ଆସାମର ‘ଆଇରନ୍ ଲେଡି’ ସିଆରପିଏଫ୍ ଜଙ୍ଗଲ ଯୁଦ୍ଧ ବାହିନୀର ପ୍ରଥମ ମହିଳା ମୁଖ୍ୟ
ଗୌହାଟୀ : ୨୦୦୬ ବ୍ୟାଚ୍ର ଆଇପିଏସ୍ ଅଧିକାରୀ ସଞ୍ଜୁକ୍ତା ପରାଶର ସିଆରପିଏଫ୍ର କୋବ୍ରା ୟୁନିଟ୍ର ଇନ୍ସପେକ୍ଟର ଜେନେରାଲ୍ (ଆଇଜି) ଭାବେ ଦାୟିତ୍ୱ ଗ୍ରହଣ କରିଛନ୍ତି। ଏଥିସହ ସେ ଏହି ବିଶେଷ ଜଙ୍ଗଲ ଯୁଦ୍ଧ ବାହିନୀର ପ୍ରଥମ ମହିଳା କମାଣ୍ଡର ହୋଇଛନ୍ତି। ଆସାମରେ ଆତଙ୍କବାଦ ଓ ବିଦ୍ରୋହ ବିରୋଧୀ ଅଭିଯାନରେ ତାଙ୍କର ଦୀର୍ଘ ଅଭିଜ୍ଞତା ଥିବାରୁ ଏହି ନିଯୁକ୍ତିକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି। କୋବ୍ରାର ସମ୍ପୂର୍ଣ୍ଣ ନାମ ହେଉଛି କମାଣ୍ଡୋ ବାଟାଲିଅନ ଫର୍ ରିସୋଲ୍ୟୁଟ୍ ଆକ୍ସନ୍। ଏହାକୁ ବିଶେଷ ଭାବରେ ଗୁରିଲ୍ଲା ଯୁଦ୍ଧ ଏବଂ ଜଙ୍ଗଲ ଯୁଦ୍ଧ ପାଇଁ ପ୍ରଶିକ୍ଷଣ ଦିଆଯାଏ। ଘଞ୍ଚ ଜଙ୍ଗଲରେ ଦୀର୍ଘ ଦୂରତାର ଅଭିଯାନ, ଆକସ୍ମିକ ଆକ୍ରମଣ , ପ୍ରତି-ଆକ୍ରମଣ, ଆଇଇଡି ବିପଦର ମୁକାବିଲା, ଗୁଇନ୍ଦା ସୂଚନା ଆଧାରିତ ଅପରେସନ୍ ଏବଂ ସଶସ୍ତ୍ର ଉଗ୍ରବାଦୀଙ୍କ ବିରୋଧରେ ନିର୍ଦ୍ଦିଷ୍ଟ ଅଭିଯାନ ଚଳାଇବାରେ ଏହି ବାହିନୀ ଗୁରୁତ୍ବପୂରର୍ଣ୍ଣ ଭୂମିକା ନିର୍ବାହ କରେ। ସଞ୍ଜୁକ୍ତା ପରାଶରଙ୍କ ଆସାମରେ ବିଦ୍ରୋହ ପ୍ରଭାବିତ ଅଞ୍ଚଳରେ ଥିବା ଅଭିଜ୍ଞତା ଏବଂ ଜାତୀୟ ସୁରକ୍ଷା ସମ୍ପର୍କିତ ତଦନ୍ତର ଅଭିଜ୍ଞତା ଏହି ନୂତନ ଦାୟିତ୍ୱରେ ଏକାଠି ହୋଇଛି। ସେ ନ୍ୟାସନାଲ୍ ଇନଭେଷ୍ଟିଗେସନ୍ ଏଜେନ୍ସି ତଥା ଏନ୍ଆଇଏର ଡିଆଇଜି ଭାବେ ମଧ୍ୟ କାମ କରିଛନ୍ତି। ଆସାମରେ ସଞ୍ଜୁକ୍ତା ପରାଶରଙ୍କ କ୍ୟାରିୟର ତାଙ୍କୁ କଠିନ ଅପରେସନ୍ ଏବଂ ଚ୍ୟାଲେଞ୍ଜିଂ ପରିସ୍ଥିତି ସାମ୍ନା କରିବାକୁ ପ୍ରସ୍ତୁତ ଥିବା ଜଣେ ଅଧିକାରୀ ଭାବେ ପରିଚିତ କରାଇଥିଲା। କ୍ୟାରିୟରର ପ୍ରାରମ୍ଭିକ ପୋଷ୍ଟିଂ ସମୟରେ ସେ ବିଦ୍ରୋହ ପ୍ରଭାବିତ ଅଞ୍ଚଳରେ କାମ କରିଥିଲେ। ଘଞ୍ଚ ଜଙ୍ଗଲ, ସଶସ୍ତ୍ର ଉଗ୍ରବାଦୀ ଏବଂ ପରିବର୍ତ୍ତନଶୀଳ ସୁରକ୍ଷା ପରିସ୍ଥିତି ମଧ୍ୟରେ ସେ ଅନେକ ଅଭିଯାନରେ ନେତୃତ୍ୱ ନେଇଥିଲେ। ବିଦ୍ରୋହ ବିରୋଧୀ ଅଭିଯାନରେ ସକ୍ରିୟ ଭୂମିକା ଏବଂ ତୃଣମୂଳ ସ୍ତରରେ ତାଙ୍କର ନେତୃତ୍ୱ ଯୋଗୁ ତାଙ୍କୁ ‘ଆସାମର ଆଇରନ୍ ଲେଡି’ ବୋଲି ଡକାଯାଇଥିଲା। ଏବେ ତାଙ୍କର ନୂତନ ଦାୟିତ୍ୱ ଏପରି ଏକ ବାହିନୀର ନେତୃତ୍ୱ ନେବା, ଯାହାର କାର୍ଯ୍ୟକ୍ଷେତ୍ର ଆସାମରେ ସେ ପୂର୍ବରୁ ସାମ୍ନା କରିଥିବା ପରିସ୍ଥିତି ସହିତ ଅନେକ ମାତ୍ରାରେ ସମାନ। ଆସାମର ଜଙ୍ଗଲରେ ବିଦ୍ରୋହ ବିରୋଧୀ ଅପରେସନ୍ରେ ନେତୃତ୍ୱ ପାଇଁ ଯିଏ ପରିଚିତ ହୋଇଥିଲେ, ସେହି ଅଧିକାରୀ ଏବେ ଦେଶର ଅନ୍ୟତମ ପ୍ରମୁଖ ଜଙ୍ଗଲ ଯୁଦ୍ଧ ବାହିନୀର କମାଣ୍ଡ ନେବେ। ସଞ୍ଜୁକ୍ତା ପରାଶରଙ୍କ ପେଶାଗତ ଯାତ୍ରା ରାଜନୀତି ବିଜ୍ଞାନ ଏବଂ ଆନ୍ତର୍ଜାତୀୟ ସମ୍ପର୍କର ଶିକ୍ଷାଗତ ପୃଷ୍ଠଭୂମିରୁ ଆରମ୍ଭ ହୋଇଥିଲା ।ସେ ଦିଲ୍ଲୀ ୟୁନିଭର୍ସିଟିର ଇନ୍ଦ୍ରପ୍ରସ୍ଥ କଲେଜରେ ରାଜନୀତି ବିଜ୍ଞାନ ପଢ଼ିଥିଲେ। ପରେ ଜବାହରଲାଲ ନେହରୁ ୟୁନିଭର୍ସିଟି (ଜେଏନ୍ୟୁ)ରେ ଆନ୍ତର୍ଜାତୀୟ ସମ୍ପର୍କରେ ଉଚ୍ଚଶିକ୍ଷା ଗ୍ରହଣ କରିଥିଲେ। ୨୦୦୬ ମସିହାରେ ସେ ୟୁପିଏସ୍ସି ସିଭିଲ୍ ସର୍ଭିସେସ୍ ପରୀକ୍ଷାରେ ଅଲ୍ ଇଣ୍ଡିଆ ରାଙ୍କ ୮୫ ହାସଲ କରି ଆଇପିଏସ୍ରେ ଯୋଗ ଦେଇଥିଲେ। ସେ ପ୍ରଶାସନିକ ସେବା ପରିବର୍ତ୍ତେ ପୋଲିସ ସେବାକୁ ବାଛିଥିଲେ।
Tags:
