୬ ଦିନିଆ ବିଦେଶ ଗସ୍ତରେ ମୋଦୀ
ପ୍ରଥମ ଦିନରେ ୟୁଏଇରେ ପହଞ୍ଚିଲେ
ଆବୁଧାବି : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୬ ଦିନିଆ ବିଦେଶ ଯାତ୍ରାର ପ୍ରଥମ ଦିନରେ ଶୁକ୍ରବାର ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ପହଞ୍ଚିଛନ୍ତି। ବୈଶ୍ବିକ ଅସ୍ଥିରତା ମଧ୍ୟରେ ମୋଦୀ ପରବର୍ତ୍ତୀ ସମୟରେ ନେଦରଲ୍ୟାଣ୍ଡ, ସ୍ବିଡେନ୍, ନରୱେ ଓ ଇଟାଲୀ ଗସ୍ତରେ ଯାଇ ଭାରତ ସହିତ ଉକ୍ତ ଦେଶର ଦ୍ବିପାକ୍ଷିକ ସମ୍ପର୍କ ବୃଦ୍ଧି ଉପରେ ଆଲୋଚନା କରିବେ। ଆବୁଧାବିରେ ପ୍ରଧାନମନ୍ତ୍ରୀ ମୋଦୀଙ୍କୁ ଗାର୍ଡ଼ ଅଫ୍ ଅର୍ନର ସହ ସ୍ବାଗତ କରାଯାଇଥିଲା। ଏହାପୂର୍ବରୁ ମୋଦୀଙ୍କ ବିମାନ ୟୁଏଇର ବାୟୁସୀମାରେ ପ୍ରବେଶ କରିବା ପରେ ୟୁଏଇର ଏଫ୍୧୬ ଜେଟ୍ ପ୍ରଧାନମନ୍ତ୍ରୀଙ୍କୁ ଏସକର୍ଟ କରି ନେଇଥିଲା। ପ୍ରଧାନମନ୍ତ୍ରୀ ମୋଦୀ ଏହି ଗସ୍ତ ଅବସରରେ ୟୁଏଇରେ ରାଷ୍ଟ୍ରପତି ଶେଖ ମହମ୍ମଦ ବିନ୍ ଜାଏଦ ଅଲ୍ ନାହୟାନଙ୍କୁ ଭେଟିବା ସହିତ ପ୍ରତିନିଧିମଣ୍ଡଳ ସ୍ତରୀୟ ଆଲୋଚନା କରିଥିଲେ। ଭାରତ ଓ ୟୁଏଇ କେତେକ ବୁଝାମଣା ପତ୍ର ସ୍ବାକ୍ଷର କରିଥିଲେ। ରଣନୈତିକ ପ୍ରତିରକ୍ଷା ସହଭାଗିତା ପାଇଁ ଚୁକ୍ତିନାମା, ପେଟ୍ରୋଲିୟମ୍ ସଂରକ୍ଷଣ ସମ୍ପର୍କିତ ବୁଝାମଣା, ଏଲପିଜି ଯୋଗାଣ ପାଇଁ ଚୁକ୍ତିି, ଭାଡିନାର୍ରେ ଜାହାଜ ମରାମତି କ୍ଲଷ୍ଟର ନେଇ ବୁଝାମଣା, ଇଣ୍ଡିଆନ୍ ଇନଫ୍ରାଷ୍ଟ୍ରକ୍ଚର, ଆର୍ବିଏଲ୍ ବ୍ୟାଙ୍କ ଓ ସମ୍ମାନ କ୍ୟାପିଟାଲରେ ୫ ବିଲିୟନ ଆମେରିକୀୟ ଡଲାରର ନିବେଶ କରିବାକୁ ଘୋଷଣା କରାଯାଇଥିଲା। ଏହି ଅବସରରେ ମୋଦୀ ୟୁଏଇ ଉପରେ ଆକ୍ରମଣକୁ ତୀବ୍ର ନିନ୍ଦା କରିଥିଲେ। ପଶ୍ଚିମ ଏସିଆ ଯୁଦ୍ଧ ସମୟରେ ଦେଶରେ ଭାରତୀୟଙ୍କ ସୁରକ୍ଷା ଓ କଲ୍ୟାଣ ସୁନିଶ୍ଚିତ କରିବା ପାଇଁ ପ୍ରଧାନମନ୍ତ୍ରୀ ମୋଦୀ ଏମିରେଟ୍ସ ପ୍ରତି କୃତଜ୍ଞତା ପ୍ରକାଶ କରିଛନ୍ତି। ପଶ୍ଚିମ ଏସିଆ ଯୁଦ୍ଧ ପ୍ରଭାବ ସାରା ବିଶ୍ବରେ ପଡ଼ିଛି ବୋଲି ମୋଦୀ କହିବା ସହ ଭାରତ ପ୍ରତ୍ୟେକ ପରିସ୍ଥିତିରେ ୟୁଏଇ ସହିତ ଛିଡ଼ା ହୋଇଛି ଓ ଭବିଷ୍ୟତରେ ମଧ୍ୟ ଏହା ଜାରି ରହିବ ବୋଲି କହିଛନ୍ତି। ଉଲ୍ଲେଖଯୋଗ୍ୟ ପ୍ରଧାନମନ୍ତ୍ରୀ ମୋଦୀ ମେ ୧୫ରୁ ୧୭ ତାରିଖ ନେଦରଲ୍ୟାଣ୍ଡ, ମେ ୧୭ରୁ ୧୮ ସ୍ବିଡେନ୍, ମେ ୧୮ରୁ ୧୯ ତାରିଖ ପର୍ଯ୍ୟନ୍ତ ନରୱେ ଗସ୍ତ କରିବେ। ଏହାପରେ ମେ ୧୯ ଓ ୨୦ ତାରିଖରେ ଇଟାଲି ଯାଇ ନିଜ ଗସ୍ତ ଶେଷ କରିବାର କାର୍ଯ୍ୟକ୍ରମ ରହିଛି।
