ଆଜିଠାରୁ ଦିଲ୍ଲୀର ୧୦୦ଟି ଅଟଳ କ୍ୟାଣ୍ଟିନରେ ୫ ଟଙ୍କା ଥାଳି: ଦେଖନ୍ତୁ ମେନୁରେ କ’ଣ ଅଛି
ନୂଆଦିଲ୍ଲୀ: ଦୁଇ ଓଳି ଦୁଇ ମୁଠା ଖାଦ୍ୟ ଖାଇବାପାଇଁ ସଂଘର୍ଷ କରୁଥିବା ଲୋକଙ୍କପାଇଁ ଦିଲ୍ଲୀ ସରକାର ଏକ ନୂଆ ବ୍ୟବସ୍ଥା କରିଛନ୍ତି। ଦିଲ୍ଲୀ ସରକାର ଆଜି 'ଅଟଳ କ୍ୟାଣ୍ଟିନ୍' ଯୋଜନା ଆରମ୍ଭ କରିଛନ୍ତି, ଯାହା ସହରର ୧୦୦ ଟି ସ୍ଥାନରେ ପ୍ରତି ପ୍ଲେଟ୍ ପାଇଁ ମାତ୍ର ୫ ଟଙ୍କାରେ ପୁଷ୍ଟିକର ଖାଦ୍ୟ ପ୍ରଦାନ କରୁଛି। ପ୍ଲେଟ୍ରେ ରହୁଛି ଡାଲି, ଭାତ, ପନିପରିବା ତରକାରୀ ଏବଂ ଆଚାର। ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ୧୦୧ତମ ଜନ୍ମବାର୍ଷିକୀକୁ ସ୍ମରଣ କରି, ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଗରିବ, ଶ୍ରମିକ ଏବଂ ନିମ୍ନ ଆୟ ପରିବାରକୁ ସମ୍ମାନର ସହିତ ଖାଦ୍ୟ ଯୋଗାଇବା ପାଇଁ ୧୦୦ଟି ଅଟଳ କ୍ୟାଣ୍ଟିନ୍ ଆରମ୍ଭ କରିଛନ୍ତି। ଅଟଳ କ୍ୟାଣ୍ଟିନ୍ ଦିଲ୍ଲୀର ଆତ୍ମା ହେବ, ଯେଉଁଠାରେ କାହାକୁ ଭୋକିଲା ଶୋଇବାକୁ ପଡ଼ିବ ନାହିଁ ବୋଲି ସେ କହିଛନ୍ତି। ସରକାର ପ୍ରଥମେ ଦିଲ୍ଲୀରେ ୪୫ଟି ଅଟଳ କ୍ୟାଣ୍ଟିନ୍ ପାଇଁ ଦ୍ୱାର ଖୋଲିଛନ୍ତି। ଆରକେ ପୁରମ, ଜଙ୍ଗପୁରା, ଶାଲିମାର ବାଗ, ଗ୍ରେଟର କୈଳାସ, ରାଜୌରୀ ଗାର୍ଡେନ୍, ନରେଲା, ବାୱାନା, ଏବଂ ଅନ୍ୟାନ୍ୟ ସ୍ଥାନରେ ଅଟଳ କ୍ୟାଣ୍ଟିନ ଖୋଲାଯାଇଛି। ଆଗାମୀ ଦିନରେ ବାକି ୫୫ ଟି କ୍ୟାଣ୍ଟିନ୍ ଉଦଘାଟନ କରାଯିବ। ଏହି କ୍ୟାଣ୍ଟିନଗୁଡ଼ିକ ପ୍ରାୟ ୫୦୦ଜଣଙ୍କୁ ଦିନକୁ ଦୁଇଟି ଖାଦ୍ୟ - ପୂର୍ବାହ୍ନ ୧୧ରୁ ଅପରାହ୍ନ ୪ଟା ମଧ୍ୟରେ ମଧ୍ୟାହ୍ନ ଭୋଜନ ଏବଂ ସନ୍ଧ୍ୟା ୬.୩୦ ରୁ ରାତି ୯.୩୦ମଧ୍ୟରେ ରାତ୍ରୀ ଭୋଜନ ପ୍ରଦାନ କରିବ। ଦିଲ୍ଲୀ ସରକାର ଖାଦ୍ୟ ବଣ୍ଟନ ପାଇଁ ମାନୁଆଲ୍ କୁପନ ବଦଳରେ ଏକ ଡିଜିଟାଲ୍ ଟୋକନ୍ ସିଷ୍ଟମ୍ ପ୍ରଚଳନ କରିଛନ୍ତି। ଦିଲ୍ଲୀ ଅର୍ବାନ ସେଲ୍ଟର ଇମ୍ପ୍ରୁଭମେଣ୍ଟ ବୋର୍ଡ (ଡିୟୁଏସ୍ଆଇବି) ଡିଜିଟାଲ୍ ପ୍ଲାଟଫର୍ମ ମାଧ୍ୟମରେ ସିସି ଟିଭି କ୍ୟାମେରା ସମସ୍ତ କେନ୍ଦ୍ର ଉପରେ ବାସ୍ତବ ସମୟରେ ନଜର ରଖିବ।
