ଲଗାଣ ବର୍ଷାରେ ଦିଲ୍ଲୀ ଅଚଳ , ରାସ୍ତା ପାଲଟିଲା ନଦୀ, ୩ ମୃତ

ନୂଆଦିଲ୍ଲୀ : ଗୁରୁବାର ରାତିସାରା ଦିଲ୍ଲୀରେ ପ୍ରବଳ ବର୍ଷା ହେବାଦ୍ବାରା ସହରର ବହୁ ଅଂଶ ଜଳମଗ୍ନ ହୋଇଯାଇଛି। ରାସ୍ତା ଉପରେ ପାଣିର ଶୁଅ ଛୁଟୁଛି ଯାହା ନଦୀର ଭ୍ରମ ସୃଷ୍ଟି କରୁଛି। ପ୍ରବଳ ବର୍ଷା ଯୋଗୁ ଅନେକ ଗଛ ଉପୁଡ଼ି ପଡ଼ିଛି। ଯାତାୟାତ ବାଧାପ୍ରାପ୍ତ ହୋଇଛି ଏବଂ ଏକ କୋଠା ମଧ୍ୟ ଭୁଶୁଡ଼ି ପଡ଼ିଛି। ଭାରତୀୟ ପାଣିପାଗ ବିଭାଗ (ଆଇଏମ୍‌ଡି) ଦିନସାରା ପ୍ରବଳ ବର୍ଷା, ଝଡ଼ ଏବଂ ବଜ୍ରପାତର ଆଶଙ୍କା ନେଇ ରେଡ୍ ଆଲର୍ଟ ଜାରି କରିଛି। ଅବିଶ୍ରାନ୍ତ ବର୍ଷା ସହରର ଡ୍ରେନେଜ୍ ସିଷ୍ଟମକୁ ବୁଡ଼ାଇ ଦେଇଥିବାରୁ ରାସ୍ତାଗୁଡ଼ିକ ଝରଣା ପରି ଦେଖାଯାଉଥିଲା।ରୋହିଣୀରେ ସବୁଠାରୁ ଖରାପ ଦୁଃଖଦ ଘଟଣା ଘଟିଛି, ଯେଉଁଠାରେ ପ୍ରବଳ ବର୍ଷା ମଧ୍ୟରେ ଏକ ନିର୍ମାଣାଧୀନ ଚାରି ମହଲା କୋଠା ଭୁଶୁଡ଼ି ପଡ଼ିବାରୁ ତିନି ଜଣଙ୍କର ମୃତ୍ୟୁ ହୋଇଛି। ଆଇଏମଡି ଅନୁଯାୟୀ , ଦିଲ୍ଲୀର ସଫଦରଜଙ୍ଗ ସ୍ଥିତ ବେସ୍ ୱେଦର ଷ୍ଟେସନରେ ସକାଳ ୮.୩୦ ରେ ଶେଷ ହୋଇଥିବା ୨୪ ଘଣ୍ଟା ମଧ୍ୟରେ ୭୨.୬ ମିମି ବର୍ଷା ରେକର୍ଡ କରାଯାଇଛି। ସେହି ସମୟ ମଧ୍ୟରେ ଲୋଧି ରୋଡରେ ୮୦.୨ ମିମି, ରିଜରେ ୭୭.୮ମିମି, ପାଲମରେ ୬୩ ମିମି ଏବଂ ଆୟାନଗରରେ ୫୭.୪ ମିମି ବର୍ଷା ରେକର୍ଡ କରାଯାଇଛି। ସହରର ବିଭିନ୍ନ ସ୍ଥାନରେ ଜଳବନ୍ଦୀ ହୋଇଥିବା ସୂଚନା ମିଳିଛି। ଯେପରିକି ସଦର ବଜାର, ଗ୍ରେଟର କୈଳାସ, ବଦରପୁର, ନାସିରପୁର, ତେଲିୱାରା, ମହାବୀର ବଜାର, ସ୍ୱରୂପ ନଗର, କୁଶକ ରୋଡ୍, ମୁନିରକା, ଦ୍ୱାରକା, ବିକାଶ ମାର୍ଗ, ପୂର୍ବ ଦିଲ୍ଲୀ ଏବଂ ନୂଆଦିଲ୍ଲୀ ରେଳ ଷ୍ଟେସନ ଅଞ୍ଚଳ ଗୁଡ଼ିକ ଜଳମଗ୍ନ ହୋଇଯାଇଛି।