ସବୁଠାରୁ ପ୍ରଦୂଷିତ ସହର ଗାଜିଆବାଦ

ନୂଆଦିଲ୍ଲୀ: ୨୦୨୫ ନଭେମ୍ବର ୧୬ ତାରିଖ ଗାଜିଆବାଦ ପାଇଁ ପ୍ରଥମ ‘ସାଂଘାତିକ’ ଏକ୍ୟୁଆଇର ଦିନ ଥିଲା। ସହରରେ ଶେଷ ଥର ପାଇଁ ଡିସେମ୍ବର ୧୭, ୨୦୨୪ରେ ଏପରି ବାୟୁ ଗୁଣବତ୍ତା ରେକର୍ଡ କରାଯାଇଥିଲା, ଯେତେବେଳେ ଏକ୍ୟୁଆଇ ୪୦୩ ଛୁଇଁଥିଲା। କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ଦ୍ୱାରା ଅପରାହ୍ଣ ୪ଟାରେ ପ୍ରକାଶିତ ଦୈନିକ ବୁଲେଟିନ୍ ଅନୁଯାୟୀ, ସୋମବାର ଗାଜିଆବାଦ ‘ସାଂଘାତିକ’ ବର୍ଗରେ ରହିଛି ଏବଂ ଦେଶର ସବୁଠାରୁ ପ୍ରଦୂଷିତ ସହରରେ ପରିଣତ ହୋଇଛି। ରବିବାର ସହରର ଏକ୍ୟୁଆଇ ୪୧୯ ଥିବାବେଳେ କ୍ରମାଗତ ଦ୍ୱିତୀୟ ଦିନ ପାଇଁ ସୋମବାର ୪୦୧ ଏକ୍ୟୁଆଇ ସହ ଏହା ଗମ୍ଭୀର ବର୍ଗରେ ଥିଲା। ସିପିସିବି ତଥ୍ୟରୁ ଜଣାପଡିଛି ଯେ ସୋମବାର ଇନ୍ଦିରାପୁରମ୍, ଲୋନି ଓ ସଞ୍ଜୟ ନଗରରେ ଥିବା ଚାରୋଟି ମନିଟରିଂ ଷ୍ଟେସନ୍ ମଧ୍ୟରୁ ତିନିଟିରେ ସନ୍ଧ୍ୟା ସୁଦ୍ଧା ଏକ୍ୟୁଆଇ ସ୍ତର ଯଥାକ୍ରମେ ୩୬୫, ୪୧୪ ଓ ୪୩୩ ରେକର୍ଡ କରାଯାଇଥିଲା। ଯାନ୍ତ୍ରିକ ସମସ୍ୟା ହେତୁ ବସୁନ୍ଧରା ଷ୍ଟେସନର ଆକଳନ ଉପଲବ୍ଧ ନ ଥିଲା। ଉତ୍ତରପ୍ରଦେଶ ପ୍ରଦୂଷଣ ନିୟନ୍ତ୍ରଣ ବୋର୍ଡ (ୟୁପିପିସିବି) ଦ୍ୱାରା ପରିଚାଳିତ ଇନ୍ଦିରାପୁରମ୍ ମନିଟରିଂ ଷ୍ଟେସନ୍ ସୋମବାର କ୍ରମାଗତ ଭାବରେ ଉଚ୍ଚ ପ୍ରଦୂଷଣ ସ୍ତର ରିପୋର୍ଟ କରିଛି। ପିଏମ୍‌୨.୫ ସାନ୍ଦ୍ରତା ହାରାହାରି ୩୬୬ ମାଇକ୍ରୋଗ୍ରାମ୍ ପ୍ରତି ଘନ ମିଟର ଥିଲା, ରାତି ୮ଟା ସମୟରେ ସର୍ବାଧିକ ୪୨୩ ଛୁଇଁଥିଲା। ପିଏମ୍୧୦ ସ୍ତର ସମାନ ଧାରା ଅନୁସରଣ କରିଥିଲା, ଯାହା ହାରାହାରି ୩୬୭ ଓ ସର୍ବୋଚ୍ଚ ୪୫୨ ଥିଲା। ନାଇଟ୍ରୋଜେନ୍ ଡାଇଅକ୍ସାଇଡ୍ ସ୍ତର ମଧ୍ୟ ହାରାହାରି ୯୨ ଓ ସର୍ବାଧିକ ୧୫୭ ସହିତ ବୃଦ୍ଧି ପାଇଥିଲା। ଗାଜିଆବାଦସ୍ଥିତ ଉତ୍ତରପ୍ରଦେଶ ପ୍ରଦୂଷଣ ନିୟନ୍ତ୍ରଣ ବୋର୍ଡ (ୟୁପିପିସିବି)ର ଆଞ୍ଚଳିକ ଅଧିକାରୀ ଅଙ୍କିତ କୁମାର କହିଛନ୍ତି ଯେ, ବସୁନ୍ଧରା ଷ୍ଟେସନ ଦୁଇ ଦିନ ଧରି ଅଚଳ ଥିଲା। ବର୍ତ୍ତମାନ ଏହାର ମରାମତି କରାଯାଇଛି ଏବଂ ସୋମବାର ଅପରାହ୍ଣରୁ ଏହା କାର୍ଯ୍ୟ ଆରମ୍ଭ କରିଛି।