ପାକିସ୍ତାନରେ ଆତ୍ମଘାତୀ ବିସ୍ଫୋରଣରେ ୨୧ ମୃତ
ପେଶାୱାର: ଉତ୍ତର-ପଶ୍ଚିମ ପାକିସ୍ତାନର ଏକ ସୁରକ୍ଷା ପୋଷ୍ଟରେ ଆତ୍ମଘାତୀ ବିସ୍ଫୋରଣ ହୋଇ ୨୧ ଜଣଙ୍କ ମୃତ୍ୟୁ ଘଟିଛି।। ପାକିସ୍ତାନୀ ତାଲିବାନର ଏକ ଆତ୍ମଘୋଷିତ ତଥା ବିଭାଜିତ ଗୋଷ୍ଠୀ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି। ବରିଷ୍ଠ ପୁଲିସ ଅଧିକାରୀ ସଜ୍ଜାଦ ଖାନଙ୍କ ଅନୁଯାୟୀ, ଶନିବାର ବିଳମ୍ବିତ ରାତିରେ ଆଫଗାନିସ୍ତାନ ସୀମାନ୍ତବର୍ତ୍ତୀ ଖୈବର ପଖତୁନଖ୍ୱା ପ୍ରଦେଶର ବାନୁ ଜିଲ୍ଲାର ଏକ ସୁରକ୍ଷା ପୋଷ୍ଟ ନିକଟରେ ଜଣେ ଆତ୍ମଘାତୀ ଆତଙ୍କୀ ଏକ ବିସ୍ଫୋରକ ଭର୍ତ୍ତି କାର୍ ଧରି ଆକ୍ରମଣ କରିଥିଲା। ଏହି ଆକ୍ରମଣ ପରେ ତୀବ୍ର ଗୁଳିବିନିମୟ ହୋଇଥିଲା ଏବଂ ଏଥିରେ କିଛି ଅଧିକାରୀ ନିହତ ହୋଇଥିଲେ। ଅନ୍ୟମାନେ ପରେ କୋଠା ଭୁଶୁଡ଼ିବା ପରେ ମୃତ୍ୟୁ ବରଣ କରିଥିଲେ। ଉଦ୍ଧାରକାରୀମାନେ ଭଗ୍ନାବଶେଷ ତଳୁ ମୃତଦେହ ଉଦ୍ଧାର କରିବା ପାଇଁ ଭାରୀ ଯନ୍ତ୍ରପାତି ବ୍ୟବହାର କରି ଏକ ଘଣ୍ଟା ଧରି ସର୍ଚ୍ଚ ଅପରେସନ୍ କରିଥିଲେ। ଅପରାଧୀଙ୍କୁ ଟ୍ରାକ୍ କରିବା ପାଇଁ ସୁରକ୍ଷା ବାହିନୀ ମଧ୍ୟ ଏକ ଅପରେସନ୍ ଆରମ୍ଭ କରିଛି। ଏକ ନୂତନ ଆତଙ୍କବାଦୀ ଗୋଷ୍ଠୀ, ଇତ୍ତେହାଦ୍-ଉଲ୍-ମୁଜାହିଦ୍ଦିନ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି। ତେହେରିକ୍-ଏ-ତାଲିବାନ ପାକିସ୍ତାନ (ଟିଟିପି) ନାମରେ ଜଣାଶୁଣା ପାକିସ୍ତାନୀ ତାଲିବାନର ଏହା ଏକ ବିଭାଜିତ ଗୋଷ୍ଠୀ ବୋଲି ସେମାନେ ଦାବି କରୁଥିବାବେଳେ କର୍ତ୍ତୃପକ୍ଷ ଏହାକୁ ଟିଟିପିର ସାମ୍ମୁଖ୍ୟ ବୋଲି ଅଭିଯୋଗ କରିଛନ୍ତି।
