ପ୍ରଧାନମନ୍ତ୍ରୀଙ୍କୁ ଭେଟିଲେ ରାଘବ ଚଢ଼ା, ପଞ୍ଜାବ ଭୂମିକାକୁ ନେଇ ଚର୍ଚ୍ଚା

ନୂଆଦିଲ୍ଲୀ : ବିଜେପି ରାଜ୍ୟସଭା ସାଂସଦ ରାଘବ ଚଢ଼ା ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅଚାନକ ଭେଟିବା ପରେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଯାଇଛି। ପୂର୍ବତନ ଆମ୍ ଆଦମୀ ପାର୍ଟି ନେତା ଚଢ଼ା ମୋଦୀଙ୍କ ସହ ଏହି ସାକ୍ଷାତକୁ ‘ମନେ ରଖିବା ଭଳି ଏକ ସକାଳ’ ବୋଲି ବର୍ଣ୍ଣନା କରିଛନ୍ତି। ପଞ୍ଜାବ ବିଧାନସଭା ନିର୍ବାଚନର କିଛି ମାସ ପୂର୍ବରୁ ଏହି ସାକ୍ଷାତ ହୋଇଥିବାରୁ ଏହାକୁ ନେଇ ବ୍ୟାପକ ଚର୍ଚ୍ଚା ଆରମ୍ଭ ହୋଇଯାଇଛି। ଶୁକ୍ରବାର ଶିରୋମଣି ଅକାଳୀ ଦଳ ମୁଖ୍ୟ ସୁଖବୀର ସିଂହ ବାଦଲ ମଧ୍ୟ ପ୍ରଧାନମନ୍ତ୍ରୀଙ୍କୁ ଭେଟିଥିଲେ। ଉଲ୍ଲେଖଯୋଗ୍ୟ ରାଘବ ଚଢ଼ା ଆପ୍‌ ବିରୋଧରେ ବିଦ୍ରୋହ କରି ଏହି ବର୍ଷ ଆରମ୍ଭରେ ଅନ୍ୟ ୬ ଜଣ ସାଂସଦଙ୍କ ସହ ବିଜେପିରେ ଯୋଗ ଦେଇଥିଲେ। ତେବେ ମୋଦୀଙ୍କ ସହ ଆଲୋଚନାରେ କ’ଣ ହୋଇଥିଲା ସେ ବିଷୟରେ ସେ କିଛି ପ୍ରକାଶ କରିନାହାନ୍ତି। କିନ୍ତୁ ସେ ଏହାକୁ ‘ଜ୍ଞାନବର୍ଦ୍ଧକ ଓ ସମୃଦ୍ଧିକାରୀ ଆଲୋଚନା’ ବୋଲି କହିଛନ୍ତି। ଚଢ଼ା କହିଛନ୍ତି, ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବାର ସୌଭାଗ୍ୟ ମିଳିଲା। ଏହା ଏକ ବିସ୍ତୃତ ଓ ଜ୍ଞାନବର୍ଦ୍ଧକ ଆଲୋଚନା ଥିଲା। ତାଙ୍କର ମୂଲ୍ୟବାନ ସମୟ ଏବଂ ତାଙ୍କ ଅନୁଭୂତି ଓ ମାର୍ଗଦର୍ଶନରୁ ଲାଭ ପାଇବାର ସୁଯୋଗ ପାଇ ମୁଁ ଗଭୀର ଭାବେ କୃତଜ୍ଞ। ପଞ୍ଜାବରେ ବିଧାନସଭା ନିର୍ବାଚନ ପୂର୍ବରୁ ବିଜେପି ରାଜ୍ୟରେ ନିଜର ରାଜ‌ନୈତିକ କାର୍ଯ୍ୟକଳାପ ବଢ଼ାଇଥିବା ସମୟରେ ଏହି ସାକ୍ଷାତକାର ହୋଇଛି। ପଞ୍ଜାବରୁ ରାଜ୍ୟସଭାକୁ ପ୍ରତିନିଧିତ୍ୱ କରୁଥିବା ଏବଂ ଜଲନ୍ଧର ସହ ପାରିବାରିକ ସମ୍ପର୍କ ଥିବା ଚଢ଼ା ରାଜ୍ୟରେ ବିଜେପି ପାଇଁ ଏକ ପ୍ରମୁଖ ଓ ସକ୍ରିୟ ଭୂମିକା ନେବେ ବୋଲି ଆଶା କରାଯାଉଛି। ଆରମ୍ଭରୁ ଆପ୍‌ ସହ ରହିଥିବା ଚଢ଼ା ଏପ୍ରିଲରେ ଅନ୍ୟ ୬ ଜଣ ସାଂସଦଙ୍କ ସହ ବିଜେପିରେ ମିଶି ଏକ ବଡ଼ ରାଜନୈତିକ ପରିବର୍ତ୍ତନ ଆଣିଥିଲେ।