ଖରାଛୁଟିରେ “ସମର ଲର୍ଣ୍ଣିଂ” ଶିକ୍ଷାଦାନ
ଭୁବନେଶ୍ୱର : ଏଥର ଖରାଛୁଟିରେ ବି ହେବ ପାଠପଢା । ଘରେ ରହି ପାଠ ପଢିବେ ଛାତ୍ରଛାତ୍ରୀ । ଶିଶୁବାଟିକା ଠାରୁ ୮ମ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ଖରା ଛୁଟି ସମୟରେ ପିଲାଙ୍କୁ ହ୍ବାଟ୍ସଆପ୍ ମାଧ୍ୟମରେ “ସମର ଲର୍ଣ୍ଣିଂ” ଶିକ୍ଷାଦାନ ଚାଲିବ । ଛୁଟି ସମୟରେ ପାଠପଢ଼ାରୁ ନଦୁରେଇବା ପାଇଁ ନୂଆ ବ୍ୟବସ୍ଥା କରିଛି ଓଡ଼ିଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ । ବାପା -ମା'ଙ୍କ ହ୍ବାଟ୍ସଆପ୍ କୁ ଏନେଇ ସିଧାସଳଖ ଯୋଗାଯୋଗ କରାଯିବ ।
ସବୁ ବିଦ୍ୟାଳୟରେ ଶ୍ରେଣୀଭିତ୍ତିକ ଅଭିଭାବକ ହ୍ବାଟସଆପ୍ ଗ୍ରୁପ୍ ଖୋଲାଯିବ । ଏନେଇ ଓସେପା ପକ୍ଷରୁ ଚିଠି ଜାରି ହୋଇଛି । ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ୨୫ ତାରିଖ ସୁଦ୍ଧା ହ୍ବାଟ୍ସଆପ୍ ଗ୍ରୁପ୍ ଗଠନ କରିବାକୁ ନିର୍ଦ୍ଦେଶ ଦିଆଯାଇଛି ।
ଏହି ପଦକ୍ଷେପରେ ଡିଜିଟାଲ ଶିକ୍ଷାକୁ ସୁଦୃଢ କରିବା ସହ ଅଭିଭାବକଙ୍କ ଭୂମିକାକୁ ବଢାଇବା ଲକ୍ଷ୍ୟ ରହିଛି। ଶିକ୍ଷକମାନେ ଅଭିଭାବକଙ୍କ ସହ ସମନ୍ୱୟ କରି ପିଲାମାନଙ୍କ ଆସାଇନମେଣ୍ଟ ସମାପ୍ତ କରାଇବେ। ଏହି ଯୋଜନାର ଖର୍ଚ୍ଚ ସମଗ୍ର ଶିକ୍ଷା ଯୋଜନାର କମ୍ପୋଜିଟ୍ ଗ୍ରାଣ୍ଟରୁ ବ୍ୟୟ ହେବ। ଶିକ୍ଷା ବିଭାଗ ଅନୁସାରେ, ଏହା ଓଡ଼ିଶାରେ ନୂତନ ଶିକ୍ଷା ପଦ୍ଧତିକୁ ଆଗକୁ ନେବା ସହ ଛୁଟି ସମୟରେ ଶିକ୍ଷାର ଅଭାବକୁ ପୂରଣ କରିବ।
