ନେପାଳରେ ଆକସ୍ମିକ ବନ୍ୟା: ୧୦ ନିଖୋଜ, ୨ଟି ଜଳବିଦ୍ୟୁତ୍ ପ୍ରକଳ୍ପ କ୍ଷତିଗ୍ରସ୍ତ
କାଠମାଣ୍ଡୁ : ନେପାଳର ବୁଢ଼ୀ ଗଣ୍ଡକୀ ନଦୀରେ ଆସିଥିବା ଭୟାବହ ଆକସ୍ମିକ ବନ୍ୟା ଗୋରଖା ଜିଲ୍ଲାରେ ବ୍ୟାପକ କ୍ଷୟକ୍ଷତି ଘଟାଇଛି। ଆକସ୍ମିକ ବନ୍ୟାରେ ଏକ ଡଜନରୁ ଅଧିକ ଘର, ସେତୁ ଓ ଦୁଇଟି ଜଳବିଦ୍ୟୁତ୍ ପ୍ରକଳ୍ପ କ୍ଷତିଗ୍ରସ୍ତ ହେବା ପରେ ରବିବାର ପ୍ରାୟ ୫୦ ଜଣଙ୍କୁ ଉଦ୍ଧାର କରାଯାଇଛି। ନଦୀକୂଳରେ ରହୁଥିବା ଲୋକଙ୍କୁ ସତର୍କ ରହିବା ଏବଂ ସୁରକ୍ଷିତ ସ୍ଥାନକୁ ଚାଲିଯିବାକୁ ପ୍ରଶାସନ ପରାମର୍ଶ ଦେଇଛି। ତେବେ ଅତି କମ୍ରେ ୧୦ ଜଣ ଏବେ ବି ନିଖୋଜ ଅଛନ୍ତି। ଏପର୍ଯ୍ୟନ୍ତ କୌଣସି ମୃତାହତଙ୍କ ତତ୍କାଳ ଖବର ମିଳିନାହିଁ। ଗୋରଖା ଜିଲ୍ଲା ପ୍ରଶାସନ କାର୍ଯ୍ୟାଳୟର ସହକାରୀ ମୁଖ୍ୟ ଜିଲ୍ଲା ଅଧିକାରୀ ନେତ୍ର ପ୍ରସାଦ ଶର୍ମା କହିଛନ୍ତି ଯେ ନଦୀକୂଳରେ ରହୁଥିବା ଲୋକଙ୍କୁ ସତର୍କ ରହିବା ସହ ସୁରକ୍ଷିତ ସ୍ଥାନକୁ ଚାଲିଯିବାକୁ କୁହାଯାଇଛି। ‘କାଠମାଣ୍ଡୁ ପୋଷ୍ଟ’ର ରିପୋର୍ଟ ଅନୁଯାୟୀ, ଗଣ୍ଡକୀ ପ୍ରଦେଶର ସଲେରୀ, ପାଇୟୁକା ଓ ଜଗତ ନଦୀତଟ ଅଞ୍ଚଳରେ ବନ୍ୟା ଘରଗୁଡ଼ିକୁ ଭସାଇ ନେଇଛି। ଚୁମନୁବ୍ରୀ ଗ୍ରାମପାଳିକା-୩ର ୱାର୍ଡ ଅଧ୍ୟକ୍ଷ ରାମ କୁମାର ଗୁରୁଙ୍ଗଙ୍କ ଅନୁଯାୟୀ, ୱାର୍ଡକୁ ସଂଯୋଗ କରୁଥିବା ଏକ ଝୁଲା ସେତୁ ମଧ୍ୟ ଭାସିଯାଇଛି। ଅଗଷ୍ଟ ୨୬, ୨୦୨୬ରେ ଭୋଟେକୋଶୀ ଓ ତ୍ରିଶୂଳୀ ନଦୀରେ ଆସିଥିବା ଭୟାବହ ବନ୍ୟାର ପ୍ରାୟ ଦେଢ଼ ମାସ ପରେ ଏହି ବନ୍ୟା ଆସିଛି। ନେପାଳ ଏବେ ବି ଅଗଷ୍ଟ ମାସରେ ନେପାଳ-ଚୀନ୍ ପାର୍ବତ୍ୟ ସୀମା ଅଞ୍ଚଳରେ ଘଟିଥିବା ଭୟାବହ ବନ୍ୟାର କ୍ଷୟକ୍ଷତିରୁ ମୁକୁଳିବାକୁ ଚେଷ୍ଟା କରୁଛି। ସେହି ବନ୍ୟାରେ ୧,୪୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ଏବଂ ହଜାର ହଜାର ଲୋକ ନିଖୋଜ ଥିବା ରିପୋର୍ଟରେ କୁହାଯାଇଛି। ବୁଢ଼ୀ ଗଣ୍ଡକୀ ନଦୀରେ ହଠାତ୍ ବନ୍ୟା ଆସିବାର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡ଼ିନାହିଁ। ସ୍ଥାନୀୟ ଲୋକଙ୍କ ସନ୍ଦେହ ଅନୁଯାୟୀ, ଚୁମନୁବ୍ରୀ-୬ ଅଞ୍ଚଳର ଲୋକପା ଓ ଚୁମଲିଙ୍ଗ ମଧ୍ୟରେ ବୁଢ଼ୀ ଗଣ୍ଡକୀର ଏକ ଉପନଦୀ ସ୍ୟାର ଝରଣାର ପ୍ରବାହ ଅବରୋଧ ହୋଇଥାଇପାରେ। ଏହା ଫଳରେ ହଠାତ୍ ବନ୍ୟା ସୃଷ୍ଟି ହୋଇଥିବା ସେମାନେ ଆଶଙ୍କା କରୁଛନ୍ତି। ଗୋରଖା ଜିଲ୍ଲାର ବନ୍ୟା ପ୍ରଭାବିତ ଅଞ୍ଚଳରେ ସନ୍ଧାନ ଓ ଉଦ୍ଧାର କାର୍ଯ୍ୟ ପାଇଁ ନେପାଳ ସେନା ସମେତ ବିଭିନ୍ନ ସୁରକ୍ଷା ଏଜେନ୍ସିର କର୍ମଚାରୀଙ୍କୁ ମୁତୟନ କରାଯାଇଛି। ରବିବାର ନେପାଳ ସେନା ବନ୍ୟା ପ୍ରଭାବିତ ଅଞ୍ଚଳରୁ ୪୮ ଜଣଙ୍କୁ ଉଦ୍ଧାର କରିଛି। ବନ୍ୟା ଯୋଗୁଁ ଫସି ରହିଥିବା ଲୋକଙ୍କୁ ହେଲିକପ୍ଟର ସାହାଯ୍ୟରେ ସୁରକ୍ଷିତ ସ୍ଥାନକୁ ନିଆଯାଇଛି। ଉଦ୍ଧାର କାର୍ଯ୍ୟ ପାଇଁ ଚାରିଟି ହେଲିକପ୍ଟର ଓ ସ୍ଥଳଭାଗରେ ଉଦ୍ଧାରକାରୀ ଦଳକୁ ନିୟୋଜିତ କରାଯାଇଛି। ଗୋରଖା ଜିଲ୍ଲା ପ୍ରଶାସନ କାର୍ଯ୍ୟାଳୟର ପ୍ରଶାସନିକ ଅଧିକାରୀ ଚୁଡ଼ା ନିଧି ତିୱାରୀଙ୍କ ଅନୁଯାୟୀ, ଚୁମନୁବ୍ରୀରେ ପ୍ରାୟ ଏକ କିଲୋମିଟର ଲମ୍ବର ଭୂସ୍ଖଳନ ଘଟିଛି। ଏହି ଭୂସ୍ଖଳନରେ ପାଞ୍ଚଟି ଗୋରୁ ରଖିବା ଘର ଭାସିଯାଇଛି ଏବଂ ଅତି କମ୍ରେ ୧୦ ଜଣ କୃଷକ ନିଖୋଜ ହୋଇଯାଇଛନ୍ତି। ଚୁମନୁବ୍ରୀ-୩ର ସଲେରୀଠାରେ ନିର୍ମାଣାଧୀନ ୩୪୧ ମେଗାୱାଟ୍ କ୍ଷମତା ବିଶିଷ୍ଟ ବୁଢ଼ୀ ଗଣ୍ଡକୀ ଜଳବିଦ୍ୟୁତ୍ ପ୍ରକଳ୍ପର ନିର୍ମାଣ ଶିବିର ଓ କିଛି ଯନ୍ତ୍ରପାତି ବନ୍ୟାରେ ଭାସିଯାଇଛି। ଗୋରଖା ଜିଲ୍ଲାର ଚୁମନୁବ୍ରୀ ଗ୍ରାମପାଳିକାରେ ପ୍ରାରମ୍ଭିକ ରିପୋର୍ଟ ଅନୁଯାୟୀ ପ୍ରାୟ ୩୬ଟି ଘର ଭାସିଯାଇଛି ବୋଲି ନେତ୍ର ପ୍ରସାଦ ଶର୍ମା କହିଛନ୍ତି।
