୨୦ ଦିନ ଧରି ଅନସନରେ ବସିଥିବା ସୋନମ ୱାଙ୍ଗଚୁକଙ୍କୁ ହସ୍ପିଟାଲ ନେଲା ପୁଲିସ

ନୂଆଦିଲ୍ଲୀ : ଜୁନ୍ ୨୮ ତାରିଖରୁ ନୂଆଦିଲ୍ଲୀର ଜନ୍ତରମନ୍ତର ଠାରେ ଅନସନରେ ବସିଥିବା ଜଳବାୟୁ କର୍ମୀ ସୋନମ ୱାଙ୍ଗଚୁକ୍‌ଙ୍କୁ ଶନିବାର ଦିଲ୍ଲୀ ପୋଲିସ ପ୍ରତିବାଦ ସ୍ଥଳରୁ ଉଠାଇ ନେଇ ଡାକ୍ତରଖାନାରେ ଭର୍ତ୍ତି କରିିଛି। ସୋନମଙ୍କୁ ସରକାରୀ ପରିଚାଳିତ ସଫଦରଜଙ୍ଗ ହସ୍ପିଟାଲ ନେଇ ଜରୁରୀକାଳୀନ ୱାର୍ଡରେ ଭର୍ତ୍ତି କରାଯାଇଛି। ତାଙ୍କର ଚେତା ଅଛି ଏବଂ ସ୍ବାସ୍ଥ୍ୟାବସ୍ଥା ସମ୍ପୂର୍ଣ୍ଣ ସ୍ଥିର ଅଛି ବୋଲି ସେ କହିଛନ୍ତି। ଏକ ଟ୍ୱିଟରେ ପୋଲିସ କହିଛି ଯେ ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶ ଏବଂ ୫୯ ବର୍ଷୀୟ ବ୍ୟକ୍ତିଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବା ସମ୍ପର୍କରେ ବିଶେଷଜ୍ଞ ଡାକ୍ତରୀ ପରାମର୍ଶ ଅନୁଯାୟୀ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଏବଂ ଶ୍ରୀ ସୋନମ ୱାଙ୍ଗଚୁକଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହେବାରୁ ବିଶେଷଜ୍ଞ ଡାକ୍ତରୀ ପରାମର୍ଶ ଅନୁଯାୟୀ, ତାଙ୍କୁ ଜରୁରୀ ଚିକିତ୍ସା ପାଇଁ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ମାନ୍ୟବର ହାଇକୋର୍ଟଙ୍କ ନିର୍ଦ୍ଦେଶ ପାଳନ କରିବା ସମୟରେ ପ୍ରଦର୍ଶନକାରୀମାନେ ବାଧା ସୃଷ୍ଟି କରିବାକୁ ଚେଷ୍ଟା କରିଥିଲେ, ଯେଉଁଥିରେ ସାମାନ୍ୟ ଉତ୍ତେଜନା ସୃଷ୍ଟି ହୋଇଥିଲା, କିନ୍ତୁ ପୋଲିସ ସର୍ବାଧିକ ସଂଯମତା ଅବଲମ୍ବନ କରି ସୁରକ୍ଷିତ ଭାବରେ କାର୍ଯ୍ୟ କରିଥିଲେ ବୋଲି ଦିଲ୍ଲୀ ପୋଲିସ ଏହାର ବିବୃତ୍ତିରେ କହିଛି। ପୋଲିସ ମଧ୍ୟ ବିକ୍ଷୋଭକାରୀଙ୍କୁ ସେମାନଙ୍କର ଆନ୍ଦୋଳନ ସମାପ୍ତ କରିବାକୁ ନିବେଦନ କରିଛି। ସେମାନେ ଯଥାଶୀଘ୍ର ଶାନ୍ତିପୂର୍ଣ୍ଣ ଭାବରେ ପ୍ରତିବାଦ ସ୍ଥାନ ଖାଲି କରିବା ଉଚିତ ବୋଲି ପୁଲିସ କହିଛି। ଘଟଣାସ୍ଥଳରୁ ମିଳିଥିବା ଭିଡିଓରେ ପୋଲିସ କର୍ମଚାରୀମାନେ ୱାଙ୍ଗଚୁକଙ୍କୁ ମଞ୍ଚରୁ ତଳକୁ ଆଣିବା ସମୟର ଦୃଶ୍ୟକୁ ବାଧା ଦେବା ପାଇଁ ଧଳା ଚାଦର ବ୍ୟବହାର କରୁଥିବାର ଦେଖାଯାଇଛି।

ଉଲ୍ଲେଖଯୋଗ୍ୟ ୱାଙ୍ଗଚୁକ୍‌ଙ୍କ ସ୍ୱାସ୍ଥ୍ୟ ଉପରେ ନଜର ରଖୁଥିବା ଡାକ୍ତରଙ୍କ ପରାମର୍ଶ ଆଧାରରେ କେନ୍ଦ୍ର ସରକାର ତାଙ୍କୁ ଆବଶ୍ୟକୀୟ ଚିକିତ୍ସା ପ୍ରଦାନ କରିବାପାଇଁ ହାଇକୋର୍ଟକୁ କହିବାର ଦୁଇ ଦିନ ପରେ ତାଙ୍କୁ ଜନ୍ତର ମନ୍ତରରୁ ହସ୍ପିଟାଲକୁ ନିଆଯାଇଛି । ମୁଖ୍ୟ ବିଚାରପତି ଦେବେନ୍ଦ୍ର କୁମାର ଉପାଧ୍ୟାୟ ଏବଂ ବିଚାରପତି ତେଜସ କାରିଆଙ୍କୁ ନେଇ ଗଠିତ ଏକ ଡିଭିଜନ ବେଞ୍ଚ ସରକାରଙ୍କୁ ୱାଙ୍ଗଚୁକଙ୍କ ସ୍ୱାସ୍ଥ୍ୟର ଦୈନିକ କ୍ଲିନିକାଲ୍ ତଦାରଖ ସୁନିଶ୍ଚିତ କରିବାକୁ ଏବଂ ଆବଶ୍ୟକ ଅନୁଯାୟୀ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ। ଯେକୌଣସି ନାଗରିକର ଜୀବନ ମୂଲ୍ୟବାନ ବୋଲି କୋର୍ଟ କହିଥିଲେ।