ଜାପାନରେ ୭.୧ ତୀବ୍ରତାର ଭୂମିକମ୍ପ, ସୁନାମି ସତର୍କତା ଜାରି
ନୂଆଦିଲ୍ଲୀ: ଜାପାନର ଦକ୍ଷିଣ ପ୍ରମୁଖ ଦ୍ୱୀପ କ୍ୟୁସୁ ଏବଂ କୁମାମୋଟୋ ଉପକୂଳ ନିକଟରେ ମଙ୍ଗଳବାର ଅପରାହ୍ନରେ ରିକ୍ଟର ସ୍କେଲରେ ପ୍ରାଥମିକ ଭାବେ ୭.୧ ତୀବ୍ରତାର ଏକ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହା ପରେ ଜାପାନ ପାଣିପାଗ ବିଭାଗ (ଜେଏମ୍ଏ) ସୁନାମି ସତର୍କତା ଜାରି କରିଛି। ଜେଏମ୍ଏ ଅନୁଯାୟୀ ସ୍ଥାନୀୟ ସମୟ ଅପରାହ୍ନ ୪:୨୭ରେ ସମୁଦ୍ରତଳରୁ ପ୍ରାୟ ୧୦ କିଲୋମିଟର (୬ ମାଇଲ୍) ଗଭୀରତାରେ ଘଟିଥିଲା। ଜାପାନର ଶିନ୍ଦୋ ଭୂକମ୍ପ ତୀବ୍ରତା ମାପକରେ ଏହା ସର୍ବାଧିକ ୭ ସ୍ତର ପର୍ଯ୍ୟନ୍ତ କମ୍ପନ ସୃଷ୍ଟି କରିଥିବା କୁହାଯାଇଛି। କର୍ତ୍ତୃପକ୍ଷ ସତର୍କ କରିଛନ୍ତି ଯେ, ପ୍ରାୟ ୧ ମିଟର (୩ ଫୁଟ୍) ଉଚ୍ଚତାର ସୁନାମି ତରଙ୍ଗ ସନ୍ଧ୍ୟା ୫ଟା ସୁଦ୍ଧା କିଛି ଉପକୂଳ ଅଞ୍ଚଳରେ ପହଞ୍ଚିପାରେ। ସରକାରୀ ପ୍ରସାରଣ ସଂସ୍ଥା ଏନଏଚକେ ଖବର ଦେଇଛି ଯେ, କିଛି ସ୍ଥାନରେ ଏପରି ଉଚ୍ଚତାର ତରଙ୍ଗ ରେକର୍ଡ ହୋଇଥାଇପାରେ। ଜାପାନ ବିଶ୍ୱର ସବୁଠାରୁ ଅଧିକ ଭୂମିକମ୍ପପ୍ରବଣ ଦେଶମାନଙ୍କ ମଧ୍ୟରୁ ଗୋଟିଏ। ଏହା ପ୍ରଶାନ୍ତ ମହାସାଗରର ରିଙ୍ଗ ଅଫ୍ ଫାୟାର୍ ଅଞ୍ଚଳରେ ଥିବା ଚାରୋଟି ପ୍ରମୁଖ ଟେକ୍ଟୋନିକ୍ ପ୍ଲେଟ୍ର ସଙ୍ଗମସ୍ଥଳରେ ଅବସ୍ଥିତ। ଦେଶରେ ପ୍ରତିବର୍ଷ ଶହ ଶହ ଭୂମିକମ୍ପ ହୋଇଥାଏ ଏବଂ ବିଶ୍ୱର ପ୍ରାୟ ୧୮% ଭୂକମ୍ପୀୟ କାର୍ଯ୍ୟକଳାପ ଜାପାନରେ ଘଟେ। ଅଧିକାଂଶ ଭୂମିକମ୍ପ ଛୋଟ ହେଲେ ମଧ୍ୟ, ସେଗୁଡ଼ିକର ପ୍ରଭାବ ସ୍ଥାନ ଓ ଗଭୀରତା ଉପରେ ନିର୍ଭର କରେ। ନିକଟରେ, ଜୁନ୍ ୨୫ ତାରିଖରେ ଉତ୍ତର ଜାପାନରେ ୭.୨ ତୀବ୍ରତାର ଏକ ଭୂମିକମ୍ପ ହୋଇଥିଲା, ଯେଉଁଥିରେ କୌଣସି ମୃତ୍ୟୁ କିମ୍ବା ବଡ଼ କ୍ଷତି ହୋଇନଥିଲା। ସେହିପରି, ଚଳିତ ବର୍ଷ ଏପ୍ରିଲ୍ ମାସରେ ଉତ୍ତର ଜାପାନରେ ୭.୭ ତୀବ୍ରତାର ଭୂମିକମ୍ପରେ ଅତି କମରେ ୧୦ ଜଣ ଆହତ ହୋଇଥିଲେ। ଏହାର ପ୍ରଭାବ ଟୋକିଓର ଉଚ୍ଚ ଅଟ୍ଟାଳିକାଗୁଡ଼ିକରେ ମଧ୍ୟ ଅନୁଭୂତ ହୋଇଥିଲା। ଏହା ପରେ କର୍ତ୍ତୃପକ୍ଷ ୮.୦ କିମ୍ବା ତା’ଠାରୁ ଅଧିକ ତୀବ୍ରତାର ଭୂମିକମ୍ପର ଝଟ୍କା ବୃଦ୍ଧି ପାଇଥିବା ନେଇ ଏକ ସପ୍ତାହ ପର୍ଯ୍ୟନ୍ତ ସତର୍କତା ଜାରି କରିଥିଲେ।
