୨ ମାସର ବ୍ୟବଧାନ ପରେ ବିଜୟଙ୍କ ପ୍ରଚାର ଆରମ୍ଭ

By: Samaya Live Desk

ଚେନ୍ନାଇ: ତାମିଲନାଡ଼ୁରେ ଟିଭିକେ ମୁଖ୍ୟ ତଥା ଅଭିନେତା ବିଜୟ ପାଖାପାଖି ଦୁଇ ମାସ ପରେ ରବିବାର ଦିନ ପ୍ରଚାର ଆରମ୍ଭ କରିଛନ୍ତି। ସେପ୍ଟେମ୍ବର ୨୭ରେ କରୁର୍‌ରେ ବିଜୟଙ୍କ କାର୍ଯ୍ୟକ୍ରମରେ ଦଳାଚକଟା ପରେ ପ୍ରଥମ ଥର ଆଜି ସେ ଦଳୀୟ କର୍ମୀଙ୍କୁ ସମ୍ବୋଧିତ କରିଛନ୍ତି। ୨୦୨୬ରେ ହେବାକୁ ଥିବା ତାମିଲନାଡ଼ୁ ବିଧାନସଭା ନିର୍ବାଚନରେ ଟିଭିକେ ପ୍ରଥମ ଥର ନିର୍ବାଚନ ଲଢ଼ିବାକୁ ଯାଉଛି। ଏଥିପାଇଁ ରବିବାରଠାରୁ ପୁଣି ଥରେ ବିଜୟ ତାଙ୍କ ପ୍ରଚାର ଅଭିଯାନ ଆରମ୍ଭ କରିଛନ୍ତି। କାଞ୍ଚିପୁରମ ଜିଲ୍ଲା ସୁଙ୍ଗୁଭରଚତ୍ତିରମ୍‌ଠାରେ ଏକ ଇନଡୋର ଅଡିଟରିୟମରେ ଦଳୀୟ କର୍ମୀ, ସମର୍ଥକ ଓ ସ୍ଥାନୀୟ ଲୋକଙ୍କୁ ସମ୍ବୋଧିତ କରି ବିଜୟ ଶାସକ ଡିଏମ୍‌କେ ରାଜ୍ୟରେ ବ୍ୟାପକ ଲୁଟ୍‌ ଓ ପରିବାରବାଦ ଚଳାଇଥିବା ଅଭିଯୋଗ କରିଛନ୍ତି। ତାଙ୍କ ଦଳର ବିଚାରାଧାର ଉପରେ ଡିଏମ୍‌କେ ଯେଉଁ ପ୍ରଶ୍ନବାଚୀ ସୃଷ୍ଟି କରୁଛି ବିଜୟ ତାକୁ ସମାଲୋଚନା କରିଥିଲେ। ସେ କହିଥିଲେ, ସମାନତା ତାଙ୍କ ଦଳର ମୂଳମନ୍ତ୍ର ଓ ଜାତିଗତ ଜନଗଣନାକୁ ସେ ସମର୍ଥନ କରୁଥିବା କହିଛନ୍ତି। ନିଟ୍‌ ନେଇ ରାଜ୍ୟ ସରକାରଙ୍କ ଆଭିମୁଖ୍ୟ ଉପରେ ମଧ୍ୟ ସେ ପ୍ରଶ୍ନ ଉଠାଇଥିଲେ।