ବିଏସ୍ଏଫ୍ ଯବାନ୍ଙ୍କୁ ଅପହରଣ କଲେ ବାଂଲାଦେଶୀ ଗୋ ତସ୍କର
କୋଲକାତା/ଢାକା: ଭାରତ-ବାଂଲାଦେଶ ସୀମାରେ ଏବେ ଗୋ ତସ୍କରମାନେ ସକ୍ରିୟ ହୋଇଯାଇଛନ୍ତି। ଗତକାଲି ଭୋର୍ ସମୟରେ ଘନ କୁହୁଡ଼ିର ଫାଇଦା ଉଠାଇ କିଛି ବାଂଲାଦେଶୀ ଗୋ ତସ୍କର ବିଏସ୍ଏଫ୍ର ଜଣେ ଯବାନ୍ଙ୍କୁ ଅପହରଣ କରି ନେଇଥିଲେ। ଯବାନଙ୍କୁ ବାଂଲାଦେଶ ଆଡ଼କୁ ନିଆଯାଇଥିଲା ଏବଂ ପରେ ତସ୍କରମାନେ ତାଙ୍କୁ ବାଂଲାଦେଶ ବର୍ଡର ଗାର୍ଡ (ବିଜିବି) ହାତରେ ସମର୍ପଣ କରିଦେଇଥିଲେ। ଯବାନ ପୂରାପୂରି ସୁରକ୍ଷିତ ଅଛନ୍ତି ଏବଂ ତାଙ୍କ ଫେରିବା ପ୍ରକ୍ରିୟା ଚାଲିଛି। ଏହି ଘଟଣା ପଶ୍ଚିମବଂଗର କୋଚବିହାର ଜିଲ୍ଲାର ମେଖଲିଗଞ୍ଜ ଅଞ୍ଚଳରେ ଅନ୍ତର୍ଜାତୀୟ ସୀମା ନିକଟରେ ଭୋର ପ୍ରାୟ ୪:୪୫ରେ ଘଟିଥିଲା। ବିଏସ୍ଏଫ୍ ସୂତ୍ର ଅନୁଯାୟୀ, ଯବାନଙ୍କ ନାମ ବେଦ ପ୍ରକାଶ, ଯିଏ ୧୭୪ ବଟାଲିୟନରେ ତାଲିମପ୍ରାପ୍ତ ଏବଂ ଅର୍ଜୁନ କ୍ୟାମ୍ପ ସହ ଜଡ଼ିତ। ଘନ କୁହୁଡ଼ି ଯୋଗୁଁ ଦୃଶ୍ୟମାନତା କମ୍ ହେବାରୁ ତସ୍କରମାନେ ଏହି ସୁଯୋଗ ପାଇଥିଲେ। ଘଟଣାର ଖବର ପାଇବା ମାତ୍ରେ ବିଏସ୍ଏଫ୍ ତୁରନ୍ତ ବିଜିବି ସହ ଯୋଗାଯୋଗ କରିଥିଲା। ବାଂଲାଦେଶୀ ପକ୍ଷ ଆଶ୍ୱାସନ ଦେଇ କହିଛନ୍ତି ଯେ ଯବାନ ସୁରକ୍ଷିତ ଅଛନ୍ତି ଏବଂ କୌଣସି କ୍ଷତି ହୋଇନାହିଁ। ସେ ବର୍ତ୍ତମାନ ବିଜିବିର ଆଙ୍ଗାରପୋଟା ବିଓପିରେ ଅଛନ୍ତି।
