୨୫ ଯାତ୍ରୀଙ୍କ ଜୀବନ ବଞ୍ଚାଇ ହୃଦଘାତରେ ଚାଲିଗଲେ ଡ୍ରାଇଭର

ଜଣେ ଡ୍ରାଇଭରଙ୍କ ମହାନତା ଯୋଗୁଁ ଆଜି ବଡ଼ ଦୁର୍ଘଟଣାରୁ ବର୍ତ୍ତିଯାଇଛନ୍ତି ୨୫ ଯାତ୍ରୀ

By: Samaya Live News

ମାଲକାନଗିରି : ଡ୍ରାଇଭରଙ୍କ ମହାନତା । ଚଳନ୍ତା ବସରେ ନିଜେ ହୃଦଘାତରେ ଶିକାର ହୋଇଥିବାବେଳେ ବଞ୍ଚାଇଦେଲେ ୨୫ ଯାତ୍ରୀଙ୍କ ଜୀବନ । ଆଜି ସକାଳେ ରାଜ୍ୟ ସଡକ ପରିବହନ ନିଗମର ଏକ ବସ ବିଜୟନଗରମରୁ ମାଲକାନଗିରି ଆସୁଥିବାବେଳେ ଡ୍ରାଇଭର ପି, ସାଇକୃଷ୍ଣଙ୍କୁ ହୃଦଘାତ ହୋଇଥିଲା । କୁନ୍ଦୁଲି ନିକଟରେ ଛାତିରେ ଯନ୍ତ୍ରଣା ହେବାରୁ ରାସ୍ତା କଡରେ ବସଟିକୁ ସାଇଡ୍ କରିଦେଇଥିଲେ ।

ଏହାପରେ ଆମ୍ବୁଲାନ୍ସକୁ ଖବର ଦିଆଯାଇଥିଲା । ମାତ୍ର ଆମ୍ବୁଲାନ୍ସ ପହଂଚିବାକୁ ବିଳମ୍ବ ହେବାରୁ ତାଙ୍କୁ ବସର ଅନ୍ୟ କର୍ମଚାରୀମାନେ ଏକ ଅଟୋ ଯୋଗେ କୋରାପୁଟ ମେଡିକାଲରେ ଭର୍ତ୍ତି କରିଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ବସରେ ୨୫ ଜଣ ଯାତ୍ରୀ ଥିଲେ । ଡ୍ରାଇଭରଙ୍କ ଘର ମାଲକାନଗିରିରେ ବୋଲି ସୂଚନା ମିଳିଛି । ଏଭଳି ଏକ ଦୁଃଖଦ ଘଟଣାରେ ସମଗ୍ର ଅଞ୍ଚଳରେ ଶୋକର ଛାୟା ଖେଳି ଯାଇଛି ।

ସେହିଭଳି କିଛି ଦିନ ପୂର୍ବରୁ ବୋଲଗଡ଼ରୁ ଭୁବନେଶ୍ୱର ଅଭିମୁଖେ ଆସୁଥିବାବେଳେ ଅନ୍ଵେଷା ନାମକ ଏକ ଘରୋଇ ବସର ଡ୍ରାଇଭର ଚଳନ୍ତା ଗାଡ଼ିରେ ହୃଦଘାତର ଶିକାର ହୋଇଥିଲେ I ଏହାପରେ ବସଟିକୁ ରାସ୍ତା କଡରେ ସାଇଡ କରି ଷ୍ଟିଅରିଂ ଉପରକୁ ଆଉଜି ପଡ଼ିଥିଲେ । ଏହି ସମୟରେ ବସରେ ୪୦ରୁ ଉର୍ଦ୍ଧ୍ବ ଯାତ୍ରୀ ଥିଲେ ।