ଭିୱାଣ୍ଡିରେ ଚାରି ମହଲା କୋଠା ଭୁଶୁଡ଼ି ୯ ଜଣଙ୍କ ମୃତ୍ୟୁ , ଉଦ୍ଧାର କାର୍ଯ୍ୟ ଜାରି
ମୁମ୍ବାଇ: ମହାରାଷ୍ଟ୍ରର ଭିୱାଣ୍ଡିରେ ଗୁରୁବାର ବିଳମ୍ବିତ ରାତିରେ ଏକ ଚାରି ମହଲା ବିଶିଷ୍ଟ ଆବାସିକ କୋଠା ଭୁଶୁଡ଼ି ପଡ଼ିବାରୁ ଅତି କମ୍ରେ ୯ ଜଣଙ୍କ ମୃତ୍ୟୁ ଘଟିଛି। ଅଧିକାରୀମାନଙ୍କ କହିବା ଅନୁସାରେ, ଏବେ ମଧ୍ୟ କିଛି ଲୋକ ଧ୍ୱଂସାବଶେଷ ତଳେ ଫସି ରହିଥିବା ଆଶଙ୍କା କରାଯାଉଛି ଏବଂ ସେମାନଙ୍କୁ ଉଦ୍ଧାର ପାଇଁ ଅଭିଯାନ ଜାରି ରହିଛି। ପୌରପାଳିକା ଅଧିକାରୀଙ୍କ ସୂଚନା ଅନୁସାରେ, ଏହି ଚାରି ମହଲା ବିଶିଷ୍ଟ କୋଠାରେ ମୋଟ ୪୮ଟି କୋଠରୀ ଥିଲା, ପ୍ରତ୍ୟେକ ମହଲାରେ ୧୨ଟି ଲେଖାଏଁ କୋଠରୀ ଥିଲା। ଗୁରୁବାର ରାତି ପ୍ରାୟ ୧୧.୩୦ ସମୟରେ କୋଠାଟି ହଠାତ୍ ଭୁଶୁଡ଼ି ପଡ଼ିଥିଲା। ପୂର୍ବରୁ ପୌର ସଂସ୍ଥା ଏହାକୁ ବିପଜ୍ଜନକ ବୋଲି ଘୋଷଣା କରିଥିଲା ଏବଂ ଘଟଣା ସମୟରେ କୋଠାର ମରାମତି କାମ ଚାଲିଥିଲା। ସ୍ଥାନୀୟ ବାସିନ୍ଦାମାନେ କହିଛନ୍ତି ଯେ, ଗୁରୁବାର ରାତି ପ୍ରାୟ ୯ଟା ବେଳେ କୋଠାରୁ ଜୋରରେ ଫାଟିବା ଶବ୍ଦ ଶୁଣିଥିଲେ। ଏହା ପରେ ସେମାନେ ପ୍ରଶାସନକୁ ସୂଚନା ଦେଇଥିଲେ ଏବଂ ଅନେକ ପରିବାରକୁ କୋଠାରୁ ବାହାର କରାଯାଇଥିଲା। କିନ୍ତୁ କିଛି ଲୋକ ବାହାରକୁ ଆସୁଥିବା ବେଳେ ହଠାତ୍ କୋଠାର ‘ବି ୱିଙ୍ଗ’ ଭୁଶୁଡ଼ି ପଡ଼ିଥିଲା। ଅଗ୍ନିଶମ ବିଭାଗର ସୂଚନା ଅନୁସାରେ, ଧ୍ୱଂସାବଶେଷରୁ ୬ଟି ମୃତଦେହ ଉଦ୍ଧାର କରାଯାଇଛି। ଏମାନଙ୍କ ମଧ୍ୟରୁ ଅଧିକାଂଶ କୋଠାର ମରାମତି କାମରେ ନିୟୋଜିତ ଶ୍ରମିକ ବୋଲି ସନ୍ଦେହ କରାଯାଉଛି। ଉଦ୍ଧାରକାରୀ ଦଳ ୬ ଜଣଙ୍କୁ ଜୀବିତ ଅବସ୍ଥାରେ ଉଦ୍ଧାର କରିଛନ୍ତି। ଏଥିସହ ଜଣେ ଆହତ ବାଳକଙ୍କୁ ଧ୍ୱଂସାବଶେଷ ତଳୁ ବାହାର କରି ନିକଟସ୍ଥ ହସ୍ପିଟାଲକୁ ପଠାଯାଇଛି। ଅଧିକାରୀମାନଙ୍କ ଆଶଙ୍କା, ଆହୁରି କିଛି ଲୋକ ଧ୍ୱଂସାବଶେଷ ତଳେ ଫସି ରହିଛନ୍ତି। ଉଦ୍ଧାର କାର୍ଯ୍ୟରେ ଜାତୀୟ ବିପର୍ଯ୍ୟୟ ପରିଚାଳନା ବାହିନ, ଥା;ନ ବିପର୍ଯ୍ୟୟ ମୁକାବିଲା ବାହିନୀ, ସ୍ଥାନୀୟ ଅଗ୍ନିଶମ ବାହିନୀ ଏବଂ ପୁଲିସ ନିୟୋଜିତ ଅଛନ୍ତି। ଘଟଣାସ୍ଥଳରେ ଏକ ଡଗ୍ ସ୍କ୍ୱାଡ୍, ଚାରିଟି ଅଗ୍ନିଶମ ଗାଡ଼ି, ଦୁଇଟି ଆମ୍ବୁଲାନ୍ସ ଏବଂ ଭାରୀ ପୃଥିବୀ ଖନନ ଯନ୍ତ୍ର ମୁତୟନ କରାଯାଇଛି। ଭିୱାଣ୍ଡି-ନିଜାମପୁର ପୌର ନିଗମର ସହକାରୀ ପୌର କମିଶନର ଅରବିନ୍ଦ ଘୋଗାରେ କହିଛନ୍ତି ଯେ, କୋଠାରେ ଫାଟ ସୃଷ୍ଟି ହୋଇଥିବା ଖବର ପାଇବା ପରେ ସେମାନେ ତୁରନ୍ତ ଘଟଣାସ୍ଥଳକୁ ପହଞ୍ଚିଥିଲେ। ସେ କହିଥିଲେ, ଆମେ ପହଞ୍ଚିବା ବେଳକୁ କୋଠାଟି ଫାଟିବା ଆରମ୍ଭ କରିଥିଲା। ଆମ ଦଳ ଭିତରକୁ ଯାଇ ବାସିନ୍ଦାମାନଙ୍କୁ ବାହାର କରିଥିଲା। ଘୋଗାରେଙ୍କ କହିବା ଅନୁସାରେ, ଅଧିକାଂଶ ବାସିନ୍ଦା ପ୍ରଶାସନର ନିର୍ଦ୍ଦେଶ ପରେ ବାହାରକୁ ଆସିଥିଲେ। କିନ୍ତୁ କିଛି ମହିଳା ପ୍ରଥମେ ଖାଇ ସାରିବା ପରେ ବାହାରିବୁ ବୋଲି କହିଥିଲେ। ସେ ଆହୁରି କହିଥିଲେ ଯେ, ପ୍ରାୟ ୧୦ ବର୍ଷ ପୁରୁଣା ଏହି କୋଠାରେ ସେହି ସମୟରେ ବେଆଇନ ଭାବେ ମରାମତି କାମ ଚାଲିଥିଲା। ସେ କହିଥିଲେ, ବାସିନ୍ଦାମାନଙ୍କୁ ବାହାର କରାଯାଇଥିଲା, କିନ୍ତୁ ମରାମତି କାମ କରୁଥିବା ଶ୍ରମିକମାନେ ବାହାରକୁ ଆସିନଥିଲେ। ପ୍ରାୟ ପାଞ୍ଚ ଜଣ ଶ୍ରମିକ ଭିତରେ ଫସିଥିବା ଆଶଙ୍କା ରହିଛି। ଆମେ ବାହାରକୁ ଆସିବାର କିଛି ମିନିଟ୍ ପରେ କୋଠାଟି ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିଲା। ପ୍ରଶାସନ ପକ୍ଷରୁ ଭଗ୍ନାବଶେଷ ତଳେ ଫସିଥିବା ଲୋକଙ୍କୁ ଉଦ୍ଧାର ଅଭିଯାନ ଜାରି ରହିଛି।
