ଇସ୍ତଫା ଦେଲେ ସିଦ୍ଦରମୈୟା ,ଡି.କେ ଶିବକୁମାର ପରବର୍ତ୍ତୀ ମୁଖ୍ୟମନ୍ତ୍ରୀ

କର୍ଣ୍ଣାଟକ :  କର୍ଣ୍ଣାଟକ ସରକାରରେ ବଡ଼ ପରିବର୍ତ୍ତନ । ମୁଖ୍ୟମନ୍ତ୍ରୀ ସିଦ୍ଧରମୈୟା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି, ଏବଂ ଡିକେ ଶିବକୁମାର ମୁଖ୍ୟମନ୍ତ୍ରୀ ହେବେ ବୋଲି ଆଶା କରାଯାଉଛି। ଲୋକଭବନକୁ ଯାଇ ରାଜ୍ୟପାଳଙ୍କ ଅନୁପସ୍ଥିତିରେ ତାଙ୍କ ସଚିବଙ୍କୁ ଇସ୍ତଫାପତ୍ର ଦେଇଛନ୍ତି ସିଦ୍ଧରମୈୟା ।ରାଜ୍ୟପାଳ ସନ୍ଧ୍ୟାରେ ବେଙ୍ଗାଲୁରୁରୁ ଫେରିବା ପରେ ଇସ୍ତଫାପତ୍ର ଗ୍ରହଣ କରିବେ  । କର୍ଣ୍ଣାଟକ ରାଜ୍ୟପାଳ ଥାୱରଚାନ୍ଦ ଗେହଲଟ୍ ବର୍ତ୍ତମାନ ଇନ୍ଦୋରରେ ଅଛନ୍ତି।

ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସିଦ୍ଧରମୈୟା ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ଘୋଷଣା କରିଛନ୍ତି । ସେ କହିଛନ୍ତି, ଶିବକୁମାରଙ୍କୁ ସବୁବେଳେ ସମର୍ଥନ ରହିବ । ମୋ ପାଇଁ ରାଜ୍ୟର ହିତ ସବୁଠାରୁ ଆଗରେ । ଆଗକୁ ମଧ୍ୟ କର୍ଣ୍ଣାଟକର ହିତ ପାଇଁ କାମ କରିବି । ପାର୍ଟିର ସବୁ ବିଧାୟକ ଏବେ ଏକଜୁଟ୍ ହେବାକୁ ଆହ୍ବାନ ଦେଇଛନ୍ତି ।

ନୂତନ ମୁଖ୍ୟମନ୍ତ୍ରୀ ଚୟନ କରିବା ପାଇଁ ଆସନ୍ତାକାଲି କର୍ଣ୍ଣାଟକ ବିଧାୟକ ଦଳର ଏକ ବୈଠକ ଅନୁଷ୍ଠିତ ହେବ। ଡିକେ ଶିବକୁମାରଙ୍କ ମୁଖ୍ୟମନ୍ତ୍ରୀ ନିଯୁକ୍ତି ନିଶ୍ଚିତ ବୋଲି ବିବେଚନା କରାଯାଉଛି।

ସୂଚନାନୁସାରେ, ୨୦୨୩ରେ କର୍ଣ୍ଣାଟକରେ କଂଗ୍ରେସ ସରକାର ଗଠନ ହୋଇଥିଲା। ମେ ୨୩ରେ ସିଦ୍ଦରମୈୟା ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ଡିକେ ଶିବକୁମାରଙ୍କୁ ଉପମୁଖ୍ୟମନ୍ତ୍ରୀ ନିଯୁକ୍ତ କରାଯାଇଥିଲା। ସେହି ସମୟରେ, ଅଢ଼େଇ ବର୍ଷର ଫର୍ମୁଲା ଉପରେ ଆଲୋଚନା ହୋଇଥିଲା। ଅର୍ଥାତ୍, ପ୍ରଥମ ଅଢ଼େଇ ବର୍ଷ ପାଇଁ ସିଦ୍ଦରମୈୟା ଏବଂ ବାକି ଅଢ଼େଇ ବର୍ଷ ପାଇଁ ଡିକେ ଶିବକୁମାର ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିବେ। ତଥାପି, ତିନି ବର୍ଷ କାର୍ଯ୍ୟକାଳ ପରେ ମଧ୍ୟ କ୍ଷମତା ପରିବର୍ତ୍ତନ ହୋଇନଥିଲା। ଏହି ପ୍ରସଙ୍ଗରେ ସିଦ୍ଦରମୈୟା ଏବଂ ଡିକେ ଶିବକୁମାରଙ୍କ ଶିବିର ଦୁଇ ଫାଳ ହୋଇଯାଇଥିଲା।