ସୋହରାବୁଦ୍ଦିନ ଶେଖ ମାମଲାରେ ୨୨ ଅଭିଯୁକ୍ତଙ୍କ ଦୋଷମୁକ୍ତି ବିରୋଧରେ ଆବେଦନ ଯାଞ୍ଚ କରିବାକୁ ସୁପ୍ରିମକୋର୍ଟ ସମ୍ମତ
ନୂଆଦିଲ୍ଲୀ : ୨୦୦୫ ମସିହାରେ ଗ୍ୟାଙ୍ଗଷ୍ଟର ସୋହରାବୁଦ୍ଦିନ ଶେଖ, ତାଙ୍କ ପତ୍ନୀ କୌସର ବି ଏବଂ ତାଙ୍କ ସହଯୋଗୀ ତୁଲସୀରାମ ପ୍ରଜାପତିଙ୍କ ସହ ଜଡ଼ିତ ନକଲି ଏନ୍କାଉଣ୍ଟର ମାମଲାରେ ୨୧ ଜଣ ପୁଲିସ କର୍ମଚାରୀଙ୍କ ସମେତ ୨୨ ଜଣ ଅଭିଯୁକ୍ତଙ୍କୁ ଦୋଷମୁକ୍ତ କରିଥିବା ବମ୍ବେ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଆବେଦନର ଶୁଣାଣି କରିବାକୁ ସୋମବାର ସୁପ୍ରିମକୋର୍ଟ ସମ୍ମତ ହୋଇଛନ୍ତି। ପ୍ରଧାନ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ସୋହରାବୁଦ୍ଦିନ ଶେଖଙ୍କ ଭାଇ ନାୟାବୁଦ୍ଦିନ ଶେଖଙ୍କ ଦ୍ୱାରା ଦାଖଲ ଆବେଦନ ଉପରେ ନୋଟିସ୍ ଜାରି କରିଛନ୍ତି। ଏହି ଆବେଦନରେ ମେ ୭ ତାରିଖର ବମ୍ବେ ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରାଯାଇଛି, ଯେଉଁ ରାୟରେ ଅଭିଯୁକ୍ତମାନଙ୍କ ଦୋଷମୁକ୍ତିକୁ ବଜାୟ ରଖାଯାଇଥିଲା।ଖଣ୍ଡପୀଠ କହିଛନ୍ତି ଯେ ଦୋଷମୁକ୍ତିର ରାୟ ସହ ସମ୍ପର୍କିତ କିଛି ନିର୍ଦ୍ଦିଷ୍ଟ ସାକ୍ଷୀଙ୍କ ବୟାନକୁ ସେମାନେ ଯାଞ୍ଚ କରିବେ। ପ୍ରଧାନ ବିଚାରପତି କହିଥିଲେ, ‘ଆମେ କିଛି ସାକ୍ଷୀଙ୍କ ବୟାନ ଦେଖିବାକୁ ଚାହୁଁଛୁ। ଆମେ ସମ୍ପୂର୍ଣ୍ଣ ରେକର୍ଡ ମାଗୁନୁ। ଆପଣଙ୍କ ମତରେ ଯେଉଁ ତିନି-ଚାରିଟି ବୟାନ ଗୁରୁତ୍ୱପୂର୍ଣ୍ଣ, ଆମକୁ ସେଗୁଡ଼ିକ ଦିଅନ୍ତୁ। ଆମେ ଦୋଷମୁକ୍ତିର ରାୟକୁ ଯାଞ୍ଚ କରିବୁ । ବିଚାରପତି ବାଗଚୀ କହିଥିଲେ ଯେ ମାମଲାର ୯୨ ଜଣ ସାକ୍ଷୀ ଅଭିଯୋଗ ପକ୍ଷ ବିରୋଧରେ ବୟାନ ଦେଇଥିବା ଘଟଣା ବିଚାରଯୋଗ୍ୟ ବିଷୟ। ବିଶେଷକରି ବିଚାର ପ୍ରକ୍ରିୟା ନିରପେକ୍ଷ ଓ ନ୍ୟାୟସଙ୍ଗତ ଥିଲା କି ନାହିଁ, ତାହା ନିର୍ଣ୍ଣୟ କରିବା ବେଳେ ଏହାକୁ ବିଚାର କରିବା ଆବଶ୍ୟକ ବୋଲି ସେ କହିଥିଲେ। ଏହି ଆବେଦନରେ ବମ୍ବେ ହାଇକୋର୍ଟଙ୍କ ମେ ୭ ତାରିଖର ରାୟକୁ ଚ୍ୟାଲେଞ୍ଜ କରାଯାଇଛି। ହାଇକୋର୍ଟ ମୁମ୍ବାଇର ସ୍ୱତନ୍ତ୍ର ସିବିଆଇ କୋର୍ଟଙ୍କ ଡିସେମ୍ବର ୨୦୧୮ ରାୟ ବିରୋଧରେ ରୁବାବୁଦ୍ଦିନ ଓ ନାୟାବୁଦ୍ଦିନ ଶେଖଙ୍କ ଦ୍ୱାରା ଦାଖଲ ଅପିଲ୍ଗୁଡ଼ିକୁ ଖାରଜ କରିଥିଲେ। ସ୍ୱତନ୍ତ୍ର ସିବିଆଇ କୋର୍ଟ ସେତେବେଳେ ସମସ୍ତ ୨୨ ଜଣ ଅଭିଯୁକ୍ତଙ୍କୁ ଦୋଷମୁକ୍ତ କରିଥିଲେ। ଏହି ମାମଲାରେ ଦୋଷମୁକ୍ତ ହୋଇଥିବା ୨୨ ଜଣଙ୍କ ମଧ୍ୟରୁ ୨୧ ଜଣ ଗୁଜରାଟ ଓ ରାଜସ୍ଥାନର ପୁଲିସ ଅଧିକାରୀ ଥିଲେ। ଅନ୍ୟ ଜଣେ ଅଭିଯୁକ୍ତ ଗୁଜରାଟର ଏକ ଫାର୍ମହାଉସ୍ର ମାଲିକ ଥିଲେ। ଅଭିଯୋଗ ପକ୍ଷର ମାମଲା ଅନୁସାରେ, ସୋହରାବୁଦ୍ଦିନ ଓ କୌସର ବିଙ୍କୁ ଏହି ଫାର୍ମହାଉସ୍ରେ ବେଆଇନ ଭାବେ ଅଟକ ରଖାଯାଇଥିଲା। ଅଭିଯୋଗ ପକ୍ଷର ମାମଲା ଅନୁସାରେ, ସୋହରାବୁଦ୍ଦିନ, ତାଙ୍କ ପତ୍ନୀ ଏବଂ ପ୍ରଜାପତି ହାଇଦ୍ରାବାଦରୁ ମହାରାଷ୍ଟ୍ରର ସାଙ୍ଗଲି ଯାଉଥିବା ଏକ ବସ୍ରେ ଯାତ୍ରା କରୁଥିବା ବେଳେ ୨୦୦୫ ନଭେମ୍ବର ୨୨-୨୩ ରାତିରେ ଏକ ପୁଲିସ ଦଳ ସେମାନଙ୍କୁ କଥିତ ଭାବେ ହେପାଜତକୁ ନେଇଥିଲା। ଏହି ଦମ୍ପତି ଓ ପ୍ରଜାପତିଙ୍କୁ ଅଲଗା ଅଲଗା ଗାଡ଼ିରେ ନିଆଯାଇଥିବା ଅଭିଯୋଗ ରହିଛି। ସିବିଆଇ ଅନୁସାରେ, ୨୦୦୫ ନଭେମ୍ବର ୨୬ରେ ଗୁଜରାଟ ଓ ରାଜସ୍ଥାନ ପୁଲିସ କର୍ମଚାରୀଙ୍କ ସମ୍ପୃକ୍ତି ଥିବା ଏକ ଏନ୍କାଉଣ୍ଟରରେ ଅହମଦାବାଦ ନିକଟରେ ସୋହରାବୁଦ୍ଦିନଙ୍କ ମୃତ୍ୟୁ ହୋଇଥିଲା। ଏହାର ତିନି ଦିନ ପରେ କୌସର ବିଙ୍କୁ ମଧ୍ୟ କଥିତ ଭାବେ ହତ୍ୟା କରାଯାଇଥିଲା। ପ୍ରଜାପତି ଉଦୟପୁର କେନ୍ଦ୍ରୀୟ କାରାଗାରରେ ଥିଲେ ଏବଂ କଥିତ ଏନ୍କାଉଣ୍ଟରର ଜଣେ ମୁଖ୍ୟ ସାକ୍ଷୀ ଭାବେ ତାଙ୍କୁ ବିବେଚନା କରାଯାଉଥିଲା। ୨୦୦୬ ଡିସେମ୍ବର ୨୭ରେ ଗୁଜରାଟ-ରାଜସ୍ଥାନ ସୀମା ନିକଟରେ ଏକ ପୁଲିସ ଏନ୍କାଉଣ୍ଟରରେ ପ୍ରଜାପତିଙ୍କ ମୃତ୍ୟୁ ହୋଇଥିଲା।
