ମନ୍ତ୍ରିମଣ୍ଡଳ ସଂପ୍ରସାରଣ ଖବର ସମ୍ପୂର୍ଣ୍ଣ 'ଅମୂଳକ-ଆଧାରହୀନ' : ମନମୋହନ

ଭୁବନେଶ୍ୱର: ରାଜ୍ୟରେ ମନ୍ତ୍ରିମଣ୍ଡଳ ସଂପ୍ରସାରଣ ଏବଂ ଅଦଳବଦଳକୁ ନେଇ ଚାଲିଥିବା ଚର୍ଚ୍ଚାରେ ପୂର୍ଣ୍ଣଛେଦ ପକାଇଛନ୍ତି ବିଜେପି ରାଜ୍ୟ ସଭାପତି ଶ୍ରୀ ମନମୋହନ ସାମଲ । ରବିବାର ଏକ ପ୍ରେସ୍ ବିବୃତି ଜାରି କରି ସେ କହିଛନ୍ତି ଯେ, କିଛି ଗଣମାଧ୍ୟମରେ ପ୍ରକାଶିତ ଏହି ଖବର ସଂପୂର୍ଣ୍ଣ 'ଅମୂଳକ ଏବଂ ଆଧାରହୀନ'।

ସେ କହିଛନ୍ତି ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ରାଜ୍ୟରେ ବିଜେପି ସରକାର ୨ ବର୍ଷ ପୂର୍ତ୍ତି ହେବାକୁ ଯାଉଛି । ସଂକଳ୍ପ ପତ୍ରରେ ଦିଆଯାଇଥିବା ପ୍ରତିଶୃତି ମଧ୍ୟରୁ ଅଧିକାଂଶ ପୂରଣ ହୋଇସାରିଛି । ଏହା ମଧ୍ୟରେ ଦଳର ରାଜ୍ୟ ପଦାଧିକାରୀ, ରାଜ୍ୟ କାର୍ଯ୍ୟକାରିଣୀ ସଦସ୍ୟ, ବିଭିନ୍ନ ମୋର୍ଚ୍ଚା ପଦାଧିକାରିଙ୍କ ନାମ ତାଲିକା ଘୋଷଣା ସରିଛି । ବହୁ ଶୀଘ୍ର ଖାଲି ରହିଥିବା ଦଳୀୟ ପଦପଦବୀର ଅନ୍ୟ ନାମ ତାଲିକା ବି ଘୋଷଣା କରାଯିବ । ମାତ୍ର ମନ୍ତ୍ରିମଣ୍ଡଳ ସଂପ୍ରସାରଣ ଓ ଅଦଳବଦଳକୁ ନେଇ କିଛି ଗଣମାଧ୍ୟମ ଯେଉଁ ଭଳି ଭାବରେ ବିଭ୍ରାନ୍ତକାରୀ ଏବଂ କପୋଳକଳ୍ପିତ ସମ୍ବାଦ ପ୍ରସାରଣ କରିଛନ୍ତି, ତାହା ସଂପୂର୍ଣ୍ଣ ଅମୁଳକ ଏବଂ ଆଧାରହୀନ । 

ଏହି ବକ୍ତବ୍ୟ ପରେ ଏବେ ରାଜ୍ୟ ରାଜନୀତିରେ ଗୋଟିଏ କଥା ସ୍ପଷ୍ଟ ହୋଇଛି ଯେ, ସରକାର ବର୍ତ୍ତମାନ କୌଣସି ଅଦଳବଦଳ କରିବା ଅପେକ୍ଷା ସଂଗଠନ ଏବଂ ଲୋକଙ୍କ ପାଖକୁ ଯିବା ଉପରେ ଅଧିକ ଗୁରୁତ୍ୱ ଦେଉଛନ୍ତି। ବିଶେଷ କରି ପଞ୍ଚାୟତ ନିର୍ବାଚନ ପୂର୍ବରୁ ଦଳ ଭିତରେ କୌଣସି ଅସନ୍ତୋଷ ସୃଷ୍ଟି ନକରିବା ପାଇଁ ହାଇକମାଣ୍ଡ ଏବଂ ରାଜ୍ୟ ନେତୃତ୍ୱ ସତର୍କ ଅଛନ୍ତି।