ଜୁନ୍ରେ ମୋଦୀ-ଟ୍ରମ୍ପ ସାକ୍ଷାତ
ନୂଆଦିଲ୍ଲୀ: ଆସନ୍ତା ଜୁନ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ସାକ୍ଷାତ କାର୍ଯ୍ୟକ୍ରମ ରହିଛି। ଗତବର୍ଷ ଫେବ୍ରୁଆରିରେ ହ୍ବାଇଟ୍ ହାଉସରେ ଦୁଇ ନେତାଙ୍କ ଗୁରୁତ୍ବପୂର୍ଣ୍ଣ ସାକ୍ଷାତ ଆଲୋଚନା ପରଠାରୁ ଦୁଇ ରାଷ୍ଟ୍ରମୁଖ୍ୟ କୌଣସି ବିଶ୍ୱସ୍ତରୀୟ ସମ୍ମିଳନୀରେ ପରସ୍ପରକୁ ଭେଟିପାରି ନାହାନ୍ତି। ତେବେ ଆସନ୍ତା ଜୁନ୍ ମାସରେ ଫ୍ରାନ୍ସରେ ହେବାକୁ ଥିବା ଜି୭ ସମ୍ମିଳନୀରେ ମୋଦୀ ଓ ଟ୍ରମ୍ପ ପରସ୍ପରକୁ ଭେଟି ପାରନ୍ତି। ଟ୍ରମ୍ପଙ୍କ ଅପ୍ରତ୍ୟାଶିତ ଶୈଳୀ ଦୃଷ୍ଟିକୋଣରୁ ଜି-୭ ସମ୍ମିଳନୀ ବୈଠକ ଅବସରରେ ମୋଦୀ-ଟ୍ରମ୍ପଙ୍କ ମଧ୍ୟରେ ସ୍ବତନ୍ତ୍ର ବୈଠକକୁ ଅସ୍ୱୀକାର କରାଯାଇ ପାରିବ ନାହିଁ। କିନ୍ତୁ ଏହି ବୈଠକ ଭାରତ ଓ ଆମେରିକା ମଧ୍ୟରେ ବାଣିଜ୍ୟ କ୍ଷେତ୍ରରେ ଦେଖାଦେଇଥିବା ବିବାଦର ସମାଧାନ କରିପାରିବ କି? ଭାରତ ଜି୭ର ସ୍ଥାୟୀ ସଦସ୍ୟ ନୁହେଁ, କିନ୍ତୁ ଏହା ନିୟମିତ ଭାବରେ ଏକ ବିଶେଷ ନିମନ୍ତ୍ରିତ ସଦସ୍ୟ ଭାବରେ ବାର୍ଷିକ ଶିଖର ସମ୍ମିଳନୀରେ ଅଂଶଗ୍ରହଣ କରିଆସୁଛି। ଚଳିତ ବର୍ଷ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରଁନ୍ ପ୍ରଧାନମନ୍ତ୍ରୀ ମୋଦୀଙ୍କୁ ଜୁନ୍ ୧୫-୧୭ ରେ ଏଭିଆନ୍-ଲେସ୍-ବେନ୍ସରେ ଅନୁଷ୍ଠିତ ହେବାକୁ ଥିବା ଜି୭ ଶିଖର ସମ୍ମିଳନୀକୁ ନିମନ୍ତ୍ରଣ କରିଥିଲେ।
