ଘନ କୁହୁଡି ଯୋଗୁଁ ରାଜଧାନୀରେ ବିମାନ ଉଡ଼ାଣରେ ବିଳମ୍ବ

ଭୁବନେଶ୍ୱର : ନୂଆ ବର୍ଷ ଆରମ୍ଭରୁ ଘନ କୁହୁଡିରେ ଆଚ୍ଛାଦିତ ହୋଇ ରହିଛି ରାଜଧାନୀ ଭୁବନେଶ୍ୱର । ସକାଳ ୫ଟାରୁ ୭ଟା  ମଧ୍ୟରେ ହଠାତ୍‌ କୁହୁଡ଼ି ଏତେ ମାତ୍ରାରେ ବଢିଯାଇଥିଲା ଯେ ଚାଳକଙ୍କ ପାଇଁ ଗାଡି ଆଗକୁ ବଢାଇବା କଷ୍ଟସାଧ୍ୟ ହୋଇଥିଲା ।  ସକାଳ ୮ଟା ପର୍ଯ୍ୟନ୍ତ ମଧ୍ୟ ଅନେକ ସ୍ଥାନରେ ଦୃଶ୍ୟମାନ ଦୂରତା ୫୦ ମିଟରରୁ କମ୍ ରହିଥିଲା। ସକାଳ ୧୦ ଟା ମଧ୍ୟରେ ବି ମାତ୍ର କେଇ ମିଟର ଦୂରରେ ମଧ୍ୟ ଦିଶୁନାହିଁ ମୁହଁ I ଗାଡି ମୋଟର ଚଳାଚଳ ସହିତ  ବିମାନ ସେବା ମଧ୍ୟ ପ୍ରଭାବିତ ହୋଇଛି । ଘନ କୁହୁଡି ଯୋଗୁଁ ୬ ଟି ବିମାନର ଗତିପଥ ପରିବର୍ତ୍ତନ ହୋଇଛି । ୩ଟି ରାୟପୁରକୁ ଏବଂ ୨ଟି କଲିକତାକୁ ପରିବର୍ତ୍ତନ କରାଯାଇଛି । ସେଥିମଧ୍ୟରୁ ୩ଟି ବିମାନ ଦିଲ୍ଲୀରୁ ଆସୁଥିବା ବେଳେ ଗୋଟିଏ ଚେନ୍ନାଇ ଏବଂ ଗୋଟିଏ ବେଙ୍ଗାଲୁରୁରୁ ଆସୁଥିଲା । ସକାଳ ସାଢ଼େ ୬ଟା ବେଳେ ରନ୍ଓ୍ବେରେ ଦୃଶ୍ୟମାନ ୫୦ମିଟର ଥିଲା ସେଥିପାଇଁ ବିମାନ ଉଡିପାରିନଥିଲା । ଏନେଇ ସୂଚନା ଦେଇଛନ୍ତି ବିମାନ ବନ୍ଦର କର୍ତୃପକ୍ଷ I

ନୂଆଦିଲ୍ଲୀ,ଗୁଆହାଟି,ଚେନ୍ନଇ,ପ୍ରୟାଗରାଜ ଓ ହାଇଦ୍ରାବାଦ ବିମାନ ବିଳମ୍ବରେ ଉଡାଣ ଭରିବ । ଅତି କମ୍‌ରେ ଦୃଶ୍ୟମାନ ୫୫୦ମିଟର ରହିଲେ ବିମାନ ଉଡ଼ାଣ ହୋଇଥାଏ । ସିଜିନର ଦ୍ଵିତୀୟ ଦିନ ଯେଉଁଦିନ ଘନ କୁହୁଡ଼ି ପାଇଁ ବିମାନସେବା ବାଧାପ୍ରାପ୍ତ ହୋଇଛି । ଭୁବନେଶ୍ୱରରୁ ଡେରାଡୁନ ସକାଳ ୬ଟାରେ ଥିବା ବିମାନ ଦିନ ୧୦ଟାରେ ଯାଇଛି । ସେହିପରି ଜୟପୁର ଉତକେଲା ବିମାନ ମଧ୍ୟ ବିଳମ୍ବରେ ଉଡାଣ ଭରିଛି । ପ୍ରୋଟୋକଲ୍ ଅନୁସାରେ ଯାତ୍ରୀଙ୍କ ସୁବିଧା ପାଇଁ ସମସ୍ତ ବ୍ୟବସ୍ଥା କରାଯାଇଛି । ଆଗକୁ କୁହୁଡ଼ି ଜାରି ରହିବ । ତେଣୁ ଘରୁ ବାହାରିବା ଆଗରୁ ବିମାନ ସମୟ ଯାଞ୍ଚ କରିବାକୁ ଅନୁରୋଧ କରିଛନ୍ତି ଭୁବନେଶ୍ୱର ବିମାନବନ୍ଦର ନିର୍ଦ୍ଦେଶକ ପ୍ରସନ୍ନ ପ୍ରଧାନ । ଆଜି ସକାଳେ ମାତ୍ର ଗୋଟିଏ ବିମାନ ଉଡାଣ ଭରିଥିବାବେଳେ ରନୱେରେ ଅଟକିଛି ଏକାଧିକ ବିମାନ ।