୩ ବର୍ଷରେ ୪୫ ବସ୍ରେ ଅଗ୍ନିକାଣ୍ଡ, ୬୪ ମୃତ
ନୂଆଦିଲ୍ଲୀ: ବୁଧବାର କେନ୍ଦ୍ର ସରକାର କହିଛନ୍ତି ଯେ, ଡିସେମ୍ବର ୧୦ ପର୍ଯ୍ୟନ୍ତ ଗତ ତିନି ବର୍ଷ ମଧ୍ୟରେ ୪୫ଟି ବସ୍ରେ ନିଆଁ ଲାଗିବା ଘଟଣାରେ ୬୪ ଜଣଙ୍କର ମୃତ୍ୟୁ ଘଟିଛି। ଇଲେକ୍ଟ୍ରୋନିକ୍ ଡିଟେଲ୍ସ ଆକ୍ସିଡେଣ୍ଟ ରିପୋର୍ଟ (ଇଡିଏଆର୍)ର ତଥ୍ୟ ଅନୁଯାୟୀ, ଏହି ସମୟ ମଧ୍ୟରେ ରାଜସ୍ଥାନରେ ବସ୍ ଅଗ୍ନିକାଣ୍ଡ ଘଟି ଅତି କମ୍ରେ ୪୫ ଜଣଙ୍କର ମୃତ୍ୟୁ ଘଟିଛି। ମହାରାଷ୍ଟ୍ରରେ ସର୍ବାଧିକ ନଅଟି ବସ୍ ଅଗ୍ନିକାଣ୍ଡ ଘଟଣା ଘଟିଛି। ଏହା ପଛକୁ ମଧ୍ୟପ୍ରଦେଶରେ ଆଠଟି ଘଟଣା ଘଟିଛି। ରାଜସ୍ଥାନ, ତାମିଲନାଡ଼ୁ ଓ କର୍ଣ୍ଣାଟକରେ ଏହି ତିନି ବର୍ଷ ମଧ୍ୟରେ ଛଅଟି ଲେଖାଏଁ ବସ୍ରେ ଅଗ୍ନିକାଣ୍ଡ ଘଟିଛି। ଆମ୍ ଆଦମୀ ପାର୍ଟି (ଆପ୍) ରାଜ୍ୟସଭା ସାଂସଦ ନାରାୟଣ ଦାସ ଗୁପ୍ତାଙ୍କ ଦ୍ୱାରା ଉଠାଯାଇଥିବା ଏକ ପ୍ରଶ୍ନର ଉତ୍ତରରେ କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନିତିନ ଗଡକରୀ ରାଜ୍ୟସଭାରେ ଏହି ସୂଚନା ପ୍ରଦାନ କରିଛନ୍ତି। ଉତ୍ତରରେ ଉଲ୍ଲେଖ କରାଯାଇଛି ଯେ, ଏହି ପରିସଂଖ୍ୟାନରେ ନିକଟରେ ହୋଇଥିବା ଦୁର୍ଘଟଣାକୁ ଅନ୍ତର୍ଭୁକ୍ତ କରାଯାଇ ନାହିଁ ଯେଉଁଥିରେ ଆନ୍ଧ୍ରପ୍ରଦେଶର କର୍ଣ୍ଣୁଲରେ ୨୪ ଅକ୍ଟୋବର ୨୦୨୫ରେ ଏକ ବସ୍ ଏକ ମୋଟରସାଇକେଲ ସହ ଧକ୍କା ହୋଇଥିଲା ଏବଂ ପରବର୍ତ୍ତୀ ସମୟରେ ନିଆଁ ଲାଗିଯାଇଥିଲା, ଯେଉଁଥିରେ ୨୫ ଜଣଙ୍କର ମୃତ୍ୟୁ ଘଟିଥିଲା। ସୋମବାର ମଥୁରାର ଯମୁନା ଏକ୍ସପ୍ରେସ୍ୱେରେ ଧୂଆଁକୁହୁଡ଼ି ଯୋଗୁ ଅନେକ ଗାଡ଼ି ଭିତରେ ଚେନ୍ ଦୁର୍ଘଟଣା ଘଟି ୧୩ ଜଣଙ୍କର ମୃତ୍ୟୁ ହୋଇଛି। ସେମାନଙ୍କ ମଧ୍ୟରୁ ଅଧିକାଂଶ ଗାଡ଼ିରେ ନିଆଁ ଲାଗିଯିବାରୁ ଜଳି ଯାଇଛନ୍ତି। ଆଗ୍ରାରୁ ଗୌତମବୁଦ୍ଧ ନଗର ଅଭିମୁଖେ ଯାତ୍ରା କରୁଥିବା ଆଠଟି ବସ୍ ଓ ତିନୋଟି ଛୋଟ ଗାଡ଼ି ମଥୁରାର ବଳଦେବ ସହର ନିକଟରେ ପରସ୍ପରକୁ ଧକ୍କା ଦେଇଥିଲେ।
