ପୋଲିସ ଏସଆଇ ପରୀକ୍ଷା ମହା ଦୁର୍ନୀତି, ରିମାଣ୍ଡରେ ଗଲେ ୪ ଅଭିଯୁକ୍ତ

ଭୁବନେଶ୍ୱର : ପୋଲିସ ଏସଆଇ ପରୀକ୍ଷା ମହାଦୁର୍ନୀତି । ଘଟଣାର ଜୋରଦାର ତଦନ୍ତ କରୁଛି ସିବିଆଇ। ଝାରପଡା ଜେଲରେ ପହଞ୍ଚି ଆଜିଠୁ ୩ ଦିନିଆ ରିମାଣ୍ଡରେ ୪ ଦଲାଲଙ୍କୁ ଆଣିଛି ସିବିଆଇ। ଲୋକନାଥ ସାହୁ, ତଫିମ ଅହମ୍ମଦ ଖାନ, ବିଶ୍ୱଜିତ ହରିଚନ୍ଦନ ଓ ଏସ୍ ଏସ୍ ବି ଯବାନ ବିଶ୍ୱରଞ୍ଜନ ସେନାପତି I  ୪ ଅଭିଯୁକ୍ତଙ୍କୁ ୩ଦିନିଆ ରିମାଣ୍ଡରେ ନେବାକୁ ଗତକାଲି ଅନୁମତି ଦେଇଥିଲେ ସ୍ବତନ୍ତ୍ର CJM ସିବିଆଇ କୋର୍ଟ । ଏହି ୪ ଜଣଙ୍କୁ ରିମାଣ୍ଡରେ ଆଣି ଭୁବନେଶ୍ୱର ସିବିଆଇ ଅଫିସରେ ୨ ଆଶାୟୀଙ୍କ ସହ ସମ୍ନାସାମ୍ନି ଜେରା ଚାଲିଛି  । 

ପୋଲିସ ଏସ୍ଆଇ ପରୀକ୍ଷା ମହାଦୁର୍ନୀତି ନିକଟ ଅତୀତରେ ନିଯୁକ୍ତିର ସବୁଠାରୁ ବଡ ଘୋଟାଲା ବୋଲି କୁହାଯାଉଛି । ଦୁର୍ନୀତିରେ ଆନ୍ତଃରାଜ୍ୟ ସଂଗଠିତ କ୍ରିମିନାଲ ଗ୍ୟାଙ୍ଗର ସଂପୃକ୍ତି  ସନ୍ଦେହରେ ଏହି ନିଷ୍ପତ୍ତି ହୋଇଥିଲା । ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ  ନିଷ୍ପତ୍ତି ପାଇଁ ମୁଖ୍ୟମନ୍ତ୍ରୀ ଏପରି ବଡ ନିଷ୍ପତ୍ତି ନେଇଥିଲେ ।  ୨୫ ଲକ୍ଷରେ ବିକ୍ରି ହେଉଥିଲା ସବ ଇନ୍ସପେକ୍ଟର ଚାକିରୀ । ଏଥିପାଇଁ କିଛି ପରୀକ୍ଷାର୍ଥୀଙ୍କ ଠାରୁ ନିଆଯାଇଥିଲା ଅଗ୍ରୀମ ଟଙ୍କା । ଏଥିପାଇଁ କିଏ ପରୀକ୍ଷାର୍ଥୀ ଯୋଗାଡ଼ କରିଥିଲେ ? କାହା ଭାଗକୁ କେତେ ଟଙ୍କା ଯାଉଥିଲା ? ଦଲାଲଙ୍କ ପଛରେ ମାଷ୍ଟରମାଇଣ୍ଡ କିଏ ? ମାଷ୍ଟରମାଇଣ୍ଡଙ୍କ ଗଡ଼ଫାଦର କିଏ ? ଏଭଳି ଅନେକ ପ୍ରଶ୍ନର ଉତ୍ତର ଖୋଜିବା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛି ସିବିଆଇ। ସମସ୍ତ ତଥ୍ୟ ପ୍ରମାଣ ଯୋଗାଡ଼ କରିବା ପରେ ମାଷ୍ଟରମାଇଣ୍ଡ କୁହାଯାଉଥିବା ଶଙ୍କର ପୃଷ୍ଟି ଓ ସିଲିକନ ଟେକ ମାଲିକ ସୁରେଶ ନାୟକଙ୍କୁ ରିମାଣ୍ଡରେ ଅଣାଯିବ ବୋଲି ସିବିଆଇ ସୂତ୍ରରୁ ଜଣାପଡ଼ିଛି।