ଆଜି ମହାନଦୀରେ ଆସିବ ମଧ୍ୟମ ଧରଣର ବନ୍ୟା , ତଳିଆ ଅଞ୍ଚଳ ପାଇଁ ସତର୍କ ସୂଚନା

ଭୁବନେଶ୍ବର: ଆଜି ମହାନଦୀରେ ଆସିବ ମଧ୍ୟମ ଧରଣର ବନ୍ୟା । ଉପରମୁଣ୍ଡରେ ଲଗାନା ବର୍ଷା ଯୋଗୁଁ ମହାନଦୀରେ ମଧ୍ୟମ ଧରଣର ବଢି ଆଶଙ୍କା ଦେଖାଦେଇଛି । ଏହାକୁ ନେଇ ତଳିଆ ଅଂଚଳକୁ ସତର୍କ ସୂଚନା ଜାରି କରାଯାଇଛି ବୋଲି ବଡ଼ ସୂଚନା ଦେଇଛନ୍ତି ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ କୁମାର ରାଉତ । ସେ କହିଛନ୍ତି ଆଜି ସନ୍ଧ୍ୟା ସୁଦ୍ଧା ମୁଣ୍ଡଳୀରେ ୮.୫ରୁ ୯ ଲକ୍ଷ କ୍ୟୁସେକ୍ ପାଣି ପହଞ୍ଚିବାର ସମ୍ଭାବନା ରହିଛି । ମହାନଦୀର ଶାଖା ତେଲନଦୀ, ଦୟାନଦୀରେ ବନ୍ୟା ଆଶଙ୍କା ଥିବାରୁ ଉପକୂଳିଆ ଲୋକ ଛାନିଆ ହୋଇପଡ଼ିଛନ୍ତି । ତେଲ ନଦୀ ଅବବାହିକା, ବଲାଙ୍ଗିର ଓ ଖଇରମାଳ କ୍ୟାଚମେଣ୍ଟ ଅଞ୍ଚଳରେ ଲଗାତାର ପ୍ରବଳ ବର୍ଷା ହେଉଛି । ବାଙ୍କୀର ଚନ୍ଦ୍ରପା ଓ ରଣ ନଦୀରେ ପାଣି ବଢୁଥିବାରୁ ତାଳବସ୍ତ ରାସ୍ତାରେ ପାଣି ଚାଲୁଛି । 

ବର୍ଷା ଯୋଗୁଁ ଉପରମୁଣ୍ଡରୁ ଆସୁଥିବା ଜଳର ପରିମାଣ ଦ୍ରୁତ ଗତିରେ ବଢ଼ୁଛି । ଏଥିଯୋଗୁଁ ମହାନଦୀ ଓ ଦୟା ନଦୀର ତଳମୁଣ୍ଡ ଅଞ୍ଚଳରେ ଛୋଟରୁ ମଧ୍ୟମ ଧରଣର ବନ୍ୟା ଦେଖାଦେଇପାରେ । ବିଶେଷକରି ନିମାପଡ଼ା, କଣାସ, ଗୋପ ଓ ଅସ୍ତରଙ୍ଗ ଭଳି ତଳିଆ ଅଞ୍ଚଳରେ ବନ୍ୟାଜଳ ପ୍ରବେଶ କରିବାର ଆଶଙ୍କା ଥିବାରୁ ଲୋକଙ୍କୁ ସତର୍କ କରାଯାଇଛି ।

ସେହିପରି ବୌଦ୍ଧ ଜିଲ୍ଲାର କଣ୍ଟାମାଲ ଅଞ୍ଚଳରେ ବର୍ଷା ଲାଗି ରହିଛି l ମହାନଦୀ ଦୁଇ କୂଳ ଖାଇ ପ୍ରଭାବିତ ହେଉଥିବାରୁ ନଦୀ ଭିତରକୁ ଯିବା ପାଇଁ ଲୋକଙ୍କୁ ଜିଲ୍ଲା ପ୍ରଶାସନ ପକ୍ଷରୁ ବାରଣ କରାଯାଇଛି ।