ଗୁଆହାଟୀ ହୋଟେଲରେ ଗୁଳିକାଣ୍ଡ, ୫ ଜଣଙ୍କ ମୃତ୍ୟୁ
-
ଗୁଆହାଟୀ: ଆସାମର ଗୁଆହାଟୀସ୍ଥିତ ଏକ ହୋଟେଲରେ ଭୟଙ୍କର ଗୁଳିକାଣ୍ଡ ଘଟି ଗୋଟିଏ ପରିବାରର ଚାରି ଜଣଙ୍କ ସମେତ ପାଞ୍ଚ ଜଣଙ୍କ ମୃତ୍ୟୁ ହୋଇଛି। ଏହି ଘଟଣାରେ ଆଉ ଜଣେ ମଧ୍ୟ ଆହତ ହୋଇଛନ୍ତି। ଘଟଣା ପରେ ପୁଲିସ ଅଭିଯୁକ୍ତ ଘନକାନ୍ତ ଗୋଗୋଇଙ୍କୁ ଗିରଫ କରିଛି। ସୂଚନା ଅନୁଯାୟୀ, ଗୁଆହାଟୀର ବ୍ୟସ୍ତବହୁଳ ଜିଏସ୍ ରୋଡ୍ ଅଞ୍ଚଳରେ ଥିବା ବିଳାସ ଇନ୍ ହୋଟେଲରେ ରାତି ପ୍ରାୟ ୯ଟା ସମୟରେ ଏହି ଗୁଳିକାଣ୍ଡ ଘଟିଛି। ହୋଟେଲକୁ ଲିଜ୍ରେ ନେବା ଏବଂ ଭଡ଼ା ଚୁକ୍ତିକୁ ନେଇ ହୋଟେଲ ମାଲିକ ଓ ଅଭିଯୁକ୍ତଙ୍କ ମଧ୍ୟରେ ବିବାଦ ଥିବା ପୁଲିସ ସନ୍ଦେହ କରୁଛି। ପୁଲିସ କମିସନର ପାର୍ଥସାରଥି ମହାନ୍ତଙ୍କ ସୂଚନା ଅନୁସାରେ, ଅଭିଯୁକ୍ତ ଗତ ବର୍ଷ ହୋଟେଲଟିକୁ ଲିଜ୍ରେ ନେଇଥିଲେ। ଘଟଣାର ତଦନ୍ତ ଏବେ ପ୍ରାରମ୍ଭିକ ପର୍ଯ୍ୟାୟରେ ରହିଛି। ଗୁଳିକାଣ୍ଡର ପ୍ରାୟ ଏକ ଘଣ୍ଟା ମଧ୍ୟରେ ପୁଲିସ ଅଭିଯୁକ୍ତଙ୍କୁ ଧରିବା ସହ ତାଙ୍କଠାରୁ ଏକ ଲାଇସେନ୍ସପ୍ରାପ୍ତ ପିସ୍ତଲ ଜବତ କରିଛି। ଏହି ବନ୍ଧୁକ ଗୁଳିକାଣ୍ଡରେ ବ୍ୟବହାର ହୋଇଥିବା ସନ୍ଦେହ କରାଯାଉଛି। ଗୁଳିମାଡ଼ରେ ଆହତ ସତ୍ୟେନ ପାଠକଙ୍କ କାନ୍ଧରେ ଗୁଳି ବାଜିଛି। ତାଙ୍କୁ ଗୁଆହାଟୀ ମେଡିକାଲ କଲେଜ ହସ୍ପିଟାଲରେ ଚିକିତ୍ସା କରାଯାଉଛି। ଘଟଣାସ୍ଥଳରେ ଫରେନ୍ସିକ୍ ଟିମ୍ ତଦନ୍ତ କରିବା ସହ ପ୍ରମାଣ ସଂଗ୍ରହ କରୁଛି।
