୨ ଦିନିଆ ଭାରତ ଗସ୍ତରେ ଆସିବେ ରୁଷ ରାଷ୍ଟ୍ରପତି

ନୂଆଦିଲ୍ଲୀ : ଭାରତ ଗସ୍ତରେ ଆସିବେ ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ । ଡିସେମ୍ବର ୪ ରେ ଭାରତ ଆସିବେ I ୪ ଏବଂ ୫ ତାରିଖ ଦୁଇ ଦିନ ଭାରତରେ ରହିବେ I ୨୩ ତମ ଭାରତ ରୁଷ ବୈଠକରେ ଯୋଗ ଦେଇ ବାର୍ଷିକ ଶିଖର ସମ୍ମିଳନୀରେ ଭାଗ ନେବେ I ଏହି ସମୟରେ ସେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ମୋଦିଙ୍କ ସହ ଆଲୋଚନା କରିବେ । ଏନେଇ ଋଷିଆ ଗଣମାଧ୍ୟମ ପକ୍ଷରୁ ଖବର ପ୍ରକାଶ ପାଇଛି ।  ରୁଷ କର୍ତ୍ତୃପକ୍ଷ ଏକ ବିବୃତ୍ତିରେ କହିଛନ୍ତି, "ଦୁଇ ନେତା ରୁଷ-ଭାରତ ସମ୍ପର୍କର "ସମସ୍ତ ଦିଗ ଉପରେ ଆଲୋଚନା" କରିବେ ଏବଂ ଆଞ୍ଚଳିକ ଏବଂ ଅନ୍ତର୍ଜାତୀୟ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିବେ।"

ଗତ ଜୁଲାଇ ମାସରେ ୨୨ ତମ ଭାରତ-ରୁଷ ଦ୍ୱିପାକ୍ଷିକ ଆଲୋଚନାରେ ଭାଗ ନେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମସ୍କୋ ଗସ୍ତ କରିଥିଲେ I ଏହି ସମୟରେ ମୋଦୀ ଭ୍ଲାଦିମିର ପୁଟିନ୍ଙ୍କୁ ଭାରତ ଆସିବାକୁ ନିମନ୍ତ୍ରଣ କରିଥିଲେ ।

ଗତ କିଛି ଦିନ ଧରି ଭାରତ ଏବଂ ଋଷିଆର ସମ୍ପର୍କ ଅଧିକ ମଜବୁତ ହୋଇଛି । ରୁଷ୍ ତୈଳ କିଣାକୁ ନେଇ ଡୋନାଲ୍ଡ ଟ୍ରମ୍ପ ଭାରତ ଉପରେ ଟାରିଫ୍ ଲଦିଛନ୍ତି । ଏପରି ସ୍ଥିତିରେ ପୁଟିନ୍ଙ୍କ ଭାରତ ଗସ୍ତ ଗୁରୁତ୍ୱ ବହନ କରୁଛି । ବିଶେଷ କରି ପ୍ରତିରକ୍ଷା କ୍ଷେତ୍ରରେ ଦୁଇ ମଧ୍ୟରେ ଗୁରୁତ୍ୱପୂର୍ଣ୍ଣ ଆଲୋଚନା ହେବା ଆଶା କରାଯାଉଛି । 

ଗତ ଅଗଷ୍ଟ ମାସରେ ପୁଟିନଙ୍କ ଭାରତ ଗସ୍ତ ନେଇ ଘୋଷଣା ହୋଇଥିଲା । ମସ୍କୋ ଗସ୍ତରେ ଏନଏସଏ ଅଜିତ ଡୋଭାଲ ଯିବା ପରେ କ୍ରେମଲିନ୍ ପୁଟିନ ଗସ୍ତ ବାବଦରେ ସୂଚନା ଦେଇଥିଲା । କିନ୍ତୁ ସେତେବେଳେ ତାରିଖ ବାବଦରେ କିଛି କୁହାଯାଇନଥିଲା । ଏହାପରେ ଏସସିଓ ସମ୍ମିଳନୀରେ ମୋଦୀ ଏବଂ ପୁଟିନ ସାକ୍ଷାତ କରିଥିଲେ । ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଦୁଇ ନେତା ଆଲୋଚନା କରିଥିଲେ ।