କତାରରେ ବଡ଼ ଧରଣର ଆକ୍ରମଣ କଲା ଇରାନ
ଏଲ୍ଏନ୍ଜି ପ୍ଲାଣ୍ଟ୍ ଉପରେ କ୍ଷେପଣାସ୍ତ୍ର ମାଡ଼
ତେହେରାନ: ଇରାନ ଏବଂ ଇସ୍ରାଏଲ-ଆମେରିକା ଯୁଦ୍ଧ ଏବେ ଶକ୍ତି କ୍ଷେତ୍ରକୁ ମଧ୍ୟ ପ୍ରଭାବିତ କରିବା ଆରମ୍ଭ କରିଛି। ମଧ୍ୟପ୍ରାଚ୍ୟରେ ଏହି ଉତ୍ତେଜନା ଭାରତ ସମେତ ବିଶ୍ୱବ୍ୟାପୀ ପ୍ରଭାବ ପକାଉଛି। ଉପସାଗରୀୟ ଦେଶଗୁଡ଼ିକରେ ବଢୁଥିବା ଆକ୍ରମଣ ଭାରତର ଚିନ୍ତା ବଢ଼ିବାରେ ଲାଗିଛି। ଇରାନ ଏବେ ଶକ୍ତି ଭିତ୍ତିଭୂମିକୁ ଟାର୍ଗେଟ କରୁଥିବାରୁ ସ୍ଥିତି ସଙ୍କଟଜନକ ହେବାରେ ଲାଗିଛି।
ଇରାନ ବିଶ୍ୱର ସବୁଠାରୁ ବଡ଼ ଏଲ୍ଏନ୍ଜି ହବ୍ ମଧ୍ୟରୁ ଅନ୍ୟତମ କତାରର ରାସ ଲାଫାନ ଶିଳ୍ପାଞ୍ଚଳ ଉପରେ ଏକ କ୍ଷେପଣାସ୍ତ୍ର ଆକ୍ରମଣ କରିଛି। ଏହି ଆକ୍ରମଣରେ ଗ୍ୟାସ୍ ପ୍ଲାଣ୍ଟ୍ରେ ନିଆଁ ଲାଗିଯାଇ ବ୍ୟାପକ କ୍ଷତି ହୋଇଛି। ଯାହା ଫଳରେ କତାରକୁ ଅସ୍ଥାୟୀ ଭାବରେ ଏଲ୍ଏନ୍ଜି ଉତ୍ପାଦନ ବନ୍ଦ କରିବାକୁ ପଡିଛି। ଇସ୍ରାଏଲ ଇରାନର ଦକ୍ଷିଣ ପାର୍ସ ଗ୍ୟାସ୍ କ୍ଷେତ୍ର ଉପରେ ଆକ୍ରମଣ କରିବା ପରେ ଏହି ଘଟଣା ଘଟିଛି। ଯାହାର ପ୍ରତିଶୋଧ ସ୍ୱରୂପ ତେହେରାନ ଉପସାଗରୀୟ ଦେଶଗୁଡ଼ିକର ଶକ୍ତି ପ୍ରତିଷ୍ଠାନକୁ ଟାର୍ଗେଟ କରିବାକୁ ଧମକ ଦେଇଛି।
ଏହି ପରିସ୍ଥିତି ଭାରତ ପାଇଁ ବିଶେଷ ଗମ୍ଭୀର ହେବାରେ ଲାଗିଛି। ଭାରତ ନିଜର ଏଲ୍ଏନ୍ଜି ଆବଶ୍ୟକତା ପୂରଣ ପାଇଁ କତାର ଉପରେ ନିର୍ଭରଶୀଳ। ଭାରତ ବାର୍ଷିକ ପ୍ରାୟ ୨୭ ନିୟୁତ ଟନ୍ ଏଲ୍ଏନ୍ଜି ଆମଦାନୀ କରିଥାଏ। ସେଥି ମଧ୍ୟରୁ ପ୍ରାୟ ୪୬% କତାରରୁ ଆସିଥାଏ। ଏହା ବ୍ୟତୀତ, ପ୍ରାୟ ୨୪% ୟୁଏଇରୁ ଏବଂ ପ୍ରାୟ ୧୧% ଯୁକ୍ତରାଷ୍ଟ୍ରରୁ ଆସେ।ଓମାନ, ଆଙ୍ଗୋଲା ଏବଂ ନାଇଜେରିଆ ମଧ୍ୟ ଭାାରତକୂ ଏଲ୍ଏନ୍ଜି ଯୋଗାଇଥାନ୍ତି। ହର୍ମୁଜ୍ ପ୍ରଣାଳୀ ପାଖରେ ବୃଦ୍ଧି ପାଉଥିବା ଉତ୍ତେଜନା ଭାରତର ଶକ୍ତି ସୁରକ୍ଷାକୁ ଆହୁରି ବିପଦରେ ପକାଇଛି। ଏହି ଅଞ୍ଚଳରେ ଅନେକ ଭାରତୀୟ ଗ୍ୟାସ୍ ଟ୍ୟାଙ୍କର୍ ପୂର୍ବରୁ ଫସି ରହିଛି। ସରକାର ଧୀରେ ଧୀରେ ସେଗୁଡ଼ିକୁ ଦେଶକୁ ଆଣିବାକୁ ଚେଷ୍ଟା କରୁଛନ୍ତି।
ଭାରତ ସରକାର ବର୍ତ୍ତମାନ ଦେଶରେ ଗ୍ୟାସ୍ ଅଭାବକୁ ଅସ୍ୱୀକାର କରିଛନ୍ତି, କିନ୍ତୁ ଯଦି କତାରରେ ଆକ୍ରମଣ ବୃଦ୍ଧି ପାଏ ଏବଂ ଉତ୍ପାଦନ ପ୍ରଭାବିତ ହୁଏ, ତେବେ ଭାରତକୁ ଅନ୍ୟ ଦେଶଗୁଡ଼ିକରୁ ଅଧିକ ମହଙ୍ଗା ଏଲ୍ଏନ୍ଜି କିଣିବାକୁ ପଡ଼ିପାରେ। ଏହା ସିଧାସଳଖ ଘରୋଇ ରନ୍ଧନ ଗ୍ୟାସ୍ (ଏଲ୍ପିଜି) ମୂଲ୍ୟକୁ ପ୍ରଭାବିତ କରିବ ଏବଂ ସାଧାରଣ ଲୋକଙ୍କ ଉପରେ ଆର୍ଥିକ ବୋଝ ବୃଦ୍ଧି କରିପାରେ।
