ଉଡ଼ାଣରେ ବିଳମ୍ବ ଯୋଗୁଁ ଭୁବନେଶ୍ୱର ବିମାନ ବନ୍ଦରରେ ଉତ୍ତେଜନା

ଭୁବନେଶ୍ୱର : ଭୁବନେଶ୍ୱର ବିମାନ ବନ୍ଦରରେ ହଟ୍ଟଗୋଳ । ଇଣ୍ଡିଗୋ ବିମାନ ଉଡ଼ାଣରେ ବିଳମ୍ବକୁ ନେଇ ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ଯାତ୍ରୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ୭୦୦ରୁ ଅଧିକ ଯାତ୍ରୀଙ୍କ ମଧ୍ୟରେ  ଅସନ୍ତୋଷ ଦେଖିବାକୁ ମିଳିଛି । ଗତ ରାତି ୯ଟାରୁ ୧୧ଟା ଭିତରେ ବିମାନ ଉଡ଼ାଣ ଭରିବାର ଥିବା ବେଳେ ସୂଚନା ନଦେଇ ବାତିଲ ହୋଇଥିଲା ବିମାନ। 

ସୂଚନା ଅନୁଯାୟୀ, ମଙ୍ଗଳବାର ରାତି ୯ଟାରୁ ୧୧ଟା ମଧ୍ୟରେ ଇଣ୍ଡିଗୋ ବିମାନଟି ଭୁବନେଶ୍ୱରରୁ ବାଙ୍ଗାଲୋର, ଦିଲ୍ଲୀ ଓ ମୁମ୍ବାଇ ଯାଇଥାନ୍ତା । ହେଲେ ଯାତ୍ରୀମାନଙ୍କୁ ନଜଣାଇ କିମ୍ବା କୌଣସି ପ୍ରକାର ସୂଚନା ନଦେଇ ଫ୍ଲାଇଟ୍ କ୍ୟାନ୍ସଲ ହୋଇଥିଲା । ବୁଧବାର ସକାଳୁ ଆଉଥରେ ସିକ୍ୟୁରିଟି ଚେକ୍ ଇନ୍ ସହ ବୋଡିଂ ପାସ୍ ଧରାଇ ଦେଲେ । ହେଲେ ଦିନ ୧୧ ଟା ସୁଦ୍ଧା ବିମାନ ଉଡାଣ ନକରିବାରୁ ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ତୀବ୍ର ହୋଇ ଏୟାରପୋର୍ଟରେ ହୋହାଲ୍ଲା ଓ ପାଟିତୁଣ୍ଡ କରିଥିଲେ । ପ୍ରାୟ ୭୦୦ରୁ ଅଧିକ ଯାତ୍ରୀ ବିମାନବନ୍ଦରରେ ଅସନ୍ତୋଷ ପ୍ରକାଶ କରୁଥିବାର ଦେଖିବାକୁ ମିଳିଛି । ସେପଟେ ବିମାନବନ୍ଦର କର୍ତ୍ତୃପକ୍ଷ ଉତ୍ୟକ୍ତ ଲୋକଙ୍କୁ ବୁଝାସୁଝା କରୁଥିବାବେଳେ ବିମାନ ଉଡ଼ାଣରେ ବିଳମ୍ବକୁ ନେଇ କୌଣସି ସଠିକ ତଥ୍ୟ ଦେଇ ନଥିବା ସୂଚନା ମିଳିଛି । ତେବେ ଖରାପ ପାଗ ଯୋଗୁଁ ବିମାନ ଉଡ଼ାଣରେ ବିଳମ୍ବ ହେଉଥିବା କୁହାଯାଉଛି ।