ଆଇଆଇଟି ବମ୍ବେ ଛାତ୍ର ଆତ୍ମହତ୍ୟା: ସିସିଟିଭି ଫୁଟେଜ୍ରେ ସାହିଲଙ୍କୁ ପରୀକ୍ଷା ହଲ୍ରୁ ବାହାରିବାକୁ କୁହାଯାଉଥିବା ଦୃଶ୍ୟ
ନୂଆଦିଲ୍ଲୀ : ସେପ୍ଟେମ୍ବର ୧୮ ତାରିଖର ନୂଆ ସିସିଟିଭି ଫୁଟେଜ୍ରେ ଆଇଆଇଟି ବମ୍ବେର ଏକ ପରୀକ୍ଷା ହଲ୍ରେ ସାହିଲ ୱାକୋଡେଙ୍କୁ ପଚରାଉଚରା କରାଯାଉଥିବା ଏବଂ ପରେ ବାହାରକୁ ନିଆଯାଉଥିବା ଦେଖାଯାଇଛି। ଏହାର କିଛି ସମୟ ପରେ ସେ ନିଜ ହଷ୍ଟେଲକୁ ଫେରିଥିଲେ ଏବଂ ପରେ ଆତ୍ମହତ୍ୟା କରିଥିଲେ। ମୁମ୍ବାଇ କ୍ରାଇମ୍ ବ୍ରାଞ୍ଚ ତାଙ୍କ ମୃତ୍ୟୁ ପୂର୍ବର ଘଟଣାକ୍ରମ ପୁନର୍ଗଠନ କରିବା ପାଇଁ ସିସିଟିଭି ଫୁଟେଜ୍ ଯାଞ୍ଚ କରିବା ସମୟରେ ଏହା ଦେଖିବାକୁ ମିଳିଛି। କ୍ୟାମେରାରେ ୨୨ ବର୍ଷୀୟ ସାହିଲଙ୍କୁ ପରୀକ୍ଷା ସମୟରେ ପଚରାଉଚରା କରାଯାଉଥିବା ଏବଂ ପରେ ପ୍ରାୟ ଦିନ ୧୨:୩୦ରୁ ୧୨:୪୫ ମଧ୍ୟରେ ପରୀକ୍ଷା ହଲ୍ରୁ ବାହାରିବା ଦେଖାଯାଇଛି। ପରୀକ୍ଷା ହଲ୍ରୁ ବାହାରିବା ପରେ ସାହିଲ କେଉଁ କେଉଁ ସ୍ଥାନକୁ ଯାଇଥିଲେ, ତାହା ଜାଣିବା ପାଇଁ କ୍ରାଇମ୍ ବ୍ରାଞ୍ଚ ଆଇଆଇଟି ବମ୍ବେ କ୍ୟାମ୍ପସ୍ର ବିଭିନ୍ନ ସ୍ଥାନର ଫୁଟେଜ୍ ଯାଞ୍ଚ କରୁଛି। ଉଲ୍ଲେଖଯୋଗ୍ୟ ଆଇଆଇଟି ବମ୍ବେର ଡିପାର୍ଟମେଣ୍ଟ ଅଫ୍ ଏନର୍ଜି ସାଇନ୍ସ ଆଣ୍ଡ ଇଞ୍ଜିନିୟରିଂର ଦ୍ୱିତୀୟ ବର୍ଷର ବିଟେକ୍ ଛାତ୍ର ସାହିଲଙ୍କ ମୃତଦେହ ସେପ୍ଟେମ୍ବର ୧୮ ତାରିଖରେ ତାଙ୍କ ହଷ୍ଟେଲ ରୁମ୍ରୁ ମିଳିଥିଲା। ତାଙ୍କ ମୃତ୍ୟୁ ପରେ ଆଇଆଇଟି ବମ୍ବେ କ୍ୟାମ୍ପସ୍ରେ ବିରୋଧ ପ୍ରଦର୍ଶନ ହୋଇଥିଲା। ତାଙ୍କ ପରିବାର ପକ୍ଷରୁ ଜାତିଭିତ୍ତିକ ଉତ୍ପୀଡ଼ନର ଅଭିଯୋଗ ମଧ୍ୟ କରାଯାଇଛି। ଆଇଆଇଟି ବମ୍ବେ ପ୍ରଥମେ କହିଥିଲା ଯେ ପରୀକ୍ଷା ସମୟରେ ସାହିଲ ମୋବାଇଲ୍ ଫୋନ୍ ବ୍ୟବହାର କରୁଥିବା ଧରାପଡ଼ିଥିଲେ ଏବଂ ଉତ୍ତର ପାଇବା ପାଇଁ ସେ ପ୍ରଶ୍ନପତ୍ର ଚାଟ୍ଜିପିଟିରେ ଅପଲୋଡ୍ କରିଥିବା ଅଭିଯୋଗ ଥିଲା। ପରେ ସଂସ୍ଥା ନିଜର ପୂର୍ବତନ ଯୋଗାଯୋଗ ପାଇଁ କ୍ଷମା ମାଗିଥିଲା। ତଦନ୍ତ ମାଧ୍ୟମରେ ପରିସ୍ଥିତି ସ୍ପଷ୍ଟ ହେବା ପୂର୍ବରୁ ତାଙ୍କ ମୃତ୍ୟୁ ପୂର୍ବର ଘଟଣାଗୁଡ଼ିକୁ ଏଭଳି ଭାବରେ ବର୍ଣ୍ଣନା କରିବା ଉଚିତ୍ ନଥିଲା ବୋଲି ସଂସ୍ଥା କହିଥିଲା।
