ଜାତିଆଣ ବାସନ୍ଦ ଘଟଣାରେ ୯ ଜଣଙ୍କ ନାଁ ରେ ଥାନାରେ ଏତଲା

ଛତ୍ରପୁର : ସଭ୍ୟ ସମାଜରେ ହଟୁନାହିଁ ଜାତିଆଣ ବାସନ୍ଦ । ଅତିରିକ୍ତ ତହସିଲଦାରଙ୍କୁ ସମାଜିକ ବାସନ୍ଦ ଘଟଣା ରେ ୯ ଜଣଙ୍କ ନାଁରେ ଥାନାରେ ମାମଲା ରୁଜୁ  । ଅନ୍ୟଜାତିରେ ବିବାହ କରିବାରୁ ଆସିକାର ଅତିରିକ୍ତ ତହସିଲଦାର ସୌଦାଗର ବେହେରାଙ୍କୁ କୈବର୍ତ୍ତ କୁଳ ସମାଜରୁ ବାସନ୍ଦ କରାଯାଇଥିଲା  । ଏନେଇ ସୌଦାଗରଙ୍କ ପିତା ବିଜୟ ବେହେରା ଛତ୍ରପୁର ଥାନାରେ ଏତଲା ଦେଇଛନ୍ତି । ବିଜୟ ବେହେରାଙ୍କ ଅଭିଯୋଗ କ୍ରମେ କୈବର୍ତ୍ତ କୁଳ ସମାଜର ୯ ଜଣଙ୍କ ନାମରେ ମାମଲା ରୁଜୁ ହୋଇଛି  ।

ଘଟନାନୁସାରେ,ଅତିରିକ୍ତ ତହସିଲଦାର ସୌଦାଗରଙ୍କ ଘର ଛତ୍ରପୁର ଥାନା ଅଧୀନ ମୁନିଷିପେଣ୍ଠରେ । ସେ ଗତ ଫେବୃଆରୀରେ ଅନ୍ୟ ଜାତିରେ ବିବାହ କରିଥିଲେ । ତାଙ୍କ ପିତା ଏ ସମ୍ପର୍କରେ କୈବର୍ତ୍ତ କୁଳ ସମାଜକୁ ଜଣାଇଥିଲେ । କିନ୍ତୁ କୈବର୍ତ୍ତ କୁଳ ଅତିରିକ୍ତ ତହସିଲଦାରଙ୍କ ପରିବାରକୁ ବାସନ୍ଦ କରାଯାଇଥିବା ଜଣାଇଥିଲେ ।  ପୁଅ ସହିତ ରହିବ, ନା’ ଅଲଗା ରହିବ ବୋଲି କୁଳ ସମାଜ ପକ୍ଷରୁ ତାଙ୍କ ବାପାକୁ ପଚରା ଯାଇଥିଲା। ପୁଅ ସହିତ ରହିବାକୁ ବାପା ବିଜୟ ଜଣାଇବାରୁ ଏହା ଉପରେ କୁଳ ବିଚାର କରିବ ବୋଲି ସେ ସମୟରେ କୁହାଯାଇଥିଲା । ତେବେ ନଭେମ୍ବର ୨୩ରେ ଗାଁରେ ଏକ ବିବାହ ଭୋଜିକୁ ବିଜୟ ବେହେରା ଯାଇଥିବାବେଳେ ସେଠାରେ ତାଙ୍କୁ ଅପମାନିତ କରି ତଡି ଦିଆଯାଇଥିଲା । ଏହି ଘଟଣା ପରେ ବିଜୟ ୯ ଜଣଙ୍କ ନାଁ ରେ ଥାନାରେ ଲିଖିତ ଅଭିଯୋଗ କରିଛନ୍ତି ।