ଗୁରୁଗ୍ରାମରେ ଖୋଲିଲା ଏଲ୍ପିଜି ଏଟିଏମ୍
ଗୁରୁଗ୍ରାମ: ମଧ୍ୟପ୍ରାଚ୍ୟରେ ଯୁଦ୍ଧ ଉତ୍ତେଜନା ମଧ୍ୟରେ ସାରା ବିଶ୍ବରେ ଏବେ ତୈଳ ଏବଂ ଏଲ୍ପିଜି ସଙ୍କଟ ଦେଖାଦେଇଛି। ଏଭଳି ଏକ ଗୁରୁତ୍ବପୂର୍ଣ୍ଣ ସମୟରେ ଦେଶରେ ମଧ୍ୟ ଏଲ୍ପିଜିକୁ ନେଇ ସଙ୍କଟ ଉପୁଜିଛି। ଲୋକମାନେ ବୁକିଂ କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ଏହି ସମୟରେ, ସାଧାରଣ ଲୋକଙ୍କ ପାଇଁ ଗୁରୁଗ୍ରାମରେ ଏକ ନୂତନ ଏଲ୍ପିଜି ଏଟିଏମ୍ ସୁବିଧା ଆରମ୍ଭ ହୋଇଛି। ଏହା ୨ ରୁ ୩ ମିନିଟରେ ଏକ ଖାଲି ସିଲିଣ୍ଡର ବଦଳରେ ରିଫିଲ୍ ହୋଇଥିବା ସିଲିଣ୍ଡର ପ୍ରଦାନ କରିପାରୁଛି।ଏକ ରିପୋର୍ଟ ଅନୁଯାୟୀ, ଏହି ଏଟିଏମ୍ ମେସିନ୍ ଗୁରୁଗ୍ରାମର ସୋହନାର ସେକ୍ଟର -୩୩, ସେଣ୍ଟ୍ରାଲ୍ ପାର୍କ ଫ୍ଲାୱାର୍ ଭ୍ୟାଲିରେ ସ୍ଥାପିତ ହୋଇଛି । ଭାରତ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ (ବିପିସିଏଲ୍) ଦ୍ୱାରା ଏକ ପାଇଲଟ୍ ପ୍ରୋଜେକ୍ଟ ଭାବରେ ଏହା ଆରମ୍ଭ କରାଯାଇଛି। ଏହି ସ୍ମାର୍ଟ ଏଟିଏମ୍ ମେସିନରେ ସମ୍ପୂର୍ଣ୍ଣ ଏଲ୍ପିଜି ରିଫିଲ୍ ପ୍ରକ୍ରିୟା ଡିଜିଟାଲ୍ ଏବଂ ସ୍ୱୟଂଚାଳିତ ଭାବେ କାର୍ଯ୍ୟ କରୁଛି। ରିପୋର୍ଟ ଅନୁଯାୟୀ, ଏହି ମେସିନ୍ କମ୍ପୋଜିଟ୍ ଏଲ୍ପିଜି ସିଲିଣ୍ଡର ପ୍ରଦାନ କରୁଛି। ଯାହା ହାଲୁକା, ସ୍ବଚ୍ଛ ଏବଂ ବ୍ୟବହାର କରିବାକୁ ସହଜ। ସାଧାରଣ ଲୁହା ସିଲିଣ୍ଡରଗୁଡ଼ିକର ଓଜନ ଗ୍ୟାସ୍ ସହିତ ପ୍ରାୟ ୩୧ କିଲୋଗ୍ରାମ ଥିବାବେଳେ, ଏହି ଫାଇବର-ଆଧାରିତ କମ୍ପୋଜିଟ୍ ସିଲିଣ୍ଡରଗୁଡ଼ିକର ଓଜନ ୧୪ କିଲୋଗ୍ରାମ ଗ୍ୟାସ୍ ସହିତ ପ୍ରାୟ ୧୫ କିଲୋଗ୍ରାମ୍ ରହିଛି। ଏହା ବ୍ୟତୀତ, ଏହି ସିଲିଣ୍ଡରଗୁଡ଼ିକ ସ୍ୱଚ୍ଛ। ଫଳରେ ଭିତରେ ଥିବା ଗ୍ୟାସ୍ ସ୍ତର ଦେଖାଯାଉଛି।
ଏହି ମେସିନ୍ ଏକାବେଳେ ୧୦ଟି ଗ୍ୟାସ୍ ସିଲିଣ୍ଡର ସଂରକ୍ଷଣ କରିପାରିବ। ଯେତେବେଳେ ମେସିନ୍ରେ ଦୁଇଟି ସିଲିଣ୍ଡର ରହିବ ସେତେବେଳେ ଏହା ସ୍ୱୟଂଚାଳିତ ଭାବରେ ନିକଟସ୍ଥ ଗ୍ୟାସ୍ ଏଜେନ୍ସିକୁ ଏକ ସତର୍କ ସୂଚନା ପଠାଇବ। ଯାହା ଦ୍ଵାରା ନୂତନ ସିଲିଣ୍ଡରଗୁଡ଼ିକୁ ସମୟ ମଧ୍ୟରେ ଯୋଗାଣ କରାଯାଇପାରିବ। ଏହାର ସବୁଠାରୁ ବଡ଼ ସୁବିଧା ହେଉଛି ଏହା ୨୪ ଘଣ୍ଟା ଉପଲବ୍ଧ, ଯାହା ଦ୍ଵାରା ଗ୍ରାହକମାନେ ଡେଲିଭରି ପାଇଁ ଅପେକ୍ଷା ନକରି ଯେକୌଣସି ସମୟରେ ଗ୍ୟାସ୍ ସିଲିଣ୍ଡର ନେଇପାରିବେ। ସାଧାରଣତଃ କେବଳ ୨ ରୁ ୩ ମିନିଟ୍ ସମୟ ନେଉଛି। ଫଳରେ ଗ୍ୟାସ୍ ରିଫିଲ୍ କରିବା ସହଜ ଏବଂ ସୁବିଧାଜନକ ହୋଇପାରୁଛି।
