ମଧ୍ୟରାତ୍ରିରେ ଆଫଗାନିସ୍ତାନରେ ୫.୫ ତୀବ୍ରତାର ଭୂକମ୍ପ: ନିଦରୁ ଉଠି ଲୋକ ବାହାରକୁ ଦୌଡ଼ିଲେ

କାବୁଲ: ଆଫଗାନିସ୍ତାନରେ ପୁଣି ଥରେ ଭୂକମ୍ପ ହୋଇଛି। ବୁଧବାର ବିଳମ୍ବିତ ରାତିରେ ଭୂକମ୍ପ ଯୋଗୁ ଲୋକେ ଆତଙ୍କିତ ହୋଇପଡ଼ିଥିଲେ। ଲୋକମାନେ ଗଭୀର ନିଦରେ ଶୋଇଥିବାବେଳେ ହଠାତ୍‌ ଭୂମି ଥରି ଉଠିଥିଲା। ଭୂମିକମ୍ପ ଯୋଗୁ ଶୋଇଥିବା ଲୋକେ ଭୟରେ ବାହାରକୁ ଦୌଡ଼ିଥିଲେ। ନ୍ୟାସନାଲ ସେଣ୍ଟର ଫର୍ ସିସମୋଲୋଜି ଏବଂ ଆମେରିକାର ଭୂତତ୍ତ୍ୱ ସର୍ବେକ୍ଷଣ ଅନୁଯାୟୀ,ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୫.୫ ରହିଛି ଭାରତୀୟ ସମୟ ପ୍ରାୟ ରାତି ୧୧:୨୭ ରେ ଭୂମିକମ୍ପ ଘଟିଥିବା ରେକର୍ଡ କରାଯାଇଥିଲା। ଭୂମିକମ୍ପର କେନ୍ଦ୍ରସ୍ଥଳ ଉତ୍ତର-ପୂର୍ବ ଆଫଗାନିସ୍ତାନର ଜୁର୍ମ ଅଞ୍ଚଳ ନିକଟରେ ଥିଲା। ବୈଜ୍ଞାନିକଙ୍କ ଅନୁସାରେ, ଭୂମିକମ୍ପ ଭୂମିର ବହୁତ ଗଭୀରତାରେ ହୋଇଥିଲା। ଭୂକମ୍ପ ୨୧୬.୭ କିଲୋମିଟର ଗଭୀରତା ମଧ୍ୟରେ ସୃଷ୍ଟି ହୋଇଥିବା ଆକଳନ କରାଯାଇଛି। ବିଶେଷଜ୍ଞମାନଙ୍କ ଅନୁସାରେ ଭୂମିକମ୍ପ ଅଧିକ ଗଭୀରତାରେ ସୃଷ୍ଟି ହେବା ଯୋଗୁ କମ୍ପନ ତୁଳନାତ୍ମକ ଭାବରେ କମ୍ ଥିଲା। ଫଳରେ ଏକ ବଡ଼ ବିପର୍ଯ୍ୟୟକୁ ଏଡାଇ ଦେଇଥିଲା। ଏପର୍ଯ୍ୟନ୍ତ କୌଣସି ଧନଜୀବନ ହାନିର ରିପୋର୍ଟ ହୋଇନାହିଁ। ଏହା ପୂର୍ବରୁ ଶନିବାର, ଜୁନ୍ ୨୭ ତାରିଖରେ, ଉତ୍ତର-ପୂର୍ବ ଆଫଗାନିସ୍ତାନରେ ଏକ ଶକ୍ତିଶାଳୀ ୬.୨ ତୀବ୍ରତାର ଭୂମିକମ୍ପ ହୋଇଥିଲା, ଯାହାର କେନ୍ଦ୍ରସ୍ଥଳ ବାଦାଖଶାନ ପ୍ରଦେଶ ଥିଲା। ଏହି ଭୂମିକମ୍ପ ପାକିସ୍ତାନ ଏବଂ ଉତ୍ତର ଭାରତ ପର୍ଯ୍ୟନ୍ତ ଅନୁଭୂତ ହୋଇଥିଲା। ସୂଚନାଯୋଗ୍ୟ,ଆଫଗାନିସ୍ତାନକୁ ବିଶ୍ୱର ସବୁଠାରୁ ଭୂମିକମ୍ପପ୍ରବଣ ଅଞ୍ଚଳ ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ।