ବିଜୟଙ୍କ ବିରୋଧରେ ମାନହାନୀ ଟିପ୍ପଣୀ ଦେଇ ଡିଏମ୍କେ ବିଧାୟକ ଗିରଫ
ଚେନ୍ନାଇ: ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ବିରୋଧରେ ମାନହାନୀ ଏବଂ ଧମକପୂର୍ଣ୍ଣ ମନ୍ତବ୍ୟ ଦେଇଥିବା ଅଭିଯୋଗରେ ଡିଏମ୍କେ ବିଧାୟକ ଜି. ଆର୍. ମାର୍କେଣ୍ଡିୟନଙ୍କୁ ପୋଲିସ ଗିରଫ କରିଛି। ତେବେ ଗିରଫଦାରୀକୁ ବିରୋଧ କରି ଡିଏମ୍କେ ସମର୍ଥକମାନେ ପୋଲିସ କାର୍ଯ୍ୟାନୁଷ୍ଠାନକୁ ବିରୋଧରେ ସ୍ଲୋଗାନ ଦେଇଥିଲେ। ମିଳିଥିବା ସୂଚନାନୁଯାୟୀ ମାର୍କେଣ୍ଡିୟନଙ୍କୁ ତୁତିକୋରିନ ଏସ୍ପି କାର୍ଯ୍ୟାଳୟରେ ପଚରାଉଚରା କରାଯାଉଛି। ଏହି ବିବାଦର ମୂଳରେ ରହିଛି ଜୁଲାଇ ୧୮ରେ ଆୟୋଜିତ ଏକ ସାର୍ବଜନୀନ ସଭା। ସେଠାରେ ମାର୍କେଣ୍ଡିୟନ ମୁଖ୍ୟମନ୍ତ୍ରୀ ବିଜୟଙ୍କ ‘ବାପାଙ୍କୁ ଖୋଜୁଛି’ ମନ୍ତବ୍ୟର ଜବାବ ଦେଇଥିଲେ। ଏହି ମନ୍ତବ୍ୟକୁ ଡିଏମ୍କେ ସଭାପତି ଏମ୍. କେ. ଷ୍ଟାଲିନଙ୍କୁ ପରୋକ୍ଷ ସମାଲୋଚନା ବୋଲି ବ୍ୟାପକ ଭାବେ ଦେଖାଯାଇଥିଲା। ଭାଷଣ ସମୟରେ ମାର୍କେଣ୍ଡିୟନ କହିଥିଲେ, ବିଧାନସଭାରେ ମୁଖ୍ୟମନ୍ତ୍ରୀ କହୁଛନ୍ତି ସେ ବାପାଙ୍କୁ ଖୋଜୁଛନ୍ତି। ଲଜ୍ଜାହୀନ ମୁଖ୍ୟମନ୍ତ୍ରୀ। ବିଧାନସଭାରେ ଆମେ ଆପଣଙ୍କୁ ଦେଖିନେବୁ। ସେ କହୁଛନ୍ତି ବିଧାନସଭାର ଦ୍ୱାର ବନ୍ଦ କରିଦେବେ। ସେ ଯଦି ଦ୍ୱାର ବନ୍ଦ କରନ୍ତି, ତାଙ୍କର ହାଡ଼ ଗୁଣ୍ଡ ହୋଇଯିବ। ସେ ବିଧାନସଭାକୁ ବନ୍ଦ କରି ଦେଖନ୍ତୁ। ଏହାପରେ ଟିଭିକେର ଜଣେ ପଦାଧିକାରୀ ପୋଲିସରେ ଅଭିଯୋଗ ଦାଖଲ କରିଥିଲେ। ଏହାପୂର୍ବରୁ ଚଳିତ ମାସରେ ତିରୁଚେନ୍ଦୁରର ଡିଏମ୍କେ ବିଧାୟକ ଅନୀତା ରାଧାକୃଷ୍ଣନଙ୍କୁ ମଧ୍ୟ ମୁଖ୍ୟମନ୍ତ୍ରୀଙ୍କ ବିରୋଧରେ ମନ୍ତବ୍ୟ ଦେଇଥିବା ଅଭିଯୋଗରେ ଗିରଫ କରାଯାଇଥିଲା। ପରେ ସେହି ଦିନ ତାଙ୍କୁ ଜାମିନରେ ମୁକ୍ତ କରାଯାଇଥିଲା।
