ସଡ଼କ ଦୁର୍ଘଟଣାରେ ଗ୍ୟାଙ୍ଗଷ୍ଟର ଅତିକ୍ ଆହମଦଙ୍କ ପୁଅଙ୍କ ମୃତ୍ୟୁ

ନୂଆଦିଲ୍ଲୀ : ଗ୍ୟାଙ୍ଗଷ୍ଟରରୁ ରାଜନେତା ପାଲଟିଥିବା ଏବଂ ପରେ ନିହତ ହୋଇଥିବା ଅତିକ୍ ଅହମଦଙ୍କ ପାଞ୍ଚ ପୁଅଙ୍କ ମଧ୍ୟରୁ ସବୁଠାରୁ ସାନ ଅବାନ୍‌ ଅହମଦ ଗୁରୁବାର ଉତ୍ତର ପ୍ରଦେଶର ଝାନ୍‌ସୀରେ ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଛନ୍ତି। ସେ ଜେଲରେ ଥିବା ତାଙ୍କ ଭାଇ ଅଲି ଆହମଦଙ୍କୁ ଦେଖିବା ପାଇଁ ଯାଉଥିଲେ ବୋଲି ପୋଲିସ ସୂଚନା ଦେଇଛି। ପୋଲିସର ପ୍ରାଥମିକ ସୂଚନା ଅନୁସାରେ, ଅବାନ୍‌ଙ୍କ ସହ ଆଉ ଚାରିଜଣ ଗାଡ଼ିରେ ଯାତ୍ରା କରୁଥିଲେ। ଗାଡ଼ିଟି ଜାତୀୟ ରାଜପଥର ଡିଭାଇଡରରେ ଧକ୍କା ଦେବାରୁ ଭୟଙ୍କର ଦୁର୍ଘଟଣା ଘଟିଥିଲା। ଧକ୍କା ଏତେ ଜୋରଦାର ଥିଲା ଯେ ଗାଡ଼ିର ଆଗ ଅଂଶ ସମ୍ପୂର୍ଣ୍ଣ ଭାବେ ଚୂର୍ଣ୍ଣବିଚୂର୍ଣ୍ଣ ହୋଇଯାଇଥିଲା। ଘଟଣାସ୍ଥଳରେ ଅବାନ୍‌ ଏବଂ ଗାଡ଼ିରେ ଥିବା ଅନ୍ୟ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିଲା। ଆହତ ହୋଇଥିବା ଅନ୍ୟ ତିନିଜଣଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ହସ୍ପିଟାଲକୁ ପଠାଯାଇଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏହି ଦଳ ପ୍ରୟାଗରାଜରୁ ଝାନ୍‌ସୀ ଯାଉଥିଲେ। ସେମାନଙ୍କ ଉଦ୍ଦେଶ୍ୟ ଥିଲା ଝାନ୍‌ସୀ ଜିଲ୍ଲା କାରାଗାରରେ ବନ୍ଦୀ ଥିବା ଅଲି ଆହମଦଙ୍କୁ ଭେଟିବା। ଅଲିଙ୍କୁ ୧ ଅକ୍ଟୋବର ୨୦୨୫ରେ ନୈନୀ କେନ୍ଦ୍ରୀୟ କାରାଗାରରୁ ଝାନ୍‌ସୀ ଜିଲ୍ଲା କାରାଗାରକୁ ସ୍ଥାନାନ୍ତର କରାଯାଇଥିଲା। ଅଲି ଆହମଦ ଏକ ଜବରଦସ୍ତି ଟଙ୍କା ଆଦାୟ ମାମଲାରେ ଆତ୍ମସମର୍ପଣ କରିବା ପରଠାରୁ କାରାଗାରରେ ଅଛନ୍ତି। ସେ ୨୦୨୩ ଫେବୃଆରିରେ ଉମେଶ ପାଲଙ୍କ ହତ୍ୟା ମାମଲାରେ ମଧ୍ୟ ଅଭିଯୁକ୍ତ। ଉମେଶ ପାଲ ବିଏସପି ବିଧାୟକ ରାଜୁ ପାଲ ହତ୍ୟା ମାମଲାର ପ୍ରମୁଖ ସାକ୍ଷୀ ଥିଲେ। ତଦନ୍ତକାରୀ ସଂସ୍ଥାମାନଙ୍କ ଅଭିଯୋଗ ଅନୁଯାୟୀ, ଏହି ହତ୍ୟା ଷଡଯନ୍ତ୍ର ଜେଲ ଭିତରୁ ରଚା ଯାଇଥିଲା।