ଏନ୍ଡିଏ ନବନିର୍ବାଚିତ ସାଂସଦଙ୍କ ସହ ପ୍ରଧାନମନ୍ତ୍ରୀଙ୍କ ଜଳଖିଆ ବୈଠକ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏନ୍ଡିଏରେ ନୂଆ କରି ଯୋଗ ଦେଇଥିବା ୨୬ ସାଂସଦଙ୍କ ସହ ଜଳଖିଆ ବୈଠକ କରି ସେମାନଙ୍କୁ ସଂସଦୀୟ ଆଲୋଚନାରେ ସକ୍ରିୟ ଭାଗ ନେବା ଏବଂ ବିକାଶ ଉପରେ ଗୁରୁତ୍ୱ ଦେବାକୁ ଆହ୍ୱାନ କରିଛନ୍ତି। ଉଦ୍ଧବ ସେନା ଛାଡ଼ି ସିନ୍ଦେ ସେନାରେ ଯୋଗ ଦେଇଥିବା ୬ ଜଣ ପୂର୍ବତନ ସାଂସଦଙ୍କ ସହ ମୋଦୀ ମରାଠୀରେ କଥା ହୋଇ ସମସ୍ତ ସହଯୋଗର ଆଶ୍ୱାସନ ଦେଇଥିଲେ। ସମ୍ବିଧାନ ସଂଶୋଧନ ବିଲ୍ ପାସ୍ କରିବା ପାଇଁ ଆବଶ୍ୟକ ସଂଖ୍ୟାଗରିଷ୍ଠତା ସୁନିଶ୍ଚିତ କରିବା ଲକ୍ଷ୍ୟରେ ବିଜେପିର ଏହା ଏକ ପଦକ୍ଷେପ ବୋଲି କୁହାଯାଉଛି। ସଂସଦର ମୌସୁମୀ ଅଧିବେଶନ ପ୍ରାୟ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଥିବା ପରିପ୍ରେକ୍ଷୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏନ୍ଡିଏରେ ନୂତନ ଭାବେ ଯୋଗଦେଇଥିବା ସାଂସଦମାନଙ୍କ ସହ ଜଳଖିଆ ବୈଠକ କରିଥିଲେ। ସେ ସେମାନଙ୍କୁ ସଂସଦୀୟ ଆଲୋଚନାରେ ସକ୍ରିୟ ଭାଗ ନେବାକୁ ଉତ୍ସାହିତ କରିବା ସହିତ, ନିକଟରେ ସିନ୍ଦେ ସେନାରେ ଯୋଗଦେଇଥିବା ଉଦ୍ଧବ ସେନାର ୬ ଜଣ ପୂର୍ବତନ ସାଂସଦଙ୍କୁ ‘ଚିନ୍ତା କରିବାର କୌଣସି କାରଣ ନାହିଁ’ ବୋଲି ଆଶ୍ୱାସନ ଦେଇଥିଲେ। ତୃଣମୂଳ କଂଗ୍ରେସ ଛାଡ଼ି ଏନଡିଏରେ ଯୋଗଦେଇଥିବା ୨୦ ଜଣ ଏନ୍ସିପି(ଆଇ) ସାଂସଦ ଏବଂ ସିନ୍ଦେ ସେନାରେ ଯୋଗଦେଇଥିବା ୬ ଜଣ ପୂର୍ବତନ ଉଦ୍ଧବ ସେନା ସାଂସଦଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ସେମାନେ ସଂସଦୀୟ ଆଲୋଚନାରେ ଅଂଶଗ୍ରହଣ କରନ୍ତୁ ଏବଂ ସଂସଦର ଇତିହାସକୁ ପଢ଼ନ୍ତୁ, ବୁଝନ୍ତୁ ଓ ଶିଖନ୍ତୁ। ମୋଦୀ କହିଛନ୍ତି, ସଂସଦର ଇତିହାସ ଉପରେ ବହୁ ମୂଲ୍ୟବାନ ସାମଗ୍ରୀ ଉପଲବ୍ଧ ଅଛି। ଆଲୋଚନା ପାଇଁ ପ୍ରସ୍ତୁତି କରିବାରେ ସେଗୁଡ଼ିକର ବ୍ୟବହାର କରନ୍ତୁ। ପ୍ରଧାନମନ୍ତ୍ରୀ ସାଂସଦମାନଙ୍କୁ ନିଜ ନିଜ ରାଜ୍ୟ ଓ ନିର୍ବାଚନମଣ୍ଡଳୀର ବିକାଶ ଉପରେ ଧ୍ୟାନ ଦେବାକୁ ମଧ୍ୟ ପରାମର୍ଶ ଦେଇଥିଲେ। ସେ ନୂତନ ଭାବେ ଯୋଗଦେଇଥିବା ଶିବ ସେନା ସାଂସଦମାନଙ୍କୁ ସରକାରଙ୍କ ସମସ୍ତ ସୁବିଧା ଓ ସମ୍ପଦର ସଠିକ୍ ବ୍ୟବହାର କରି ନିଜ ନିର୍ବାଚନମଣ୍ଡଳୀର ବିକାଶକୁ ତ୍ୱରାନ୍ୱିତ କରିବାକୁ କହିଥିଲେ। କୌଣସି ପ୍ରକଳ୍ପରେ ବାଧା ଆସିଲେ ସିଧାସଳଖ ପ୍ରଧାନମନ୍ତ୍ରୀ କାର୍ଯ୍ୟାଳୟ (ପିଏମ୍ଓ) ସହ ଯୋଗାଯୋଗ କରିବାକୁ ମଧ୍ୟ ପରାମର୍ଶ ଦେଇଥିଲେ। ମୋଦୀ କହିଛନ୍ତି, ନିଜ ନିଜ ରାଜ୍ୟର ବିକାଶ ପାଇଁ କାମ କରନ୍ତୁ। ରାଜ୍ୟର ବିକାଶ ହେଲେ ହିଁ ଦେଶର ବିକାଶ ହେବ। ଉଦ୍ଧବ ସେନା ଛାଡ଼ି ଗତ ମାସରେ ସିନ୍ଦେ ସେନାରେ ଯୋଗଦେଇଥିବା ୬ ଜଣ ସାଂସଦଙ୍କ ପାଇଁ ପ୍ରଧାନମନ୍ତ୍ରୀଙ୍କର ଏକ ବିଶେଷ ବାର୍ତ୍ତା ଥିଲା। ମୋଦୀ ସେମାନଙ୍କୁ ଆଶ୍ୱାସନ ଦେଇ କହିଥିଲେ, ’କାହାରି ଚିନ୍ତା କରିବାର ଆବଶ୍ୟକତା ନାହିଁ। ମୁଁ ଆପଣମାନଙ୍କ ସହିତ ଅଛି। ଏନ୍ଡିଏ ଏକ ପରିବାର। ଆମେ ଆମର ସହଯୋଗୀ ଦଳମାନଙ୍କ ସହ ସବୁବେଳେ ଅଛୁ। ପରେ ପ୍ରଧାନମନ୍ତ୍ରୀ ସିନ୍ଦେ ସେନାର ସାଂସଦମାନଙ୍କ ସହ ପୃଥକ ବୈଠକ କରିଥିଲେ ଏବଂ ମରାଠୀ ଭାଷାରେ ସେମାନଙ୍କ ସହ କଥା ହୋଇଥିଲେ। ଏନ୍ଡିଏରେ ସେମାନଙ୍କୁ ସ୍ୱାଗତ କରି ସେ କହିଥିଲେ, ‘ସମସ୍ତଙ୍କୁ ସମ୍ମାନ ମିଳିବ ଏବଂ ସମସ୍ତଙ୍କୁ ସୁଯୋଗ ଦିଆଯିବ। ପ୍ରଧାନମନ୍ତ୍ରୀ କହିଥିଲେ ଯେ ସେ କେବଳ ଏନଡିଏ ସଦସ୍ୟମାନଙ୍କ ସହ ନୁହେଁ, ବରଂ ପ୍ରତ୍ୟେକ ସାଂସଦଙ୍କ ସହ ଅଛନ୍ତି। ପୂର୍ବତନ ଉଦ୍ଧବ ସେନା ସାଂସଦମାନଙ୍କୁ ପୁଣିଥରେ ଆଶ୍ୱାସନ ଦେଇ ସେ କହିଥିଲେ ଯେ ସେମାନଙ୍କର ଚିନ୍ତା କରିବାର କୌଣସି କାରଣ ନାହିଁ। ମୌସୁମୀ ଅଧିବେଶନ ପୂର୍ବରୁ ସଂବିଧାନ ସଂଶୋଧନ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ବିଲ୍ଗୁଡ଼ିକ—ଯେପରିକି ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ପଦ ହଟାଇବା ଏବଂ ସୀମା ପୁନଃନିର୍ଦ୍ଧାରଣ ସମ୍ବନ୍ଧୀୟ ବିଲ୍ ଗୃହୀତ କରିବା ପାଇଁ ଆବଶ୍ୟକ ଦୁଇ-ତୃତୀୟାଂଶ ବହୁମତ ସୁନିଶ୍ଚିତ କରିବା ଉଦ୍ଦେଶ୍ୟରେ ବିଜେପି ଏନ୍ଡିଏର ପରିସର ବଢ଼ାଇବାକୁ ପ୍ରୟାସ କରୁଛି। ବିରୋଧୀ ଦଳରେ ବିଭାଜନ ପରେ ୨୬ ଜଣ ସାଂସଦ ଏନଡିଏରେ ଯୋଗଦେବାରୁ ଲୋକସଭାରେ ବିଜେପି ନେତୃତ୍ୱାଧୀନ ଏନ୍ଡିଏଶ ସଂଖ୍ୟା୨୯୩ରୁ ବଢ଼ି ୩୧୯ରେ ପହଞ୍ଚିଛି। ତଥାପି ବିଶେଷ ବହୁମତ ପାଇଁ ଆହୁରି ୪୧ଟି ଆସନର ଆବଶ୍ୟକତା ରହିଛି। ଏନଡିଏ ପୂର୍ବତନ ବିରୋଧୀ ସାଂସଦମାନଙ୍କୁ ସାର୍ବଜନୀନ ଭାବରେ ସ୍ୱାଗତ କରିଛି। ଟିଏମ୍ସିର ପୂର୍ବତନ ଘନିଷ୍ଠ ନେତ୍ରୀ ତଥା ବର୍ତ୍ତମାନ ଏନ୍ସିପିଆଇ ଅଧ୍ୟକ୍ଷ ଓ ମୁଖ୍ୟ ସଚେତକ କାକଳି ଘୋଷ ଦସ୍ତିଦାରଙ୍କୁ ଏନଡିଏ ସଂସଦୀୟ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଅମିତ ଶାହ, ରାଜନାଥ ସିଂହ ଓ ନିତିନ ଗଡକରୀଙ୍କ ସହ ସାମ୍ନା ଧାଡ଼ିରେ ବସାଯାଇଥିଲା।ନୂତନ ଯୋଗଦାନକାରୀ ସାଂସଦମାନଙ୍କ ସହ ପ୍ରଧାନମନ୍ତ୍ରୀଙ୍କ ବନ୍ଦ କକ୍ଷ ବୈଠକଠାରୁ ଆରମ୍ଭ କରି ସେମାନଙ୍କୁ ସାମ୍ନା ଧାଡ଼ିରେ ଆସନ ଦେବା ପର୍ଯ୍ୟନ୍ତ, ଏନଡିଏ ଏକ ସ୍ପଷ୍ଟ ବାର୍ତ୍ତା ଦେବାକୁ ଚେଷ୍ଟା କରିଛି ଯେ ନୂତନ ଭାବେ ଯୋଗଦେଇଥିବା ସାଂସଦମାନଙ୍କୁ ମଧ୍ୟ ମେଣ୍ଟର ପୁରୁଣା ସଦସ୍ୟମାନଙ୍କ ପରି ସଠିକ୍ ସମାନ ସମ୍ମାନ ଓ ଗୁରୁତ୍ୱ ଦିଆଯିବ।
