ମହଙ୍ଗା ହେଲା ରେଳ ଯାତ୍ରା,ଆଜି ଠାରୁ ଲାଗୁହେଲା ବର୍ଦ୍ଧିତ ଭଡା

ନୂଆଦିଲ୍ଲୀ :  ଆଜି ଠାରୁ ମହଙ୍ଗା ହେଲା ରେଳ ଯାତ୍ରା । ଗତ ୬ ମାସ ମଧ୍ୟରେ ୨ୟ ଥର ପାଇଁ ଭଡା ବୃଦ୍ଧି କରିଛି ରେଳ ମନ୍ତ୍ରଣାଳୟ । ଯାତ୍ରୀଙ୍କ ପାଇଁ ବର୍ଦ୍ଧିତ ଭଡା ଆଜିଠାରୁ ଲାଗୁ ହୋଇଛି । ଏନେଇ ଗୁରୁବାର ଦିନ, ମନ୍ତ୍ରଣାଳୟ ଏକ ବିଜ୍ଞପ୍ତି ଜାରି କରିଛି । ୨୧୫ କିଲୋମିଟରରୁ ଅଧିକ ଯାତ୍ରା ପାଇଁ ସାଧାରଣ ଶ୍ରେଣୀର ଟିକେଟର ମୂଲ୍ୟ ପ୍ରତି କିଲୋମିଟରରେ ୧ ପଇସା ଏବଂ ସମସ୍ତ ଟ୍ରେନର ଏକ୍ସପ୍ରେସ ଟ୍ରେନର ଅଣ-ଏସି ଶ୍ରେଣୀ ଏବଂ ଏୟାରକଣ୍ଡିସନଡ୍ (ଏସି) ଶ୍ରେଣୀ ପାଇଁ ପ୍ରତି କିଲୋମିଟରରେ ୨ ପଇସା ବୃଦ୍ଧି କରିଛି ।

ମନ୍ତ୍ରଣାଳୟ ଡିସେମ୍ବର ୨୧ ରେ ଘୋଷଣା କରିଥିଲା ଯେ ଡିସେମ୍ବର ୨୬ (ଆଜି) ଠାରୁ ଯାତ୍ରୀ ଭଡା ବୃଦ୍ଧି କରାଯିବ। ଏହାପୂର୍ବରୁ ଜୁଲାଇ ମାସରେ ରେଳ ଭଡ଼ା ବୃଦ୍ଧି କରାଯାଇଥିଲା  । ଦିଲ୍ଲୀ-ହାଓଡ଼ା ଏବଂ ଦିଲ୍ଲୀ-ମୁମ୍ବାଇ ଭଳି ବ୍ୟସ୍ତବହୁଳ ରୁଟରେ ମଧ୍ୟ ସଂଶୋଧିତ ଭଡ଼ା ଲାଗୁ ହେବ । ତେବେ ରେଳ ଭଡ଼ା ବୃଦ୍ଧି ଯୋଗୁଁ ଲକ୍ଷାଧିକ ଯାତ୍ରୀ ପ୍ରଭାବିତ ହେବେ । 

ବର୍ତ୍ତମାନ ବର୍ଦ୍ଧିତ ଭଡ଼ାରୁ ରେଳବାଇକୁ ପ୍ରାୟ ୬୦୦ କୋଟି ଟଙ୍କାର ଅତିରିକ୍ତ ରାଜସ୍ୱ ମିଳିବ ବୋଲି ଆଶା କରାଯାଉଛି ।  ସବ୍-ଅର୍ବାନ୍ ସେବା ଓ ମାସିକ ଟିକଟରେ କୌଣସି ପରିବର୍ତ୍ତନ ହୋଇନାହିଁ । ଏହି ନିଷ୍ପତ୍ତି ରେଳ ସେବାକୁ ଆର୍ଥିକ ଭାବେ ମଜଭୁତ୍ କରିବ ବୋଲି କୁହାଯାଉଛି ନୂଆ ବ୍ୟବସ୍ଥାରେ ସାଧାରଣ ବର୍ଗରେ ୨୧୫ କିଲୋମିଟର ପର୍ଯ୍ୟନ୍ତ ଯାତ୍ରା କରିବା ପାଇଁ କୌଣସି ଅତିରିକ୍ତ ଶୁଳ୍କ ଦେବାକୁ ପଡ଼ିବ ନାହିଁ। ତେବେ ୨୧୬ କିଲୋମିଟରରୁ ଅଧିକ ଯାତ୍ରା ପାଇଁ ଏହି ଭଡ଼ା ବଢ଼ିଛି। ସାଧାରଣ ବର୍ଗରେ କିଲୋମିଟର ପିଛା ୧ ପଇସା ଏବଂ ମେଲ୍/ଏକ୍ସପ୍ରେସ୍ ଟ୍ରେନ୍‌ର ସମସ୍ତ ଏସି ଓ ନନ-ଏସି ଶ୍ରେଣୀରେ କିଲୋମିଟର ପିଛା ୨ ପଇସା ବୃଦ୍ଧି କରାଯାଇଛି।

୨୧୬ କିଲୋମିଟରରୁ ୭୫୦ କିଲୋମିଟର ଦୂରତା ପାଇଁ ଭଡ଼ା ୫ଟଙ୍କା ବୃଦ୍ଧି ପାଇବ
୭୫୧ କିଲୋମିଟରରୁ ୧୨୫୦ କିଲୋମିଟର ଦୂରତା ପାଇଁ ଭଡ଼ା ୧୦ ଟଙ୍କା ବୃଦ୍ଧି ପାଇବ
୧୨୫୧ କିଲୋମିଟରରୁ ୧୭୫୦ କିଲୋମିଟର ଦୂରତା ପାଇଁ ଭଡ଼ା ୧୫ ଟଙ୍କା ବୃଦ୍ଧି ପାଇବ
୧୭୫୧ କିଲୋମିଟରରୁ ୨୨୫୦ କିଲୋମିଟର ଦୂରତା ପାଇଁ ଭଡ଼ା ୨୦ ଟଙ୍କା ବୃଦ୍ଧି ପାଇବ

ଏହି ଟିକେଟଗୁଡ଼ିକରେ କୌଣସି ଅତିରିକ୍ତ ଶୁଳ୍କ ଲାଗିବ ନାହିଁ
ସମାନ ଶ୍ରେଣୀ ଅନୁଯାୟୀ ଭଡ଼ା ବୃଦ୍ଧି ରାଜଧାନୀ, ଶତାବ୍ଦୀ, ଦୂରନ୍ତୋ, ବନ୍ଦେ ଭାରତ, ତେଜସ, ହମସଫର, ଅମୃତ ଭାରତ, ଗରିବ ରଥ, ଜନ ଶତାବ୍ଦୀ, ଅନ୍ତ୍ୟୋଦୟ, ଗତିମାନ, ଯୁବ ଏକ୍ସପ୍ରେସ୍, ନମୋ ଭାରତ ରାପିଡ୍ ରେଳ ସମେତ ଅନ୍ୟାନ୍ୟ ସ୍ୱତନ୍ତ୍ର ଟ୍ରେନ୍‌ଗୁଡ଼ିକରେ ପ୍ରଯୁଜ୍ୟ ହେବ। ସଂରକ୍ଷଣ ଶୁଳ୍କ, ସୁପରଫାଷ୍ଟ ଶୁଳ୍କ ଇତ୍ୟାଦିରେ କୌଣସି ପରିବର୍ତ୍ତନ ହୋଇନାହିଁ। GST ଅପରିବର୍ତ୍ତିତ ରହିବ।