ସ୍କୁଲ ନିକଟରେ ବୋମାମାଡ଼

ଭୁବନେଶ୍ୱର : ବୋମା ମାଡ଼ରେ ଥରହର ସ୍କୁଲ ପରିସର l ଭୁବନେଶ୍ୱର ରେଲ୍ୱେ କଲୋନୀ ଅଞ୍ଚଳରେ ଥିବା କେନ୍ଦ୍ରୀୟ ବିଦ୍ୟାଳୟ - ୩ ର ମୁଖ୍ୟ ଫାଟକ ସାମ୍ନାରେ ବୋମା ମାଡ଼ ଘଟିଛି l ଏହି ସମୟରେ ସ୍କୁଲ ଚାଲୁଥିବାରୁ ପିଲାମାନେ କ୍ଲାସ ଭିତରେ ଥିଲେ l ଏଥିରେ କୌଣସି କ୍ଷୟ କ୍ଷତି ଘଟି ନଥିବାବେଳେ ଛାତ୍ରଛାତ୍ରୀଙ୍କ ସହ ଅଭିଭାବକ ମାନେ ଭୟଭୀତ ଅଛନ୍ତି l ବୋମାମାଡରେ ସ୍କୁଲ ଫାଟକ ଏବଂ ପାଚେରୀ କାନ୍ଥରେ ଫାଟ ସୃଷ୍ଟି ହୋଇଛି l ବୋମା ବିସ୍ଫୋରଣ ପରେ ରାସ୍ତାରେ କଣ୍ଟା ଗୁଡିକ ଏଣେତେଣେ ବିଛାଇ ହୋଇ ପଡି ରହିଛି l ପ୍ରାୟ ୧୦ ମିନିଟ ଧରି ସ୍ଥାନୀୟ ଅଞ୍ଚଳରେ ଧୁଆଁମୟ ହୋଇ ରହିଥିଲା l ତେବେ କିଏ କାହିଁକି ଏହି ବୋମା ମାଡ଼ କରିଛି ଏହାର ସଠିକ କାରଣ ଜଣା ପଡ଼ିନାହିଁ l ଘଟଣାସ୍ଥଳରେ କମିଶନରେଟ ପୋଲିସ ପହଞ୍ଚି ତଦନ୍ତ ଜାରି ରଖିଛି  l ଘଟଣାସ୍ଥଳରେ ପହଁଚିଲା ଏନଆଇଏ ଟିମ । ସିସିଟିଭି ଫୁଟେଜ ଆଧାରରେ ତଦନ୍ତ ଜାରି ରହିଛି । ବିସ୍ଫୋରଣରେ ବ୍ୟବହୃତ ସାମଗ୍ରୀ ଗୁଡିକୁ ସଂଗ୍ରହ କରି ତଦନ୍ତ ଜାରି ରହିଛି । ଏହି ସ୍କୁଲରେ ପାଖାପାଖି ୧୫ ଶହରୁ ଅଧିକ ପିଲା ପଢୁଛନ୍ତି I ପିଲାମାନେ ସ୍କୁଲ ପ୍ରବେଶ କରିବାର ୧୫ ମିନିଟ ପରେ ଏହି ଘଟଣା ଘଟିଥିଲା । 

ଅନ୍ୟପଟେ ସ୍କୁଲ ସାମ୍ନାରେ ବୋମାମାଡ଼ ଘଟଣାକୁ ଆଜି ବିଧାନ ସଭାରେ ଉଠାଇଛନ୍ତି ବିରୋଧୀ ଦଳ ଉପ ମୁଖ୍ୟ ସଚେତକ ପ୍ରତାପ ଦେବ   । ଏହି ଘଟଣାର ସତ୍ୟାସତ୍ୟ ଜଣାଇବାକୁ ଦାବି କରିଛନ୍ତି। ଏହାର ଉତ୍ତରରେ ବାଚସ୍ପତି କହିଛନ୍ତି ଯେ ଏହି ଘଟଣା ସମ୍ପର୍କରେ ଗଣଶିକ୍ଷା ମନ୍ତ୍ରୀ ତଥ୍ୟ ସଂଗ୍ରହ କରି ଗୃହକୁ ଅବଗତ କରାଇବେ।