ତେହେଲକାର ପ୍ରତିଷ୍ଠାତା ତରୁଣ ତେଜପାଲ ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ
ମୁମ୍ବାଇ: ମୁମ୍ବାଇ ଉଚ୍ଚ ନ୍ୟାୟାଳୟ ତେହେଲକା ପତ୍ରିକାର ପ୍ରତିଷ୍ଠାତା ତରୁଣ ତେଜପାଲଙ୍କୁ ୨୦୧୩ ମସିହାର ଦୁଷ୍କର୍ମ ମାମଲାରେ ଦୋଷୀ ସାବ୍ୟସ୍ତ କରିଛନ୍ତି। ଏଥିସହ ୨୦୨୧ ମସିହାରେ ଗୋଆର ଟ୍ରାଏଲ୍ କୋର୍ଟ ଦେଇଥିବା ନିର୍ଦ୍ଦୋଷ ରାୟକୁ ବାତିଲ କରିଦେଇଛନ୍ତି। ତେଜପାଲଙ୍କ ନିର୍ଦ୍ଦୋଷ ରାୟ ବିରୋଧରେ ଗୋଆ ସରକାର ଅପିଲ୍ କରିଥିଲେ। ଏହି ମାମଲା ୨୦୧୩ ମସିହା ନଭେମ୍ବର ମାସରେ ଯେତେବେଳେ ତେହେଲକାର ଜଣେ ମହିଳା କର୍ମଚାରୀ ଅଭିଯୋଗ କରିଥିଲେ ଯେ, ଗୋଆର ଏକ ରିସର୍ଟରେ ଆୟୋଜିତ ପତ୍ରିକାର ବାର୍ଷିକ ‘ଥିଙ୍କଫେଷ୍ଟ’ କାର୍ଯ୍ୟକ୍ରମ ସମୟରେ ଲିଫ୍ଟ ଭିତରେ ତେଜପାଲ ତାଙ୍କୁ ଦୁଷ୍କର୍ମ କରିଥିଲେ। ଗୁରୁବାର ଗୋଆ ବେଞ୍ଚର ମୁମ୍ବାଇ ଉଚ୍ଚ ନ୍ୟାୟାଳୟ ଏହି ରାୟ ଘୋଷଣା କରିଥିଲେ। ଦଣ୍ଡର ପରିମାଣ ଅପରାହ୍ନ ୨:୩୦ରେ ଘୋଷଣା କରାଯିବ ବୋଲି କୁହାଯାଇଥିଲା। ତେବେ ନ୍ୟାୟାଳୟ ତତ୍କ୍ଷଣାତ ରାୟର ବିସ୍ତୃତ କାରଣ ପ୍ରକାଶ କରିନଥିଲେ। ବିସ୍ତୃତ ଆଦେଶ ପରେ ଜାରି ହେବ ବୋଲି ଜଣାପଡ଼ିଛି। ରାୟ ପରେ ତେଜପାଲ ସୁପ୍ରିମ କୋର୍ଟରେ ଏହି ଆଦେଶ ଉପରେ ଏକ ସପ୍ତାହ ପାଇଁ ସ୍ଥଗିତାଦେଶ ଚାହିଁ ଆବେଦନ କରିଥିଲେ। ବିଚାରପତି ଡା. ନୀଲା ଗୋଖଲେ ଏବଂ ଅମିତ ଜାମସାଣ୍ଡେକରଙ୍କ ଦୁଇ ଜଣିଆ ଖଣ୍ଡପୀଠ ଭାରତୀୟ ଦଣ୍ଡ ସଂହିତା (ଆଇପିସି)ର ଧାରା ୩୭୬(୨)(ଏଫ୍), ୩୭୬(୨)(କେ), ୩୫୪ଏ ଓ ୩୫୪ବି ଅନୁଯାୟୀ ତେଜପାଲଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ନ୍ୟାୟାଳୟ କହିଛନ୍ତି, ଆମେ ନିମ୍ନ ଅଦାଲତର ରାୟକୁ ବାତିଲ କରି ତେଜପାଲଙ୍କୁ ଦୋଷୀ ସାବ୍ୟସ୍ତ କରୁଛୁ। ଧାରା ୩୭୬(୨)(ଏଫ୍) ଅନୁଯାୟୀ, ବିଶ୍ୱାସ କିମ୍ବା କର୍ତ୍ତୃତ୍ୱର ପଦବୀରେ ଥିବା ବ୍ୟକ୍ତିଙ୍କ ଦ୍ୱାରା ଦୁଷ୍କର୍ମ ଅପରାଧ। ଧାରା ୩୫୪ଏ ଯୌନ ଉତ୍ପୀଡ଼ନକୁ ଏବଂ ଧାରା ୩୫୪ବି ଜଣେ ମହିଳାଙ୍କୁ ବଳପୂର୍ବକ ଉଲଗ୍ନ କରିବା ଉଦ୍ଦେଶ୍ୟରେ ଆକ୍ରମଣ କିମ୍ବା ବଳ ପ୍ରୟୋଗକୁ ଅପରାଧ ଭାବେ ବିବେଚନା କରେ। ରାୟ ଘୋଷଣା ସମୟରେ ତେଜପାଲ ଅଦାଲତରେ ଉପସ୍ଥିତ ଥିଲେ। ସେ ନ୍ୟାୟାଧୀଶଙ୍କୁ କହିଥିଲେ, ‘ମୋର ବୟସ ଏବେ ୬୨ ବର୍ଷ। ମୁଁ ନିଜକୁ ମଧ୍ୟ ପୀଡ଼ିତ ବୋଲି ଭାବୁଛି। ମୋର ପତ୍ନୀ ଅଛନ୍ତି। ଆମେ ଉଚ୍ଚ ଅଦାଲତରେ ଆବେଦନ କରିବୁ। ଦୟାକରି ମୋ ପ୍ରତି ନରମ ମନୋଭାବ ଦେଖାନ୍ତୁ।
