମନ୍ତ୍ରୀ ପ୍ରଭାତି ପରିଡା ଓ କନକବର୍ଦ୍ଧନ ସିଂହ ଦେଓ, ବାଚସ୍ପତି ସୁରମା ପାଢୀ ପ୍ରମୁଖ ।

ରାଷ୍ଟ୍ରପତି ବିମାନବନ୍ଦର ଯିବାବେଳେ ରାଜଭବନ ଛକରୁ ଏୟାରପୋର୍ଟ ଛକ ଯାଏଁ ୨୩ ପ୍ଳାଟୁନ ଫୋର୍ସ ନିଯୋଜିତ କରାଯାଇଥିଲା । ଏହାସହ ରାଜଭବନ ଛକରୁ ଏୟାରପୋର୍ଟ ଛକ ଯାଏଁ ସକାଳ ୯ ଘଟିକାରୁ ସକାଳ ୯.୩୦ ମିନିଟ୍ ପର୍ଯ୍ୟନ୍ତ ଯାତାୟତ ପଥକୁ ବନ୍ଦ କରାଯାଇଛି । 

ଗତକାଲି ପ୍ରଥମ କରି ଓଡ଼ିଶା ବିଧାନସଭାରେ ଶୀତକାଳୀନ ଅଧିବେଶନକୁ ସମ୍ବୋଧିତ କରିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଅଭିଭାଷଣରେ ସେ କହିଥିଲେ ମୋତେ ଘରବାହୁଡା ଭଳି ଲାଗୁଛି । ମୁଁ ଏକ ସାଧାରଣ ଝିଅ ହୋଇ ଗାଆଁ ରୁ ଆସିଥିଲି । ଏଗୃହ ମତେ ସବୁ ଶିଖେଇଛି । ବିଷୟ ଉପସ୍ଥାପନ, କଥା କହିବା ଏ ଗୃହ ଶିଖେଇଥିଲା । ଆଜି ମୁଁ ଯାହା ହୋଇଛି ଏ ଗୃହ ପାଇଁ । ଏଗୃହକୁ କୋଟି କୋଟି ପ୍ରଣାମ କରିଥିଲେ ରାଷ୍ଟ୍ରପତି  । ଏହାସହ  ବିଧାନସଭାରେ ଉପସ୍ଥିତ ଥିବା ବିଧାୟକ ମାନଙ୍କୁ ଜନହିତକର କାର୍ଯ୍ୟ କରିବା ସହ ଉଚ୍ଚାରଣ ଓ ଆଚରଣରେ ସଂଯମତା ରଖିବା ପାଇଁ ପରାମର୍ଶ ଦେଇଥିଲେ । ରାଜଭବନରେ ରାଜ୍ୟପାଳଙ୍କ ଦ୍ଵାରା ଆୟୋଜିତ ରାତ୍ରିଭୋଜନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସାମିଲ ହେବା ସହ ରାଜଭବନରେ ରାତ୍ରୀଯାପନ କରିଥିଲେ ।