ସିଜେପି ଆନ୍ଦୋଳନକାରୀଙ୍କୁ ନୋଟିସ୍ ଦେବାରୁ ଗ୍ରେଟର ନୋଏଡା ମାଜିଷ୍ଟ୍ରେଟ୍‌ଙ୍କୁ ସିଜେଆଇଙ୍କ ଭର୍ତ୍ସନା

ନୂଆଦିଲ୍ଲୀ : ଜନ୍ତର ମନ୍ତରରେ ପ୍ରତିବାଦରେ ଯୋଗ ଦେଇଥିବା ଜଣେ ଛାତ୍ରଙ୍କୁ ନୋଟିସ୍ ଜାରି କରାଯାଇଥିବା ଘଟଣାରେ ସୁପ୍ରିମକୋର୍ଟ ଗ୍ରେଟର ନୋଏଡାର ଜଣେ ମାଜିଷ୍ଟ୍ରେଟ୍‌ଙ୍କଠାରୁ ସ୍ପଷ୍ଟୀକରଣ ମାଗିବେ। ଛାତ୍ରମାନଙ୍କ ବିରୋଧରେ ଦଣ୍ଡାତ୍ମକ କାର୍ଯ୍ୟାନୁଷ୍ଠାନକୁ କୋର୍ଟ ପୂର୍ବରୁ ସ୍ପଷ୍ଟ ଭାବେ ରୋକିଥିଲେ। ତେଣୁ ଏହି ନୋଟିସ୍ ଅଧିକାରୀଙ୍କ ଅତିରିକ୍ତ ହସ୍ତକ୍ଷେପ ନେଇ ପ୍ରଶ୍ନ ଉଠାଇଛି। ଭାରତର ପ୍ରଧାନ ବିଚାରପତି ସୂର୍ଯ୍ୟକାନ୍ତ କହିଛନ୍ତି, ଦିଲ୍ଲୀରେ ସିଜେପି ପ୍ରତିବାଦରେ ଯୋଗ ଦେଇଥିବା ଛାତ୍ରମାନଙ୍କୁ ଦଣ୍ଡାତ୍ମକ କାର୍ଯ୍ୟାନୁଷ୍ଠାନରୁ ସୁରକ୍ଷା ଦେବା ପାଇଁ ସୁପ୍ରିମକୋର୍ଟ ପୂର୍ବରୁ ଏକ ସ୍ପଷ୍ଟ ଆଦେଶ ଦେଇଥିଲେ। ବୁଧବାର ସୁପ୍ରିମକୋର୍ଟ ପ୍ରଶ୍ନ କରିଛନ୍ତି ଯେ, ୩୬ ଦିନ ଧରି ଚାଲିଥିବା ସିଜେପି ଆନ୍ଦୋଳନକୁ ନେଇ ଛାତ୍ରମାନଙ୍କ ବିରୋଧରେ ବଳପୂର୍ବକ କାର୍ଯ୍ୟାନୁଷ୍ଠାନ ନ କରିବାକୁ ପୂର୍ବରୁ ଆଦେଶ ଥିବା ସତ୍ତ୍ୱେ ଗ୍ରେଟର ନୋଏଡାର ଜଣେ ଏକ୍‌ଜିକ୍ୟୁଟିଭ୍ ମାଜିଷ୍ଟ୍ରେଟ୍ କିପରି ଜଣେ ଛାତ୍ରଙ୍କୁ ନୋଟିସ୍ ଦେଇପାରିଲେ। ଗୌତମ ବୁଦ୍ଧ ବିଶ୍ୱବିଦ୍ୟାଳୟର ଛାତ୍ର ଅକ୍ଷତ ତ୍ରିପାଠୀଙ୍କୁ ଦିଲ୍ଲୀରେ ସିଜେପି ପ୍ରତିବାଦରେ ଯୋଗ ଦେଇଥିବା ଯୋଗୁ ୫ ଲକ୍ଷ ଟଙ୍କାର ବ୍ୟକ୍ତିଗତ ବଣ୍ଡ୍ ଦେବାକୁ ନୋଟିସ୍ ଦିଆଯାଇଥିଲା। ପରେ ପୋଲିସ ଏହି ନୋଟିସ୍ ପ୍ରତ୍ୟାହାର କରିଥିଲା। ପୋଲିସର ଅଭିଯୋଗ ଥିଲା ଯେ, ଅକ୍ଷତ ଅନ୍ୟ ଛାତ୍ରମାନଙ୍କୁ ପ୍ରତିବାଦରେ ଯୋଗ ଦେବାକୁ ଉତ୍ସାହିତ କରିଥିଲେ। ତିନିଜଣିଆ ଖଣ୍ଡପୀଠର ନେତୃତ୍ୱ ନେଉଥିବା ସିଜେଆଇ ସୂର୍ଯ୍ୟକାନ୍ତ କହିଛନ୍ତି ଯେ, ଛାତ୍ରମାନଙ୍କୁ ଦଣ୍ଡାତ୍ମକ କାର୍ଯ୍ୟାନୁଷ୍ଠାନରୁ ସୁରକ୍ଷା ଦେବା ପାଇଁ ସୁପ୍ରିମକୋର୍ଟ ପୂର୍ବରୁ ଏକ ସ୍ପଷ୍ଟ ଆଦେଶ ଦେଇସାରିଛନ୍ତି। ଜଣେ ମାଜିଷ୍ଟ୍ରେଟ୍ ନୋଟିସ୍ ଜାରି କରିବାକୁ କିପରି ସାହସ କଲେ। ଆମେ ସ୍ପଷ୍ଟ କରିଥିଲୁ ଯେ କୌଣସି ଛାତ୍ରଙ୍କ ବିରୋଧରେ ବଳପୂର୍ବକ କାର୍ଯ୍ୟାନୁଷ୍ଠାନ ହେବ ନାହିଁ। କୌଣସି ମାଜିଷ୍ଟ୍ରେଟ୍ ଏହି ଆଦେଶକୁ ଉଲ୍ଲଂଘନ କରିପାରିବେ ନାହିଁ। ସେ କହିଥିଲେ ଯେ, ଗ୍ରେଟର ନୋଏଡାର ଏକ୍‌ଜିକ୍ୟୁଟିଭ୍ ମାଜିଷ୍ଟ୍ରେଟ୍ ଗୌତମ ବୁଦ୍ଧ ବିଶ୍ୱବିଦ୍ୟାଳୟର ଦ୍ୱିତୀୟ ବର୍ଷର ଛାତ୍ର ଅକ୍ଷତ ତ୍ରିପାଠୀଙ୍କୁ ଶାନ୍ତି ବଜାୟ ରଖିବା ପାଇଁ ୫ ଲକ୍ଷ ଟଙ୍କାର ବ୍ୟକ୍ତିଗତ ବଣ୍ଡ୍ କାହିଁକି ଦେବାକୁ ପଡ଼ିବ ନାହିଁ, ସେନେଇ ଜବାବ ଦେବାକୁ କହିଥିଲେ। ସିଜେଆଇ କାନ୍ତ କହିଥିଲେ ଯେ, ପୂର୍ବ ନିର୍ଦ୍ଦେଶ ସତ୍ତ୍ୱେ ଏଭଳି ନୋଟିସ୍ ଜାରି ହୋଇଥିବାରୁ କୋର୍ଟ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ସେ କହିଛନ୍ତି, ‘ଆମ ଯୁବକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନର ପ୍ରଶ୍ନ ହିଁ ଉଠେ ନାହିଁ। ଆମେ ଏକ ସ୍ପଷ୍ଟ ଆଦେଶ ଦେଇଛୁ। ଖଣ୍ଡପୀଠରେ ଜଷ୍ଟିସ୍ ଜୟମାଲ୍ୟ ବାଗଚୀ ଏବଂ ଜଷ୍ଟିସ୍ ଭି. ମୋହନା ମଧ୍ୟ ଅଛନ୍ତି। କୋର୍ଟ ଆଇନଜୀବୀଙ୍କୁ ସମସ୍ତ ତଥ୍ୟ ଓ ନୋଟିସ୍‌କୁ ରେକର୍ଡରେ ରଖିବାକୁ କହିଛନ୍ତି। ସମ୍ପର୍କିତ କର୍ତ୍ତୃପକ୍ଷଙ୍କଠାରୁ ସ୍ପଷ୍ଟୀକରଣ ମଗାଯିବ ବୋଲି ମଧ୍ୟ କହିଛନ୍ତି।