ଆରାବଳୀ ପର୍ବତମାଳା ମାମଲା ,ନିଷ୍ପତି ଉପରେ ସୁପ୍ରିମକୋର୍ଟଙ୍କ ରହିତାଦେଶ

ନୂଆଦିଲ୍ଲୀ: ଆରାବଳୀ ପର୍ବତମାଳା ମାମଲା ନିଷ୍ପତ୍ତି ବଦଳାଇଲେ ସୁପ୍ରିମକୋର୍ଟ I ଖଣି ଖନନ ସମ୍ପର୍କରେ ସର୍ବୋଚ୍ଚ ଅଦାଲତ ନିଜ ରାୟ ଉପରେ ରହିତାଦେଶ ଜାରି କରିଛନ୍ତି । ଖଣି ଖନନ ମାମଲାରେ ଗତ ମାସରେ ଜାରି କରିଥିବା ନିଜସ୍ୱ ଆଦେଶକୁ ସୋମବାର ଶୁଣାଣିରେ ସ୍ଥଗିତ ରଖିଛନ୍ତି । ପ୍ରଧାନବିଚାରପତି ଜଷ୍ଟିସ ସୂର୍ଯ୍ୟକାନ୍ତଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ରାୟ ଶୁଣାଇଛନ୍ତି । 

ସୋମବାର ବହୁ ଚର୍ଚ୍ଚିତ ଆରାବଳୀ ମାମଲାର ଶୁଣାଣି ହୋଇଥିଲା । ଶୁଣାଣିରେ କୋର୍ଟ ଗତ ମାସରେ ଦେଇଥିବା ରାୟ ଉପରେ ରୋକ୍ ଲଗାଇଛନ୍ତି । ଯେଉଁଥିରେ ଆରାବାଳୀ ପର୍ବତ ଶ୍ରେଣୀର ସଜ୍ଞା ବାବଦରେ ଉଲ୍ଲେଖ ହୋଇଥିଲା । ତେବେ ସୁପ୍ରିମକୋର୍ଟ ପର୍ବତ ଶ୍ରେଣୀର ନୂଆ ସଜ୍ଞା ବାବଦରେ ଉଲ୍ଲେଖ କରିବା ପରେ ବିବାଦ ହୋଇଥିଲା । ଅନେକ ପରିବେଶବିତ ରାୟକୁ ବିରୋଧ କରିଥିଲେ । ଆରାବଳୀ ଜୈବ ବିବିଦ୍ଧତା ପାଇଁ ଜରୁରୀ । ଏହାର ସଜ୍ଞା ବଦଳାଇ ଖଣି ଖନନ କରିବା ଠିକ୍ ହେବନି ବୋଲି ପ୍ରକୃତି ପ୍ରେମୀ ଯୁକ୍ତି ବାଢିଥିଲେ । ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ଅବକାଶ ଖଣ୍ଡପୀଠ କହିଛନ୍ତି ଯେ ଆମେ କମିଟିର ସୁପାରିଶ ଏବଂ ଏହି କୋର୍ଟଙ୍କ ନିର୍ଦ୍ଦେଶକୁ ସ୍ଥଗିତ ରଖିବା ଆବଶ୍ୟକ । ଖଣ୍ଡପୀଠ ଏକ ନୂତନ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । ନୂତନ କମିଟି ଗଠନ ନ ହେବା ପର‌୍ୟ୍ୟନ୍ତ ଏହି ସ୍ଥଗିତ ବଳବତ୍ତର ରହିବ । ଏକ ନୂତନ ବିଶେଷଜ୍ଞ ପ୍ୟାନେଲ୍ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । ପର୍ବତ ଉପରେ କଣ ପ୍ରଭାବ ପଡ଼ିବ ତାହାର ତର୍ଜମା କରି ରିପୋର୍ଟ ପ୍ରଦାନ କରିବାକୁ କୋର୍ଟ କହିଛନ୍ତି । ମାମଲାର ପରବର୍ତ୍ତୀ ଶୁଣାଣି ପାଇଁ ଜାନୁଆରୀ ୨୧ ତାରିଖ ଧାର୍ଯ୍ୟ ହୋଇଛି । 

ନଭେମ୍ବର ୨୦ରେ ସୁପ୍ରିମକୋର୍ଟ କେନ୍ଦ୍ରକୁ ନିର୍ଦ୍ଦେଶ ଦେଇଥିଲେ ଯେ ଏହି ଅଞ୍ଚଳରେ କୌଣସି ନୂତନ ଖଣି କାର୍ଯ୍ୟକଳାପକୁ ଅନୁମତି ଦେବା ପୂର୍ବରୁ ସ୍ଥାୟୀ ଖଣି ପାଇଁ ଏକ ବ୍ୟାପକ ଯୋଜନା ପ୍ରସ୍ତୁତ କରନ୍ତୁ । ଆଜିର ଶୁଣାଣି ସମୟରେ କେନ୍ଦ୍ର ପକ୍ଷରୁ ଯୁକ୍ତି ରଖି ସଲିସିଟର ଜେନେରାଲ ତୁଷାର ମେହତା କହିଥିଲେ ଯେ କୋର୍ଟ ଗତ ମାସରେ ସେହି ଯୋଜନାକୁ ଗ୍ରହଣ କରିଛନ୍ତି । ସିଜେଆଇ ଏହାକୁ ଖଣ୍ଡନ କରି କହିଥିଲେ, ଆମେ ବିଶ୍ୱାସ କରୁଛୁ ଯେ କମିଟିର ରିପୋର୍ଟ ଏବଂ କୋର୍ଟଙ୍କ ପର୍ଯ୍ୟବେକ୍ଷଣକୁ ଭୁଲ ବ୍ୟାଖ୍ୟା କରାଯାଉଛି। କାର୍ଯ୍ୟନ୍ୱୟନ ପୂର୍ବରୁ କିଛି ସ୍ପଷ୍ଟୀକରଣ ଆବଶ୍ୟକ ଏବଂ ଜଣେ ନିରପେକ୍ଷ ଓ ସ୍ୱାଧୀନ ବିଶେଷଜ୍ଞଙ୍କ ମତାମତ ବିଚାର କରାଯିବା ଉଚିତ।