ଲେବାନନ୍ରେ ଇସ୍ରାଏଲ ଆକ୍ରମଣରେ ୩୧ ଜଣଙ୍କ ମୃତ୍ୟୁ
ବେରୁତ : ଲେବାନନ୍ ଉପରେ ଇସ୍ରାଏଲ ଆକ୍ରମଣରେ ଅତି କମ୍ରେ ୩୧ ଜଣଙ୍କର ମୃତ୍ୟୁ ହୋଇଛି ଏବଂ ୧୪୯ ଜଣ ଆହତ ହୋଇଛନ୍ତି। ସୋମବାର ଲେବାନନର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି, ହିଜବୋଲା ରକେଟ ମାଡ଼ ପରେ ଇସ୍ରାଏଲୀ ସେନା ଏହାର ଆକ୍ରମଣକୁ ତୀବ୍ର କରିବାକୁ ଧମକ ଦେଇଛି। ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ବେରୁତର ଦକ୍ଷିଣ ଉପନଗର ଏବଂ ଦକ୍ଷିଣ ଲେବାନନରେ ଇସ୍ରାଏଲ୍ ଆକ୍ରମଣରେ ୩୧ ଜଣଙ୍କର ମୃତ୍ୟୁ ହୋଇଛି। ଇରାନର ସର୍ବୋଚ୍ଚ ନେତା ଅଲି ଖାମେନିଙ୍କ ହତ୍ୟାର ଜବାବରେ ତେହେରାନ ସମର୍ଥିତ ହିଜବୋଲ୍ଲା ଇସ୍ରାଏଲ ଉପରେ ରକେଟ ମାଡ଼ କରିବା ପରେ ଇସ୍ରାଏଲୀ ସେନା ସୋମବାର ଦିନ ଆତଙ୍କବାଦୀମାନଙ୍କୁ ଟାର୍ଗେଟ କରିବା ପାଇଁ ରାଜଧାନୀ ବେରୁତ ସମେତ ଲେବାନନ୍ରେ ଆକ୍ରମଣ ଆରମ୍ଭ କରିଥିବା କହିଛି। ଇସ୍ରାଏଲୀ ସେନା କହିଛି ଯେ ହିଜବୋଲାର ପ୍ରକ୍ଷେପଣ ଗୁଳିର ଜବାବରେ ଇସ୍ରାଏଲୀ ସେନା ଲେବାନନରେ୍ ହିଜବୋଲା ଆତଙ୍କବାଦୀ ସଂଗଠନର ଲକ୍ଷ୍ୟସ୍ଥଳ ଉପରେ ଆକ୍ରମଣ ଆରମ୍ଭ କରିଛି। ଲେବାନନ୍ର ଆତଙ୍କବାଦୀ ସଂଗଠନ ହିଜବୋଲା ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରି କହିଛି ଯେ ଏହା ଆୟାତୋଲ୍ଲା ଇମାମ ସୟଦ ଅଲି ଅଲ-ହୁସେନି ଖାମେନିଙ୍କ ପବିତ୍ର ରକ୍ତର ପ୍ରତିଶୋଧ ପାଇଁ ଏବଂ ଲେବାନନ ଏବଂ ଏହାର ଲୋକଙ୍କ ସୁରକ୍ଷା ପାଇଁ ଏବଂ ବାରମ୍ବାର ଇସ୍ରାଏଲୀ ଆକ୍ରମଣର ଜବାବରେ ରକେଟ ଏବଂ ଡ୍ରୋନ ମାଡ଼ କରିଛି। ଉଲ୍ଲେଖଯୋଗ୍ୟ ଯେ ନଭେମ୍ବର ୨୦୨୪ ରେ ଉଭୟ ପକ୍ଷ ମଧ୍ୟରେ ଏକ ବର୍ଷର ଯୁଦ୍ଧ ସମାପ୍ତ କରିବା ପାଇଁ ହୋଇଥିବା ଯୁଦ୍ଧବିରତି ଚୁକ୍ତିନାମା ପରେ ହିଜବୋଲା ଇସ୍ରାଏଲ ଉପରେ ଦାବି କରିଥିବା ଏହା ପ୍ରଥମ ଆକ୍ରମଣ।
