ନୂଆଦିଲ୍ଲୀ : ଦିଲ୍ଲୀ ସରକାର ରବିବାର ଦିନ ଗୋଦାମରୁ ସିଧାସଳଖ ଏଲପିଜି ସିଲିଣ୍ଡର ବିକ୍ରୟ ଉପରେ କଡ଼ା ନିଷେଧ ଘୋଷଣା କରିଛନ୍ତି ଏବଂ ଉଲ୍ଲଂଘନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଛନ୍ତି। ଏକ ସରକାରୀ ବିବୃତ୍ତିରେ, ମୁଖ୍ୟମନ୍ତ୍ରୀ ରେଖା ଗୁପ୍ତା କହିଛନ୍ତି ଯେ ଏଲପିଜି ଯୋଗାଣ ସଙ୍କଟକୁ ରୋକିବା ଏବଂ ନିୟମ ପାଳନ ସୁନିଶ୍ଚିତ କରିବା ପାଇଁ କଡ଼ା ନଜର ରଖାଯାଇଛି। ଗୁପ୍ତା ଏକ ବିବୃତ୍ତିରେ କହିଛନ୍ତି, ‘ନିର୍ଦ୍ଦିଷ୍ଟ ସମୟ ମଧ୍ୟରେ ବୁକ୍ ହୋଇଥିବା ସିଲିଣ୍ଡର ଘରକୁ ପହଞ୍ଚାଯାଉଥିବାରୁ ବାସିନ୍ଦାମାନଙ୍କୁ ଗ୍ୟାସ୍ ଏଜେନ୍ସି କିମ୍ବା ଷ୍ଟୋରେଜ୍ ପଏଣ୍ଟକୁ ନ ଯିବା କିମ୍ବା ଭିଡ଼ ଜମା ନ କରିବାକୁ ପରାମର୍ଶ ଦିଆଯାଇଛି। ବିବୃତ୍ତି ଅନୁଯାୟୀ, ତୈଳ ବିପଣନ କମ୍ପାନୀଗୁଡ଼ିକ ବିତରକମାନଙ୍କୁ ନିର୍ଦ୍ଦେଶ ଜାରି କରିଛନ୍ତି, ଯେଉଁଥିରେ କୁହାଯାଇଛି ଯେ ସଂରକ୍ଷଣ ସ୍ଥାନରୁ ଯେକୌଣସି ସିଧାସଳଖ ବିକ୍ରୟ ବେଆଇନ। ଏହି ସମୟରେ, ସରକାର କହିଛନ୍ତି ଯେ ଯୋଗାଣରେ ଉନ୍ନତି ଆଣିବା ପାଇଁ, ବିଶେଷକରି ପ୍ରବାସୀ ଶ୍ରମିକଙ୍କ ପାଇଁ ୫ କିଲୋଗ୍ରାମ ଏଲପିଜି ସିଲିଣ୍ଡରର ଉପଲବ୍ଧତାକୁ ବିସ୍ତାର କରାଯାଇଛି। ଏହି ସିଲିଣ୍ଡରଗୁଡ଼ିକ ଏବେ ବୈଧ ପରିଚୟପତ୍ର ଦେଖାଇ ଗ୍ୟାସ୍ ଏଜେନ୍ସିଗୁଡ଼ିକରୁ କିଣାଯାଇପାରିବ, ଠିକଣା ଯାଞ୍ଚର ଆବଶ୍ୟକତା ନାହିଁ। ନିକଟବର୍ତ୍ତୀ ବିତରକମାନଙ୍କ ବିଷୟରେ ଗ୍ରାହକମାନଙ୍କୁ ମାର୍ଗଦର୍ଶନ କରିବା ପାଇଁ କିଛି ଚୟନିତ ଏଚପିସିଏଲ ଆଉଟଲେଟ୍‌ରେ ଏଗାରଟି ସହାୟତା ଡେସ୍କ ମଧ୍ୟ ସ୍ଥାପନ କରାଯାଇଛି ବୋଲି ବିବୃତିରେ କୁହାଯାଇଛି।  ୪ ଏପ୍ରିଲରେ, ୧,୧୪,୬୭୯ଟି ଏଲପିଜି ବୁକିଂ ରେକର୍ଡ କରାଯାଇଥିଲା, ଯେତେବେଳେ ୧,୩୧,୩୩୫ଟି ସିଲିଣ୍ଡର ବିତରଣ କରାଯାଇଥିଲା।