ଧରାଶାୟୀ ସେୟାର ବଜାର , ୧୨୦୦କୋଟି ସ୍ୱାହା

ମୁମ୍ବାଇ : ମଧ୍ୟପ୍ରାଚ୍ୟ ଯୁଦ୍ଧ ମଧ୍ୟରେ ଦଲାଲ ଷ୍ଟ୍ରିଟରେ ହା ହା କାର। ନିବେଶକଙ୍କ ୧୨ ଶହ କୋଟି ସ୍ୱାହା । ଯୁଦ୍ଧ ପରିସ୍ଥିତି ଭାରତୀୟ ସେୟାର ବଜାରକୁ ସମ୍ପୂର୍ଣ୍ଣ ରୂପେ ଦୋହଲାଇ ଦେଇଛି । ସୋମବାର ସପ୍ତାହର ପ୍ରଥମ କାରବାର ଦିନରେ ବଜାରରେ ଏକ ବଡ଼ ‘କ୍ରାସ୍’ ବା ବିପର୍ଯ୍ୟୟ ଦେଖିବାକୁ ମିଳିଛି। ବିଶ୍ୱ ବଜାରରେ ଅଶୋଧିତ ତୈଳ ମୂଲ୍ୟରେ ପ୍ରବଳ ବୃଦ୍ଧି ଯୋଗୁଁ ପ୍ରାରମ୍ଭିକ କାରବାରରେ ସେନସେକ୍ସ ଏବଂ ନିଫ୍ଟି ପ୍ରାୟ ୩ ପ୍ରତିଶତ ହ୍ରାସ ପାଇଛି । ଏହି କାରଣରୁ ନିବେଶକମାନେ ୧୨ ଶହ କୋଟି ଟଙ୍କା ହରାଇଛନ୍ତି। 

ଆଜି ସକାଳ ୯:୨୨ ସୁଦ୍ଧା ବମ୍ବେ ଷ୍ଟକ୍ ଏକ୍ସଚେଞ୍ଜର ସୂଚକାଙ୍କ ‘ସେନସେକ୍ସ’ ୨,୩୩୩ ପଏଣ୍ଟ (୨.୯୬%) ହ୍ରାସ ପାଇ ୭୬,୫୮୫ ସ୍ତରକୁ ଖସି ଆସିଛି। ସେହିପରି ନିଫ୍ଟି ୭୦୦ ପଏଣ୍ଟ କମି ୨୩,୭୬୪ରେ ପହଞ୍ଚିଛି। ଏହାପରେ ନିବେଶକ ମୁଣ୍ଡରେ ହାତଦେଇ ବସିଛନ୍ତି । 

ଶୁକ୍ରବାର ବଜାରରେ ସେନସେକ୍ସ ୭୮,୯୧୮.୯୦ରେ ବନ୍ଦ ହୋଇଥିଲା । ସୋମବାର ଏହା ୭୭,୦୫୬.୭୬ ଅଙ୍କରେ ଖୋଲିଛି । ଏହାର କିଛି ମିନଟରେ ଏହା ୭୬,୪୨୪ ହୋଇଯାଇଥିଲା । ସେହିପରି ନିଫ୍ଟି ଶୁକ୍ରବାର ୨୪,୪୫୦ ଅଙ୍କରେ ବନ୍ଦ ହୋଇଥିବା ବେଳେ ଶୁକ୍ରବାର ୨୩,୮୬୮ରେ ଖୋଲିଥିଲା । ମାତ୍ର କିଛି ମିନ୍ଟ ମଧ୍ୟରେ ୭୦୦ ପଏଣ୍ଟ ଖସି ଏହା ୨୩,୬୯୭ରେ ଟ୍ରେଡ୍ କରିଥିଲା ।

ବଜାରରେ ଦେଖାଦେଇଥିବା ଏହି ‘ବ୍ଲଡ୍ ବାଥ୍’ ବା ପ୍ରବଳ ବିକ୍ରୟ ଚାପ ଯୋଗୁଁ ନିବେଶକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। ମଧ୍ୟମ ଏବଂ କ୍ଷୁଦ୍ର ପୁଞ୍ଜି ବିଶିଷ୍ଟ କମ୍ପାନୀଗୁଡ଼ିକର ସୂଚକାଙ୍କ (ମିଡ୍-କ୍ୟାପ୍ ଏବଂ ସ୍ମଲ୍-କ୍ୟାପ୍) ମଧ୍ୟ ଯଥାକ୍ରମେ ୩.୨୮% ଏବଂ ୩.୩୭% ହ୍ରାସ ପାଇଛି। ବଜାରରେ ଏହି ହ୍ରାସର ମୁଖ୍ୟ କାରଣ ହେଉଛି ଅଶୋଧିତ ତୈଳର ମୂଲ୍ୟ ବ୍ୟାରେଲ ପଛରେ ୧୧୦ ଡଲାର ପାଖାପାଖି ପହଞ୍ଚିବା। ଆମେରିକା ଏବଂ ଇରାନ ମଧ୍ୟରେ ସାମରିକ ସଂଘର୍ଷ ଯୋଗୁଁ ‘ହର୍ମୁଜ୍ ପ୍ରଣାଳୀ’ ଦେଇ ତୈଳ ପରିବହନ ବାଧାପ୍ରାପ୍ତ ହୋଇଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ତୈଳ ମୂଲ୍ୟ ବୃଦ୍ଧିକୁ ଇରାନର ପରମାଣୁ ବିପଦ ରୋକିବା ପାଇଁ ଏକ “ଅସ୍ଥାୟୀ ଖର୍ଚ୍ଚ” ବୋଲି ଦର୍ଶାଇ ଏହାକୁ ସମର୍ଥନ କରିଛନ୍ତି। କେବଳ ଭାରତ ନୁହେଁ, ବିଶ୍ୱର ପ୍ରମୁଖ ବଜାରଗୁଡ଼ିକରେ ମଧ୍ୟ ହାହାକାର ଦେଖାଦେଇଛି। 

ଜାପାନର ‘ନିକ୍କେଇ’ ୬.୯୮% ଏବଂ ଦକ୍ଷିଣ କୋରିଆର ‘କୋସ୍ପି’ ୭.୩୬% ହ୍ରାସ ପାଇଛି। ଭାରତୀୟ ବଜାରରେ ସରକାରୀ ବ୍ୟାଙ୍କ କ୍ଷେତ୍ର ସର୍ବାଧିକ ୫.୩୨% କ୍ଷତି ସହିଥିବା ବେଳେ ଅଟୋମୋବାଇଲ୍, ଧାତୁ ଏବଂ ଘରୋଇ ବ୍ୟାଙ୍କଗୁଡ଼ିକ ମଧ୍ୟ ୩%ରୁ ଅଧିକ ହ୍ରାସ ପାଇଛନ୍ତି। ବିଶେଷଜ୍ଞଙ୍କ ମତରେ, ଯେପର୍ଯ୍ୟନ୍ତ ଭୂ-ରାଜନୈତିକ ଉତ୍ତେଜନା ହ୍ରାସ ପାଇନାହିଁ ଏବଂ ତୈଳ ମୂଲ୍ୟ ସ୍ଥିର ହୋଇନାହିଁ, ସେପର୍ଯ୍ୟନ୍ତ ବଜାରରେ ଏଭଳି ଅସ୍ଥିରତା ଜାରି ରହିବ। ନିବେଶକମାନଙ୍କୁ ଏବେ ସତର୍କ ରହିବାକୁ ପରାମର୍ଶ ଦିଆଯାଇଛି ।